វីរបុរសក្លឹប Barca ម្នាក់ប្រកាសចូលនិវត្តន៍ហើយថ្ងៃនេះ
- 2018-01-03 12:37:58
- ចំនួនមតិ 0 | ចំនួនចែករំលែក 0
វីរបុរសក្លឹប Barca ម្នាក់ប្រកាសចូលនិវត្តន៍ហើយថ្ងៃនេះ
ចន្លោះមិនឃើញ
វីរបុរសក្លឹបអ្នកមានបុណ្យ Barcelona អ្នកចាំទី Victor Valdes ក្នុងថ្ងៃនេះ បានប្រកាសចូលនិវត្តន៍ពីពិភពបាល់ទាត់ហើយ។ នេះបើយោងតាមសារព័ត៌មានអង់គ្លេស The Sun។
អតីតអ្នកចាំទីជាតិអេស្ប៉ាញរូបនេះ បានបង្ហោះសារខ្លីក្នុងគណនី Twitter ផ្លូវការរបស់ខ្លួនថា៖ "អរគុណសម្រាប់អ្វីៗគ្រប់យ៉ាង"។ ក្រោយពីបង្ហោះបែបនេះរួច កីឡាកររូបនេះបានធ្វើការលុបចោលនូវគណនីបណ្ដាញទំនាក់ទំនងសង្គមមួយនេះ ហើយក៏បានលុបចោលនូវរូបទាំងអស់នៅក្នុងគណនី Instagram របស់ខ្លួនផងដែរ។
រហូតមកទល់ពេលនេះ មិនទាន់មានប្រភពណាថ្លែងពីមូលហេតុនៃការផ្ដាច់ចេញបណ្ដាញទំនាក់ទំនងសង្គមរបស់អតីតអ្នកចាំទី Valdes ក្រោយពីប្រកាសចូលនិវត្តន៍នេះឡើយ។ ទោះជាយ៉ាងណា កាលពីឆ្នាំ ២០១៥ កីឡាកររូបនេះបានថ្លែងប្រាប់សារព័ត៌មាន RAC1 ថា៖ "នៅពេលដែលខ្ញុំបញ្ចប់អាជីពនេះទៅ ខ្ញុំនឹងចំណាយពេលរបស់ខ្ញុំជាមួយកូនៗរបស់ខ្ញុំ និងបង្ហាត់បង្រៀនពួកគេទាក់ទងនឹងមេរៀននៃជីវិត។ អ៊ីចឹងពេលដែលខ្ញុំចូលនិវត្តន៍ ខ្ញុំសង្ឃឹមថាអ្នកទាំងអស់គ្នានឹងមានភាពលំបាកក្នុងការស្វែងរកខ្ញុំ"។
សូមបញ្ជាក់ផងដែរថា Valdes មានភាពជោគជ័យណាស់ ពេលលេងឲ្យក្លឹបអ្នកមានបុណ្យជាផ្លូវការពីឆ្នាំ ២០០២ ដល់ឆ្នាំ ២០១៤ ដោយក្នុងអំឡុងពេលនេះ កីឡាកររូបនេះ បានឈ្នះពានជាច្រើន។ ក្រោយពីចាកចេញពីក្លឹប អាជីពរបស់Valdes ហាក់មិនសមប្រកបឡើយ។ អតីតអ្នកចាំទីរូបនេះបានទៅចូលរួមជាមួយក្លឹប Manchester United ក្នុងឆ្នាំ ២០១៥ តែលេងនៅទីនោះបានតែ ២ប្រកួតប៉ុណ្ណោះ មុនពេលចេញទៅលេងឲ្យក្លឹបបែលហ្សិក Standard Liege។
នៅពាក់កណ្ដាលឆ្នាំ ២០១៦ Valdes បានទៅលេងឲ្យក្លឹប Middlesbrough មុនពេលបញ្ចប់កុងត្រាជាមួយក្លឹប ពេលក្លឹបមួយនេះ បានធ្លាក់ទៅលីគលំដាប់ពីររបស់អង់គ្លេសកាលពីពាក់កណ្ដាលឆ្នាំ ២០១៧ ហើយអតីតអ្នកចាំទីរូបនេះអត់មានក្លឹបលេងតាំងពីពេលនោះមក៕