តស៊ូពីក្មេងដើរបេះបន្លែលក់ បច្ចុប្បន្នក្លាយជាប្រធាននាយកដ្ឋានទាំងវ័យក្មេង

2017-12-20 11:23:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ប៉ុក បូរក្ស បច្ចុប្បន្នកំពុងកាន់តំណែងជាប្រធាននាយកដ្ឋានភាពយន្ត និងផ្សព្វផ្សាយវប្បធម៌ ជំនួសប្រធានចាស់លោក ស៊ិន ច័ន្ទសាយ៉ា ដែលចូលនិវត្តន៍។ មានវ័យត្រឹម ៣៥ ឆ្នាំ លោក បូរក្ស គឺជាមន្ត្រីរាជការវ័យក្មេងមួយរូបក្នុងជួររាជរដ្ឋាភិបាលកម្ពុជា។ ប៉ុន្តែមុនពេលមកកាន់តំណែងធំមួយនាពេលបច្ចុប្បន្ន លោក បានតស៊ូច្រើន ដោយចាប់ផ្ដើមពីក្មេងលក់បន្លែបង្ការសព្វមុខ។

ស្ថានភាពគ្រួសារ និងការតស៊ូ

រំលឹកទៅអតីតកាល និងរឿងរ៉ាវផ្ទាល់ខ្លួន លោក បូរក្ស ប្រាប់ថា គ្រួសារលោកគឺជាគ្រួសារអ្នករាជការ ក្នុងនោះឪពុកលោកឈ្មោះ ប៉ុក នាង បច្ចុប្បន្នមានវ័យ ៨១ឆ្នាំ ជាអតីតមន្ត្រីបម្រើការនៅក្រសួងសុខាភិបាល។ ម្ដាយឈ្មោះ កង សុខា វ័យ ៦៣ឆ្នាំ ជាមេផ្ទះ។ ប៉ុក បូរក្ស កើតមានរាជធានីភ្នំពេញ និងមានបងប្អូន ៧នាក់(ស្រី២នាក់) លោកជាកូនពៅ។ ក្រៅពីលោក បង៦នាក់ទៀត ក៏ជាមន្ត្រីរាជការដែរ ប៉ុន្តែនៅស្ថាប័នផ្សេងគ្នាទាំងអស់។

និយាយពីជីវិតតស៊ូ យ៉ាងត្រដាបត្រដួសកាលពីអតីតកាល ប្រធាននាយកដ្ឋានរូបនេះប្រាប់ថា ដើមឡើយកាលពីនៅក្រោមការទំនុកបម្រុងលោកឪពុកជាមន្ត្រីរាជការ គ្រួសាររបស់លោកត្បិតថា មិនខ្ពស់មុខខ្ពស់មាត់ ប៉ុន្តែក៏អាចរស់នៅបានស្រួលដែរ។ ប៉ុន្តែក្រោយអ្នកមានគុណរូបនេះ អស់ការងារការលំបាក ក៏លេចមុខឡើងជ្រងោ។

“ខ្ញុំនៅចាំបាន គឺដូចជានៅឆ្នាំ ១៩៨៩ ប៉ាខ្ញុំបានចូលនិវត្តន៍ ពេលហ្នុងហើយ គ្រួសារខ្ញុំចាប់ផ្ដើមលំបាកខ្លាំង ព្រោះមិនមានទីពឹង បងៗជាប់រៀនអស់ ខ្ញុំជាប្អូននៅផ្ទះ ក៏ត្រូវបង្ខំចិត្តចេញរកកម្រៃជួយទប់ជីវភាពគ្រួសារ"។

ក្រោយចូលនិវត្តន៍ពីការងាររាជការ លោកឪពុក របស់លោក បូរក្ស បានចាប់យកអាជីពរត់ម៉ូតូឌុប ដើម្បីរកប្រាក់ទ្រទ្រង់ជីវភាព។ ប៉ុន្តែរបរមួយនេះ មិនអាចជួយឲ្យគ្រួសារដែលមានសមាជិកដល់ទៅ៩ រស់នៅសុខស្រួលទេ ពោលគឺកាន់តែប្រឈមខ្លាំងឡើងៗ។ ចុងក្រោយ ឪពុកម្ដាយលោក បានបង្ខំចិត្តលក់ផ្ទះនៅជិតផ្សារកាប់គោដែលជាកន្លែងផ្ដល់កំណើតកើតជារបស់គ្រួសារចោល។

