អេតវីន បកស្រាយរឿង កូនឥតខាន់ស្លាជាមួយ ឡុង ថាវរី

2018-01-08 09:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងលោក អែតវីន កាលពីពេលថ្មីៗនេះ បានបង្ហោះសារលើបណ្ដាញសង្គមធ្វើឲ្យមហាជនភ្ញាក់ផ្អើលជាខ្លាំង ដោយលោកបានសារភាពថា ខ្លួនបានធ្វើឲ្យតារាសម្ដែងស្រី កញ្ញា ឡុង ថាវរី មានផ្ទៃពោះ ទាំងមិនបានរៀបការជាមួយគ្នា។ តារាប្រុសសាច់ដុំរូបនេះ បានអះអាងថា ការបង្ហោះសារលើ Facebook កាលពីពេលកន្លងទៅ គ្រាន់តែជាការសម្ដែងប៉ុណ្ណោះ លោកនិង កញ្ញា ឡុង ថាវរី មិនមានទំនាក់ទំនងស្នេហាជាមួយគ្នាឡើយ។

កាលពីប៉ុន្មានថ្ងៃមុនលោក អេតវីន បានបង្ហោះសារអមដោយរូបថតជាច្រើនសន្លឹកជាមួយ តារាស្រី ឡុង ថាវរី ថា «អរគុណមួយឆ្នាំដែលមនុស្សម្នាក់បានផ្តល់នូវការស្រឡាញ់ភាពកក់ក្តៅ ភាពអត់ឱន លើកលែងទោសនិងអធ្យាស្រ័យយល់ពីខ្ញុំគ្រប់យ៉ាង មិនថាខ្ញុំខុសខ្ញុំអាក្រក់យ៉ាងណានាងនៅតែអធ្យាស្រ័យដល់ខ្ញុំនាងហត់ហើយដែលរយៈពេលមួយឆ្នាំជាសង្សារខ្ញុំតែពេលនេះចង់និយាយថា អូនលែងជាសង្សារបងទៀតហើយបងសុំប្តូរមកនាមជាប្រពន្ធបានទេរីករាយគម្រប់ថ្ងៃខួបមួយឆ្នាំដែលពួកយើងស្រឡាញ់គ្នានិងជាថ្ងៃដែលអូនបានផ្តល់កាដូធំបំផុតចុងឆ្នាំសម្រាប់បងនៅឆ្នាំថ្មីនេះពាក្យថាប៉ា ប៉ា បងសប្បាយចិត្តណាស់ដឹងទេរកអ្វីមកនិយាយមិនស្មើអរគុណមែនទែនប្រពន្ធសម្លាញ់បងស្រឡាញ់អូនណាស់តែពេលនេះស្រឡាញ់កូនជាងអូនហើយណា »។

ក្រោយបង្ហោះមិនបានប៉ុន្មានផង តារាប្រុសរូបនេះក៏បានលុបចោល ធ្វើឲ្យមហាជនម្នាចម្ងល់គ្រប់ៗគ្នា។ ក្នុងជំនួបជាមួយSabay អេតវីន បានបកស្រាយថា សារដែលខ្លួនបង្ហោះនៅ គឺជាសកម្មភាពថតស្ប៉តអប់រំមួយ ដោយនៅក្នុងឈុតវីដេអូនោះ លោកនិង កញ្ញា ឡុង ថាវរី គឺជា ប្ដីប្រពន្ធនឹងគ្នា ហើយការបង្ហោះលើបណ្ដាញសង្គមនោះ ក៏ទាមទារការចាប់អារម្មណ៍ និង យកមកកាត់ចូលក្នុងវីដេអូស្ប៉តអប់រំនោះដូចគ្នា។

"គេឆ្ងល់គ្រប់គ្នាហ្នឹងបង មានគេខ្ញុំថតស្ប៉តអប់រំជាមួយគាត់តើ អត់មានកូនចៅអីជាមួយគ្នាទេ អាពាក្យពេចន៍ខ្ញុំបង្ហោះហ្នឹងក៏គេយកបញ្ចូលក្នុងស្ប៉តអប់រំ ឃើញទេ ខ្ញុំបង្ហោះភ្លាម ខ្ញុំលុបចោលវិញ ហ្នឹង" អេតវីន ថ្លែងបញ្ជាក់។

បែបនេះក្ដី លោក អែត វីន មិនបានបញ្ជាក់ថា វីដេអូស្ប៉តអប់រំនោះ ថតឲ្យអង្គការមួយណា មានខ្លឹមសារបែបណាឡើយ ដោយលោកសូមលាក់សិន រង់ចាំចេញផ្សាយទស្សនិកជននឹងច្បាស់ក្នុងភ្នែកជាក់ជាមិនខាន។ លោក បានបញ្ជាក់ថា រវាងលោកនិង កញ្ញា ឡុង ថាវរី មិនជាប់ពាក់ព័ន្ធស្នេហាជាមួយគ្នាឡើយ លោកបានស្គាល់នាង តែពេលថតស្ប៉តតែប៉ុណ្ណោះ ក្រោយពីថតរួច ក៏ឈប់មានទំនាក់ទំនងជាមួយតែម្ដងទៅ។ បច្ចុប្បន្ន លោកថា មិនទាន់មាន នារីណាម្នាក់ជា ម្ចាស់បេះដូងលោកនៅឡើយទេ៕

អត្ថបទ៖ ស៊ុនហួត