ពាក់កណ្តាលខែនេះ PNN នឹងប្តូរម៉ោងចាក់ផ្សាយរឿងភាគថៃហើយ

2018-01-05 09:40:49
ចំនួនមតិ 0 | ចំនួនចែករំលែក 0

ចន្លោះមិនឃើញ

PNN នឹងផ្លាស់ប្តូរម៉ោងចាក់ផ្សាយភាពយន្តភាគថៃ ពីម៉ោង ៦ ល្ងាចទៅចាក់ផ្សាយនៅម៉ោង ១១ ថ្ងៃត្រង់វិញ រៀងរាល់ថ្ងៃចន្ទដល់ សុក្រ ហើយក៏មានបន្ថែមការចាក់ផ្សាយរឿងភាគថៃនៅម៉ោង ១២ ថ្ងៃត្រង់ផងដែរ ដើម្បីបំពេញតម្រូវការរបស់ទស្សនិកជនដែលចង់ទស្សនាភាគថៃ។

កញ្ញា ទូច បុប្ផា ប្រធានគ្រប់គ្រងកម្មវិធីទូរទស្សន៍ PNN បានឲ្យដឹងថា៖ “បន្ទាប់ពីស្ទាបស្ទង់ពីទស្សនិកជន បានឲ្យដឹងថាមានការគាំទ្រ និងតាមដានរឿងភាគនៅ PNN កើនឡើងគួរឲ្យកត់សម្គាល់ ដូច្នេះទើបយើងសម្រេចប្តូរ និងបន្ថែមម៉ោងផ្សាយ ដែលចាប់ផ្តើមនៅពាក់កណ្តាលខែមករា នេះ"។

កញ្ញាបន្ថែមថា រឿងភាគដែលត្រូវចាក់ផ្សាយនៅឆ្នាំថ្មីនេះ សុទ្ធតែជារឿងល្បី ពេញនិយមនៅថៃ ដែល PNN បានសិទ្ធិផ្តាច់មុខពីទូរទស្សន៍ប៉ុស្តិ៍លេខ ៣ ថៃ។

រឿងដំបូងដែលត្រូវចាក់ផ្សាយនៅម៉ោងថ្ងៃត្រង់នេះ មានចំណងជើងថា "ចុងភៅកំលោះ" ដែលសម្តែងដោយលោក Louis Scott (Louis) និងកញ្ញា Ranida Techasit (Preem) ហើយជាប្រភេទរឿងមនោសញ្ចេតនា លាយឡំនឹងកំប្លែង។ រឿងនេះ មានផ្សាយរៀងរាល់ថ្ងៃ ចន្ទ ដល់ សុក្រ វេលាម៉ោង ១២ ដល់ ១ រសៀល ចាប់ពីថ្ងៃទី ១១ មករា នេះ។

ឯរឿងទី២ "ផ្ការីកក្នុងភ្លើង" គឺជាប្រភេទរឿងបែបមនោសញ្ចេតស្នេហាខុសវណ្ណៈ សម្តែងដោយលោក Warit Sirisantana (Mai) និងកញ្ញា Nittha Jirayungyurn (Mew) នឹងចាក់ផ្សាយរៀងរាល់ថ្ងៃ ចន្ទ ដល់ សុក្រ វេលាម៉ោង ១១ ដល់ ១២ ថ្ងៃត្រង់ ចាប់ពីថ្ងៃទី ២៦ មករា នេះ តទៅ។

ចង់ដឹងថាសាច់រឿងល្អមើលយ៉ាងណា កុំភ្លេចតាមដានលើ PNN ពីម៉ោង ១១ ថ្ងៃត្រង់ ដល់ម៉ោង ១ រសៀល។ តាមដានព័ត៌មានពីរឿងភាគ PNN សូមចូលផេក PNNDramaFanClub ៕

ដោយ៖ ថា ម៉ាលីដា