គ្រួសារមន្ត្រីរាជការមួយនេះ បានប្ដូរទៅរស់នៅទឹកដីក្រុងតាខ្មៅវិញរហូតដល់បច្ចុប្បន្ន។ នៅលើទឹកដីថ្មីនេះហើយ លោក បូរក្ស ដែលកាលនោះនៅក្នុងវ័យកុមារភាពនៅឡើយ បានឆ្លៀតពីការសិក្សា ចេញរកកម្រៃ ដោយដើរលក់នំ និងបេះបន្លែ ដូចជា ផ្ទី ស្អំ ចេក ទាប យកទៅលក់។ ឆ្លងកាត់ជីវិតតស៊ូ៣-៤ឆ្នាំ គ្រួសារលោក ចាប់មានជីវភាពប្រសើរបន្តិចនៅអំឡុងឆ្នាំ ១៩៩៣ ក្រោយម្ដាយអាចបង្កើតមុខរបរមួយ គឺបើកហាងគុយទាវ។ ដំណើរលូតលាស់របស់គ្រួសារ មិនទាន់បានប៉ុន្មានផង គ្រោះកាចក៏វិលមកសារជាថ្មី ក្រោយគ្រួសារលោកជួបគ្រោះចោរប្លន់។ "ពេលនោះ ដូចចាប់ផ្ដើមសារថ្មីទៀត ព្រោះចោរប្លន់ បានយកអស់អាលីងតែម្ដង"។

ប្រវត្តិសិក្សា និងការបណ្ដុះបណ្ដាលផ្សេងៗ

និយាយពីជីវិតសិក្សា លោក បូរក្ស បានសិក្សានៅសាលាវត្តលង្កា។ សិក្សាបានមួយឆ្នាំ បានប្ដូរទៅរៀននៅសាលាបឋមសិក្សាតាខ្មៅ(បច្ចុប្បន្នបានក្លាយជាសាលាចិន)។ សម្រាប់កម្រិតអនុវិទ្យាល័យ លោកសិក្សានៅអនុវិទ្យាល័យសេរីភាព។

លោក បូរក្ស បានបញ្ចប់ថ្នាក់បាក់ឌុបឆ្នាំ ១៩៩៩ ហើយមកដល់ឆ្នាំ ២០០០ លោកបានចូលសិក្សាកម្រិតឧត្ដមនៅវិទ្យាស្ថានជាតិគ្រប់គ្រង(NIM) បច្ចុប្បន្ន NUM ជំនាញគ្រប់គ្រងពាណិជ្ជកម្ម។ លោកបានបញ្ចប់ការសិក្សាកម្រិតបរិញ្ញាបត្រផ្នែកនេះ នៅឆ្នាំ ២០០៤។

វិលមកការបណ្ដុះបណ្ដាលផ្សេងៗវិញ លោក ប៉ុក បូរក្ស ធ្លាប់ទទួលការបណ្ដុះបណ្ដាលលើជំនាញគ្រប់គ្រង និងដឹកនាំភាពយន្តនៅប្រទេសកូរ៉េ១ឆ្នាំក្នុងឆ្នាំ ២០០៧។ ប៉ុន្តែមុននេះ លោក ក៏ធ្លាប់ជាប់អាហារូបករណ៍ទៅសិក្សានៅប្រទេសឥណ្ឌាដែរនៅឆ្នាំ ២០០៤ ប៉ុន្តែលោកសម្រេចចិត្តអត់ទៅវិញ។ ក្រៅការបណ្ដុះបណ្ដាលខាងលើ លោក បូរក្ស ធ្លាប់បានចូលរួមការសិក្សាវគ្គខ្លីៗពាក់ព័ន្ធភាពយន្តនៅប្រទេសជាច្រើនទៀត ដូចជា នៅថៃ ភីលីពីន ឥណ្ឌូណេស៊ី និងរុស្សីជាដើម។

គោលដៅជីវិត និងបុព្វហេតុការងារ

បើទោះបច្ចុប្បន្ន កំពុងកាន់តួនាទីជាប្រធាននាយកដ្ឋានភាពយន្ត ប៉ុន្តែលោក ប៉ុក បូរក្ស ប្រាប់ថា ដើមឡើយលោកមានគោលដៅជីវិតផ្សេង គឺចង់ធ្វើជាប៉ូលីស។ ប៉ុន្តែអ្វីៗចាប់ផ្ដើមខុសពីចិត្តប៉ង ដូចព្រហ្មលិខិតចារមកជាស្រេច។

