កូនដំរីព្រៃមួយក្បាលស្លាប់ដោយសារផុងរណ្តៅដីនៅមណ្ឌលគិរី

2018-01-09 06:19:39
ចំនួនមតិ 0 | ចំនួនចែករំលែក 0

ចន្លោះមិនឃើញ

កូនដំរីព្រៃអាយុប្រមាណជាមួយឆ្នាំត្រូវបានក្រុមអភិរក្សប្រទះឃើញថាស្លាប់នៅក្នុងដែនអភិរក្សសត្វព្រៃកែវសីមា ខេត្តមណ្ឌលគិរី ដោយផុងខ្លួនជាប់នៅក្នុងរដៅមួយក្នុងព្រៃ។

អង្គការសមាគមអភិរក្សសត្វព្រៃប្រកាសឲ្យដឹងនៅថ្ងៃនេះកូនសត្វដំរីព្រៃនេះទំនងជាបានស្លាប់កាលបពីយប់ថ្ងៃទី៧ ខែមករា ឆ្នាំ២០១៨ បន្ទាប់ពីបានជាប់ផុងក្នុងរណ្តៅដីជាច្រើនថ្ងៃ។ បើតាមប្រភពដដែលកន្លែងដែលកូនដំរីព្រៃនេះស្លាប់គឺនៅកណ្តាលព្រៃជ្រៅ ហើយក្រុមអភិរក្សមិនបានទទួលដំណឹងនេះទាន់ពេល។

(ក្រុមមន្ត្រីកំពុងជួយយកសពកូនដំរីព្រៃចេញពីរណ្តៅ/រូបភាព៖WCS)

អង្គការដដែលសរសេរថា៖ «យើងពិតជា សោកស្តាយខ្លាំងណាស់ដែលមិនអាចជួយសង្រ្គោះកូនដំរីឈ្មោលមួយនេះ ពីព្រោះទីតាំងកើតហេតុស្ថិតនៅក្នុងព្រៃជ្រៅ ហើយពួកយើងពុំទទួលបាន ព័ត៌មានទាន់ពេល។ តាមការអង្កេតនៅកន្លែងកើតហេតុ កូនដំរីព្រៃនេះ ប្រហែលបានជាប់ផុងរយៈពេលជាច្រើនថ្ងៃមកហើយ ហើយវាប្រហែល ជាបានស្លាប់កាលពីយប់ថ្ងៃទី៧ ខែមករា មកម្លេះ»។

សត្វដំរីព្រៃស្ថិតនៅក្នុងចំណោមថនិកសត្វមានមាឌធំជាងគេបង្អស់នៅលើភពផែនដី។ សត្វប្រភេទនេះស្ថិតនៅក្នុងបញ្ជីក្រហមរបស់អង្គការIUCN ជាប្រភេទ រងគ្រោះជិតផុតពូជនៅលើសកលលោក។ តាមការប៉ាន់ស្មានដំរីព្រៃមានចំនួនចន្លោះពី២៥០ទៅ៥០០ក្បាលកំពុងរស់នៅក្នុងប្រទេសកម្ពុជា ក្នុងនោះដំរីព្រៃមានតិចជាង១១៥ក្បាលកំពុងមានវត្តមានរស់នៅក្នុងដែនជម្រកសត្វព្រៃកែវសីមា។ នេះបើតាមប្រភពដដែល៕

អត្ថបទ៖ ទូច សុខា