តាមពិតខ្សែការពារថ្លៃជាងគេលើលោក van Dijk ជាអតីតអ្នកលាងចាន

2018-01-04 02:58:42
ចំនួនមតិ 0 | ចំនួនចែករំលែក 0

ចន្លោះមិនឃើញ

Virgil van Dijk បានក្លាយជាខ្សែការពារថ្លៃជាងគេលើលោក ក្រោយរូបគេផ្លាស់ពី Southampton មក Liverpool កាលពីសប្ដាហ៍មុនក្នុងតម្លៃ៧៥លានផោន ប៉ុន្តែប្រហែលគ្រប់គ្នាមិនដឹងទេ កាលពីមុនគេគ្រាន់តែជាយុវជនលាងចាន ឆ្នាំងមួយរូបប៉ុណ្ណោះ។

មកដល់ហង្សក្រហម van Dijk ទទួលបាន១០លានផោនក្នុងមួយឆ្នាំ។ តែកាលពី១០ឆ្នាំមុនពេលអាយុ១៦ឆ្នាំ កីឡាករហូឡង់នេះគឺជាអ្នកលាងចាននៅភោជនីយដ្ឋានមួយកន្លែង។ កីឡាករវ័យ២៦ធ្លាប់ធ្វើការនៅក្នុងផ្ទះបាយនៅភោជនីយដ្ឋានឈ្មោះ Oncle Jean មានទីតាំងនៅប្រទេសហូឡង់ ដែលមានម្ចាស់ហាងឈ្មោះ Jacques Lips។ គ្រានោះ Lips ធ្លាប់ប្រាប់ឲ្យ van Dijk ឈប់ស្រមៃជាកីឡាករបាល់ទាត់។

“van Dijk ធ្លាប់ជាបុគ្គលិកល្អម្នាក់។ គេលាងចានស្អាត និងធ្វើការបានល្អ។ គេប្រឹងប្រែងហ្វឹកហាត់ខ្លាំងណាស់ ដើម្បីក្លាយជាកីឡាករបាល់ទាត់អាជីព និងបានចូលរួមជាមួយក្រុមយុវជនមួយនៅហូឡង់ឈ្មោះថា Willem II។ ក្រោយចប់ការងារឪពុកគេតែងមកទទួលគេ។ ជារឿយៗខ្ញុំតែងប្រាប់គេថា គួរតែលាងឆ្នាំឲ្យច្រើនទៅ ហើយកុំព្យាយាមក្លាយជាកីឡាករអាជីពអីទៀតទៅ"។ សម្ដី Lips ប្រាប់ The Mirror។

មិនខ្វល់ពីសម្ដីអ្នកដទៃ ក្ដីស្រមៃរបស់ van Dijk ពិតជាដើរទៅមុខ។ នៅឆ្នាំ២០១១ គេបានក្លាយជាកីឡាករអាជីព លេងឲ្យក្រុម Groningen លេងក្នុងលីគកំពូលហូឡង់។ រហូត២០១៣ គេក៏បានផ្លាស់មក Celtic តម្លៃខ្លួនត្រឹម២,៦លានផោនទេ បន្ទាប់មកក៏ពុះពារមកដល់ដីអង់គ្លេសលេងឲ្យក្រុម Southampton និងបានក្លាយជាកីឡាកររបស់ Liverpool ក្នុងឆ្នាំ២០១៨នេះ៕