ប៉ុក បូរក្ស ប្រាប់ថា នៅឆ្នាំ ២០០១ គឺក្រោយចូលសិក្សាថ្នាក់សាកលវិទ្យាល័យបាន១ឆ្នាំ ចំពេលក្រសួងវប្បធម៌ប្រកាសប្រឡងជ្រើសរើសមន្ត្រីរាជការ ហើយផ្សំនឹងបានឪពុកមាណែនាំផង លោកក៏បានដាក់ពាក្យប្រឡងជាប់ និងចូលបម្រើការនៅឆ្នាំ ២០០២។

ការងារជាមន្ត្រីរាជការក្រសួងវប្បធម៌ដំបូងលោក បូរក្ស ទទួលបន្ទុកខាងផ្នែករដ្ឋបាល ក្រោយមកបន្ទាប់ត្រឡប់ពីបណ្ដុះបណ្ដាលនៅកូរ៉េ លោកត្រូវផ្លាស់មកកាន់តួនាទីជាអនុប្រធានការិយាល័យភូមិភាគទទួលបន្ទុកផ្នែកច្បាប់ អាជីវកម្ម នៅឆ្នាំ ២០១១។ ២ឆ្នាំក្រោយមក លោក ប៉ុក បូរក្ស បានក្លាយជាប្រធានការិយាល័យដដែលនេះពេញសិទ្ធិ។

លុះមកដល់ឆ្នាំ ២០១៧ ខែមេសា លោក បូរក្ស ត្រូវបានតែងតាំងជាប្រធានស្ដីទីនាយកដ្ឋានភាពយន្តទៀត ក្រោយប្រធានចាស់ ស៊ីន ច័ន្ទសាយ៉ា ចូលនិវត្តន៍។ ថ្មីៗនេះទៀត លោកទើបទទួលបានការដំឡើងទៅជាប្រធាននាយកដ្ឋានភាពយន្តពេញសិទ្ធិតែម្ដង។

ជីវិតអាពាហ៍ពិពាហ៍

លោក ប៉ុក បូរក្ស រៀបការនៅឆ្នាំ ២០១២ ជាមួយភរិយាឈ្មោះ ម៉ម សុធា វ័យ ៣៤ឆ្នាំ ជាមន្ត្រីបម្រើការនៅសាលារាជធានី។ បច្ចុប្បន្នលោក និងភរិយា មានកូនប្រុសម្នាក់ អាយុជិត៥ឆ្នាំ។

ការផ្ដាំផ្ញើ

ឆ្លងកាត់ការបណ្ដុះបណ្ដាល និងធ្វើការពាក់ព័ន្ធភាពយន្តច្រើន ប្រធាននាយកដ្ឋានវ័យ ៣៥ឆ្នាំរូបនេះ លើកទឹកចិត្តឲ្យផលិតវ័យក្មេង ចូលរួមក្នុងវិស័យភាពយន្ត និងដាក់ចិត្តដាក់កាយឲ្យបានច្រើន ត្បិតថាវិស័យមួយនេះរបស់ជាតិ ត្រូវការការចូលរួមរបស់យុវវ័យដែលមានសមត្ថភាពច្រើន។ លោក លើកឡើងថា កុន មានសក្ដានុពលច្រើន ក្នុងនោះមិនត្រឹមតែផ្ដល់ផលចំណេញដល់បុគ្គល ប៉ុន្តែនៅបានចូលរួមចំណែកជួយជាតិថែមទៀត តាមរយៈការផ្សព្វផ្សាយពីទេសចរណ៍ វប្បធម៌ ប្រពៃណីទំនៀមទម្លាប់របស់ជាតិទៅកាន់ពិភពលោក។

"បរទេស នៅពេលគេចង់ធ្វើទេសចរណ៍ គេអាចមើលភាពយន្ត អីចឹងបើគេមើលចំភាពយន្តយើងមានបង្ហាញពីសក្ដានុពលទេសចរ តំបន់ទេសចរណ៍យើង គេចាប់អារម្មណ៍ អីចឹងគេនឹងមកលេងប្រទេសយើងហើយ"៕

អត្ថបទ៖ ទារិកា