តារាស្រីម៉ាឡេស៊ី២រូប រងការរិះគន់ខ្លាំង ពេលនិយាយលេងសើចពី Jonghyun

2018-01-10 03:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រីជនជាតិម៉ាឡេស៊ី Sharifah Sakinah និងJanna Nick កំពុងក្លាយជាប្រធានបទដ៏ក្ដៅគគុកដោយសារតែការនិយាយលេងសើចរបស់ពួកនាងទាក់ទងនឹងអតីតតារាចម្រៀងJonghyun ក្នុង Story លើគណនី Instagram។

បើតាមសារព័ត៌មានបណ្ដាញសង្គមម៉ាឡេស៊ី អ្នកគាំទ្រតារាកូរ៉េប្រចាំប្រទេសនេះមានការអាក់អន់ចិត្តជាមួយតារាស្រីទាំង២រូបនេះ ព្រោះតែវីដេអូក្នុង Instagram របស់នាងបាននិយាយពាក់ព័ន្ធនឹងតារាចម្រៀងJonghyun។ ដូចដែលអ្នកគាំទ្រទាំងអស់បានដឹងមកដល់ពេលនេះ ការស្លាប់របស់តារាចម្រៀងរូបនេះកាលពីខែមុននោះ គឺជាដំណឹងមួយដ៏រន្ធត់ ហើយវានៅតែដក់ជាប់ក្នុងចិត្តអ្នកគាំទ្រជានិច្ច។

វីដេអូ Story ដែលមានរយៈពេល ៨វិនាទី បានបង្ហាញពីតារាសម្តែង Janna Nick កំពុងប្ដូរពណ៌សក់របស់នាងទៅជាពណ៌ទង់ដែង។ អ្វីដែលបង្កឲ្យកើតមានជាបញ្ហានោះគឺ តារាសម្ដែង Sharifah Sakinah បានសរសេរថានាង Janna Nick ឥឡូវមើលទៅដូចជាJonghyun ណាស់។ ការសរសេរនេះហើយបានធ្វើឲ្យពួកគេទាំង២នាក់សើច។ ជាងនេះទៅទៀត បើតាមអ្នកគាំទ្របានឲ្យដឹងថា តារាសម្ដែង Sharifah Sakinah បាននិយាយបញ្ជាក់ទៀតថា៖ "ម្នាក់ដែលស្លាប់ហ្នឹង មែនទេ?”

ប្រជាជនម៉ាឡេស៊ីបាននិយាយថាការនិយាយលេងសើចនេះវាពិតជាមិនសមរម្យ ហើយនឹងគ្មានការគោរព។ ក្រោយមក តារាសម្ដែង Janna Nick បានសុំទោសលើគណនី Twitter របស់នាង ដោយអះអាងថានាងមិនបានចាប់អារម្មណ៍ចំពោះSharifah Sakinah នោះទេ ហើយគ្រាន់តែសើចលេងតាមនាងតែប៉ុណ្ណោះ៕

ប្រភព៖ Allkpop ប្រែសម្រួល៖ អន សុភក្ត្រា