រំជួលចិត្ត ពេលដឹងរឿងពិតរបស់កូនខ្មែរម្នាក់ មុនក្លាយជាគ្រូចេះ១៦ភាសា
- 2017-12-25 04:52:39
- ចំនួនមតិ 0 | ចំនួនចែករំលែក 0
រំជួលចិត្ត ពេលដឹងរឿងពិតរបស់កូនខ្មែរម្នាក់ មុនក្លាយជាគ្រូចេះ១៦ភាសា
ចន្លោះមិនឃើញ
ប្រិយមិត្តប្រហែលជាបានស្គាល់ខ្លះហើយ អំពីកូនខ្មែរមួយរូបជាកំពូលអ្នកសិក្សាដ៏កម្រនៅកម្ពុជា អាចប្រើប្រាស់ភាសាបរទេសជុំវិញពិភពលោកយ៉ាងស្ទាត់ជំនាញរហូតដល់១៦ភាសា។ ប៉ុន្តែពីក្រោយភាពជោគជ័យមិននឹកស្មានដល់នេះយុវជន នឹម លាងហេង ឆ្លងកាត់ប្រវត្តិតស៊ូលំបាកជាច្រើនរាប់មិនអស់។
រៀបរាប់អំពីដំណើរជីវិតដ៏វែងឆ្ងាយរបស់ខ្លួនប្រាប់មកកាន់ Sabay នឹម លាងហេង មានស្រុកកំណើតនៅឃុំជ្រៃវៀន ស្រុកព្រៃឈរ ខេត្តកំពង់ចាម ក្នុងត្រកូលកសិករ មានជីវភាពរស់នៅបែបអ្នកស្រុកស្រែចម្ការទូទៅ មានបងប្អូន៦នាក់។ ទោះស្ថិតក្នុងជីវភាពមិនជាធូរធារ រស់នៅតាមទីជនបទតែលោកអ្នកមានគុណទាំងពីរ តែងប្រៀនប្រដៅឲ្យកូនៗចាប់យកចំណេះវិជ្ជា កុំឲ្យពិបាកហត់ធ្វើស្រែចម្ការហាលក្ដៅហាលភ្លៀង។ នេះក៏ជាមូលហេតុជំរុញឲ្យលោកឈានមកដល់ចំណុចនេះ។
ខុសពីកុមារទូទៅ កាលអាយុ ១០ឆ្នាំ លាងលេង បានទៅរៀនអក្សរ លេខនព្វន្ត ជាមួយព្រះសង្ឃក្នុងវត្តអារាម ដើម្បីក្រេបយកចំណេះវិជ្ជាទាំងផ្នែកពុទ្ធចក្រ និងអាណាចក្រ។ មួយឆ្នាំក្រោយមកយុវជន មានចិត្តអំណត់រូបនេះ ក៏បានបួសជាព្រះសង្ឃដើម្បីបន្តការសិក្សាទាំងភាសាខ្មែរចំណេះទូទៅ និងភាសាអង់គ្លេស ភាសាថៃ។
វយវឌ្ឍនាការដល់ពេញវ័យក្នុងឆ្នាំ ២០០១ លាងហេង បានលាចាកសិក្ខាបទ និងចាកចេញពីស្រុកកំណើតមកផ្សងព្រេងមករស់នៅទីក្រុងភ្នំពេញជាលើកដំបូងក្នុងជីវិតរបស់ខ្លួន និងតាំងចិត្តថា ត្រូវតែរៀនឲ្យចេះច្រើនភាសា ហើយនាំភាពជោគជ័យជូនខ្លួនឯង គ្រួសារទាល់តែបាន។ និស្សិតទូទៅតែងរកផ្ទះជួលដើម្បីស្នាក់នៅ ប៉ុន្តែលាងហេង បានទៅស្នាក់នៅវត្តនាគវ័ន្ត និងបានបន្តការសិក្សាថ្នាក់បរិញ្ញាបត្រនៅសាកលវិទ្យាល័យន័រតុនផ្នែកព័ត៌មានវិទ្យា។
