អ្នកគាំទ្រផ្ទុះកំហឹងខ្លាំងក្រោយអ្នកកាសែតម្នាក់ផ្សាយថា BIGBANG បែកបាក់គ្នា

2017-12-28 05:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ដាញសារព័ត៌មានរបស់ប្រទេសកូរ៉េមួយបានផ្សព្វផ្សាយពាក្យចចាមអារ៉ាមថាក្រុមចម្រៀង Big Bang កំពុងប្រឈមនឹងភាពពិបាកក្នុងការរស់នៅជាមួយគ្នា។

បើតាមអ្នកកាសែត Kim Yena របស់ TV Report បានឲ្យដឹងថា មានពាក្យចចាមអារ៉ាមថាក្រុមតារាចម្រៀងជើងចាស់ដែលដើរលើវិថីនេះអស់រយៈពេល ១២ឆ្នាំហើយមកនោះកំពុងតែឈានទៅរកការបែកបាក់គ្នាបន្តិចម្ដងៗហើយ។

អ្នកកាសែតដដែលបានលើកបញ្ហាដែលពាក់ព័ន្ធជាច្រើនមានដូចជា ការចូលបម្រើក្នុងជួរទាហានទាហានរបស់សមាជិកក្រុមនីមួយៗ រឿងតារាចម្រៀង T.O.P ប្រើប្រាស់គ្រឿងញៀន រឿងគម្រោងរៀបការរបស់តារាចម្រៀងTaeyang និងហេតុផលជាច្រើនផ្សេងទៀត។

ដោយឡែកថ្មីៗនេះ ពាក្យចចាមអារ៉ាមទាំងនោះកាន់តែខ្លាំងក្លាឡើង ខណៈតារាចម្រៀង G-Dragon កំពុងតែពង្រីកមុខជំនួញរបស់លោក។ ព័ត៌មាននោះបាននិយាយថា មេក្រុម Big Bang រូបនេះបានផ្ដោតខ្លាំងទៅលើម៉ូដសំលៀកបំពាក់របស់លោក ហើយជាញឹកញាប់តែងតែមានការណាត់ជួបជាមួយដៃគូជំនួញរបស់ខ្លួន។ ចំណែកអគារមួយដែលលោកទើបតែទិញនោះក៏ត្រូវបានពូកគេអះអាងថាវាទាក់ទងនឹងមុខជំនួញច្នៃម៉ូដរបស់លោកផងដែរ។ ជាមួយគ្នានេះដែរ សារព័ត៌មាននេះក៏បានផ្សាយពាក់ព័ន្ធនឹងតារាចម្រៀងក្មេងជាងគេប្រចាំក្រុម Seungri ដោយថាលោកក៏ផ្ដោតសំខាន់ទៅលើមុខជំនួញរបស់លោកដូចគ្នា។ ការពិត តារាចម្រៀងរូបនេះ តែងតែបង្ហោះរូបហាងលក់ Ramen របស់ខ្លួននៅលើបណ្ដាញសង្គមជាញឹកញាប់។

ចំពោះ តារាចម្រៀង Daesung និង Taeyang វិញ ពួកគេបានលើកហេតុផលថា តារាទាំង២រូបនេះមានគម្រោងផ្ដោតសំខាន់ទៅលើការច្រៀងចម្រៀងទោលរបស់ខ្លួន។ Daesung កំពុងទទួលបានប្រជាប្រិយភាពខ្លាំងក្នុងប្រទេសជប៉ុន ខណៈ Taeyang បានប្រកាសពីពេលវេលារៀបការរបស់លោកជាមួយតារាសម្ដែង Min Hyo Rin កាលពីពេលថ្មីៗនេះ។ បូករួមតារាចម្រៀងរូបនេះ ក៏បានត្រៀមខ្លួនក្នុងការចូលបម្រើជាតិនៅដើមឆ្នាំក្រោយនេះផង។ ចុងក្រោយគេគឺ តារាចម្រៀង T.O.P លោកត្រូវបានហាមមិនឲ្យបម្រើកិច្ចការអ្វីគ្រប់យ៉ាងក្នុងរយៈពេលប៉ុន្មានឆ្នាំខាងមុខនេះដោយសារតែរឿងរ៉ាវរបស់លោកទាំងប៉ុន្មាននោះ។ ដោយសារតែហេតុផលទាំងនេះហើយ ទើបសារព័ត៌មានខាងលើនេះ អះអាងថាសមាជិករបស់ក្រុមនេះនីមួយៗ ពិតជាមានការពិបាកក្នុងការធ្វើការងារជាក្រុមនៅពេលអនាគតនោះ។

យ៉ាងណាក៏សារព័ត៌មាននេះ បានលើកហេតុផលមួយដែលថាមានសមាជិកខ្លះពិតជាមិនចង់ឲ្យក្រុមមួយនេះបែកបាក់នោះទេ ប៉ុន្តែដោយសារតែកត្តាដែលមិនអាចចៀសរួចទាំងនេះ ទើបធ្វើឲ្យពួកគេគ្មានជម្រើសគឺត្រូវសម្រេចដើរផ្លូវរៀងខ្លួន។

ក្រោយពីព័ត៌មាននេះបានផ្សព្វផ្សាយនោះ អ្នកគាំទ្រមានការខឹងសម្បាជាខ្លាំងដោយថាសារព័ត៌មាននេះផ្សព្វផ្សាយព័ត៌មានមិនពិត។ ក្នុងនោះដែរមានមនុស្សម្នាក់បានបញ្ចេញយោបល់ថា៖ "ដូចដែលបានគិតមែន ព័ត៌មាននេះសរសេរដោយ Kim Yena (សើច) ហេតុអីនាងមិននៅបន្តលើកជើង SM និងឈប់រើសអើងYG ទៅ? ហើយហេតុផលឆ្កួតអីដែលនិយាយថា Big Bang បានបែកបាក់ក្រុមនោះ? បើសិនជាអ្នកទាំងអស់គ្នាមើលអត្ថបទរបស់ Kim Yena គឺនាងបានរិះគន់ YG ហើយមិនដែលនិយាយអ្វីពាក់ព័ន្ធនឹង SM នោះទេ។ ប្រាកដណាស់ថា Big Bang នឹងមិនបែកបាក់គ្នានោះ។ នាងជានរណាដែលមកនិយាយថា Big Bang បែកក្រុមនោះ? នាងឆ្កួតទេមែនទេ? ..” ។

មិនត្រឹមតែមនុស្សម្នាក់នេះទេ អ្នកគាំទ្រផ្សេងទៀតក៏បានរិះគន់សារព័ត៌មាននេះផងដែរ៕

ប្រភព៖ Allkpop ប្រែសម្រួល៖ អន សុភក្ត្រា