រឿងរ៉ាវពីក្រោយសេដ្ឋី YouTube ដែលបានចេញវីដេអូសុំទោសពិភពលោក
- 2018-01-04 23:30:00
- ចំនួនមតិ 0 | ចំនួនចែករំលែក 0
រឿងរ៉ាវពីក្រោយសេដ្ឋី YouTube ដែលបានចេញវីដេអូសុំទោសពិភពលោក
ចន្លោះមិនឃើញ
ចូលដល់ឆ្នាំ ២០១៨ ភ្លាម Logan Paul ក៏ជួបប្រទះបញ្ហាភ្លែតទាក់ទងនឹងការបង្ហោះវីដេអូបង្ហាញពីសាកសពបុរសម្នាក់ចងកក្នុងព្រៃនៅឯប្រទេសជប៉ុន រហូតដល់មានការបញ្ចេញវីដេអូសុំទោសថែមទៀតផង។ រឿងរ៉ាវដ៏ក្ដៅគគុកបែបនេះ ច្បាស់ជាមានមនុស្សជាច្រើនចង់ដឹងកាន់តែជាក់ច្បាស់ថា Logan Paul ជានរណា?
Logan Paul មានឈ្មោះពិតថា Logan Alexander Paul កើតនៅថ្ងៃទី ១ ខែមេសា ឆ្នាំ ១៩៩៥ ក្នុងរដ្ឋ Ohio សហរដ្ឋអាមេរិក។ Logan បានចាប់ផ្ដើមបង្កើតវីដេអូអ៊ីនធឺណិតសម្រាប់គណនី YouTube ឈ្មោះ Zoosh តាំងពីអាយុ ១០ ឆ្នាំមកម្ល៉េះ។
ប៉ុន្តែគាត់ទើបទទួលបានការចាប់អារម្មណ៍ដំបូងនៅឆ្នាំ ២០១៤ តាមរយៈការបង្កើតវីដេអូបង្ហោះលើ សេវាកម្មវីដេអូ Vine រួមទាំងការបង្កើតវីដេអូបង្ហោះលើបណ្ដាញទំនាក់ទំនងដទៃដូចជា Facebook, YouTube ជាបន្តបន្ទាប់។ Jake Joseph Paul គឺជាប្អូនប្រុសបង្កើតរបស់ Logan ដោយគេក៏ជាតារា YouTube និងជាអ្នកបង្កើតវីដេអូ Vine មួយរូបដែរ។
ក្រៅពីជាបុគ្គលល្បីលើបណ្ដាញទំនាក់ទំនងធំៗ Logan ក៏បានចូលប្រឡូកក្នុងវិស័យភាពយន្តដោយនៅឆ្នាំ ២០១៤ បានចូលរួមសម្ដែងរឿងខ្លីចំណងជើងថា "Rainbow Man” និងដើមឆ្នាំ ២០១៥ បានបង្ហាញមុខលើទូរទស្សន៍តាមរយៈខ្សែភាពយន្តជាស៊េរី Law & Order: Special Victims Unit។
នៅឆ្នាំ ២០១៥ គេបានចាត់ថ្នាក់ Logan ជាបុគ្គលមានឥទ្ធិពលលំដាប់ថ្នាក់ទី ១០ នៅលើសេវាកម្ម Vine ដោយវីដេអូរយៈពេល ៦ វិនាទីរបស់គាត់ អាចរកចំណូលបានរាប់ពាន់ដុល្លារតាមរយៈការជួលផ្សាយពាណិជ្ជកម្ម។ ក្នុងឆ្នាំដដែល នៅខែតុលា វីដេអូទាំងអស់លើទំព័រ Facebook របស់ Logan មានចំនួនទស្សនាដល់ ៣០០ លានដង។
នៅថ្ងៃទី ១៨ ខែឧសភា ឆ្នាំ ២០១៧ ជាពេលដែល Logan Paul ប្រឡូកជាអ្នកចម្រៀងជាផ្លូវការជាមួយនឹងបទចម្រៀងមានចំណងជើងថា "Help Me Help You” ដែលបច្ចុប្បន្នមានអ្នកទស្សនា ១៧៣ លានដង។
រៀបនឹងបញ្ចប់ឆ្នាំ ២០១៧ គឺនៅថ្ងៃទី ៣១ ខែធ្នូ ឆ្នាំ ២០១៧ ជាពេលដែល Logan Paul ជួបប្រទះរឿងអាស្រូវដំបូង ដោយបានបង្ហោះវីដេអូបង្ហាញពីសាកសពបុរសចងកក្នុងព្រៃនៅឯប្រទេសជប៉ុន នៅលើគណនី YouTube របស់ខ្លួន។ ដោយសារតែមានការវាយប្រហារខ្លាំងពេក Logan ក៏បានសម្រេចចិត្តដកវីដេអូនោះចេញនៅប៉ុន្មានម៉ោងបន្ទាប់។
បន្ទាប់ពីលុបរួច Logan ក៏បានបញ្ចេញសារសុំទោសនៅលើគណនី Twitter របស់ខ្លួននៅថ្ងៃទី ១ ខែមករា ឆ្នាំ ២០១៨។ បន្ទាប់មកទៀតនៅថ្ងៃទី ៣ ខែមករា វីដេអូសុំទោសមួយក៏បានលេចឡើងលើគណនី YouTube ឈ្មោះ Logan Paul Vlogs ដែលមានសម្ដែងនូវការសុំទោសដល់មហាជន និងសុំទោសដល់ជនរងគ្រោះ រួមទាំងក្រុមគ្រួសាររបស់ជនរងគ្រោះ។
គិតត្រឹមបច្ចុប្បន្ននេះគណនី YouTube របស់ Logan មាន Subscriber ចំនួន ១៥,៣៧ លាន ដោយមិនបានធ្លាក់ចុះឡើយត្បិតថាជួបបញ្ហាខាងលើមែនពិត។ ចំណែកគណនី YouTube ផ្លូវការមួយទៀតឈ្មោះ TheOfficialLoganPaul ប្រើសម្រាប់បង្ហោះចម្រៀង និងខ្សែភាពយន្តមាន Subscriber ចំនួន ៤,៣ លាននាក់។
ផ្អែកតាមការចេញផ្សាយរបស់ទស្សនាវដ្ដី Forbes បង្ហាញថា Logan Paul ជាបុគ្គលជាប់ចំណាត់ថ្នាក់លេខ ៤ ដែលរកចំណូលបានច្រើនជាងគេពី YouTube នៅឆ្នាំ ២០១៧ ដោយរកបាន ១២,៥ លានដុល្លារ។ ចំណែក Jake Paul ដែលជាប្អូនប្រុសបង្កើតវិញរកចំណូលបាន ១១,៥ លានដុល្លារ នៅចំណាត់ថ្នាក់លេខ ៧៕