រៀបរាប់បន្តទៀតទាំងទឹកមុខដ៏ស្រទន់ លាងហេង ប្រាប់ថា ដើម្បីមានលុយបង់ថ្លៃសាលាលោកត្រូវធ្វើការសព្វគ្រប់បែបយ៉ាង តាំងអ្នករត់តុក្នុងហាង ក្នុងរង្គសាលរាត្រី ធ្វើយ៉ាងណាឲ្យតែបានលុយ ទោះហត់នឿយប៉ុណ្ណាក៏លែងគិតដែរ។ ជាអ្នកធ្វើការកំប៉ិកកំប៉ុក និងជាកូនសិស្សលោកផងនោះ លោកទទួលពាក្យសម្ដីមើលងាយពីអ្នកមានទ្រព្យធនមួយចំនួន មានលុយចាយពេញៗដៃ តែបែរជាមិនឲ្យតម្លៃអ្នកក្រខ្សត់ទូទៅ ក៏ដូចជារូបលោកផ្ទាល់។
នេះហើយជាហេតុផលដ៏សំខាន់បំផុត ដែលធ្វើឲ្យលោកតាំងចិត្តតស៊ូរៀនរហូតចេះជាច្រើនភាសា និងជារឿងមួយដែលលោកមិនអាចបំភ្លេចបានអស់មួយជីវិត។ មកដល់បច្ចុប្បន្ន លាងហេង អរគុណចំពោះការឈឺចាប់កន្លងមក អរគុណការមើលងាយ ការបន្ទាប់តម្លៃពីមនុស្សទាំងនោះ ទើបជំរុញឲ្យលោកតស៊ូប្រឹងប្រែងពោរពេញដោយកម្លាំងចិត្ត និងថាមពល រហូតជោគជ័យដូចសព្វថ្ងៃនេះ។
រំលឹកទៅប្រវត្តិសិក្សាបន្តិច អំឡុងពេលរៀននៅសាកលវិទ្យាល័យ និងពេលធ្វើការ លាងហេង តែងឆ្លៀតរៀនភាសាបរទេសជាច្រើន តាមគ្រប់មធ្យោបាយទាំងបង់លុយរៀនផង ទាំងសុំគេរៀនផង។ មកដល់បច្ចុប្បន្ន នឹម លាងហេង ចេះ១៦ភាសាដូចជា៖ ថៃ អង់គ្លេស កូរ៉េ ចិន ជប៉ុន បារាំង វៀតណាម ឡាវ អេស្ប៉ាញ រុស្ស៊ី ព័រទុយហ្គាល់ ឥណ្ឌូណេស៊ី ម៉ាឡេស៊ី អារ៉ាប ឥណ្ឌា។
ឆ្លងកាត់ប្រវត្តិតស៊ូលំបាករាប់មិនអស់តាំងពីកុមារភាពមក អ្វីដែលលោកទទួលបានក៏មិនធម្មតាដែរ លោកអាចរកប្រាក់ចំណូលខ្ពស់ក្នុងមួយខែៗ អាចមានលទ្ធភាពជួយដល់គ្រួសារ ជាពិសេសកិត្តិយសមុខមាត់ខ្ពង់ខ្ពស់ក្នុងសង្គម។ ក្លាយជាមនុស្សដ៏រឹងមាំបំផុត ទោះជួបបញ្ហាធំប៉ុណ្ណាក៏អាចឆ្លងកាត់បាន ហើយថែមទាំងបានផ្ទេរចំណេះដឹងភាសាបរទេសទាំងនោះដល់កូនខ្មែរជំនាន់ក្រោយ តាមរយៈការបង្រៀនសឹងតែគ្មានម៉ោងសម្រាកទៀតផង។ មកដល់ពេលនេះ លាងហេង ក៏កំពុងបន្តការសិក្សាថ្នាក់បណ្ឌិត បន្ទាប់ពីចប់ថ្នាក់បរិញ្ញាបត្រ និងថ្នាក់អនុបណ្ឌិតមកពីប្រទេសថៃ៕
ចង់ដឹងរឿងពាក់ព័ន្ធជាមួយវិធីសាស្ត្រសិក្សារហូតចេះ១៦ភាសា សូមចុចអានអត្ថបទនេះ៖ អស្ចារ្យបំផុត! កូនខ្មែរចេះ១៦ភាសា ហើយសុទ្ធតែអាចប្រើការបាន(មានវីដេអូ)