បច្ចេកវិទ្យាថ្មី EyeSight របស់ Subaru ធ្វើឲ្យអ្នកបើកបរកាន់តែមានសុវត្ថិភាព
- 2018-01-13 04:45:35
- ចំនួនមតិ 0 | ចំនួនចែករំលែក 0
បច្ចេកវិទ្យាថ្មី EyeSight របស់ Subaru ធ្វើឲ្យអ្នកបើកបរកាន់តែមានសុវត្ថិភាព
ចន្លោះមិនឃើញ
ក្រុមហ៊ុន ម៉ូធ័រអ៊ីម៉េជ ជាអ្នកចែកចាយផ្តាច់មុខរថយន្ត Subaru ក្នុងប្រទេសចំនួន ៩ នៅទ្វីបអាស៊ី បានបង្ហាញបច្ចេកវិទ្យាថ្មីបំផុត Subaru EyeSight ក្នុងកម្មវិធី Singapore Motorshow ឆ្នាំ ២០១៨។
EyeSight ជាបច្ចេកវិទ្យាបំពាក់បន្ថែមលើបច្ចេកវិទ្យាស្នូល ដែលមានស្រាប់របស់ Subaru ដូចជា Boxer Engine, Symmetrical All-Wheel Drive និង Global Platform ដើម្បីបង្កើនសុវត្ថិភាពថែមមួយកម្រិតទៀត។
លោក Glenn Tan អគ្គនាយកក្រុមហ៊ុន តាន់ ចុង អ៊ីនធឺណេសិនណល (ក្រុមហ៊ុនមេរបស់ ម៉ូធ័រអ៊ីម៉េជ) បានមានប្រសាសន៍ថា ៖ “យើងមានសេចក្ដីសោមនស្សជាខ្លាំង ដោយបានបង្ហាញបច្ចេកវិទ្យាថ្មីដែលជាប់ចំណាត់ថ្នាក់របស់ Subaru គឺប្រព័ន្ធកាមេរ៉ា EyeSight ក្នុងកម្មវិធី Singapore Motorshow 2018 នាថ្ងៃនេះ។ EyeSight ត្រូវបានបំពាក់បន្ថែមលើបច្ចេកវិទ្យាស្នូលរបស់ Subaru ដែលកំពុងមានបច្ចុប្បន្ន បន្ថែមកញ្ចប់បច្ចេកវិទ្យាកាន់តែទាក់ទាញទៅដល់អតិថិជនទាំងឡាយ ដែលត្រូវការរថយន្តមានបទដ្ឋានសុវត្ថិភាពខ្ពស់ កម្លាំងខ្លាំងក្នុងការបើកបរ និង ផាសុកភាពរបស់រថយន្ត"។
EyeSight ប្រើប្រាស់ Stereo Camera ដើម្បីកំណត់រថយន្តបើកបរជុំវិញ កំណត់ឧបសគ្គនានា គំនូសផ្លូវ និង កត្តាផ្សេងៗ បន្ថែមទំនុកចិត្តរាល់ការបើកបរ។ នៅក្នុងស្ថានភាពជាក់លាក់មួយ ប្រព័ន្ធនេះនឹងអនុវត្តដោយចាប់ហ្វ្រាំង រឺក៏បន្ថយហ្គែរ ដើម្បីកាត់បន្ថយគ្រោះថ្នាក់ផ្សេងៗ។
មុខងារសំខាន់ៗទាំង ៦ របស់ EyeSight រួមមាន ៖
១. Pre-Collision Braking ៖ ផ្ដល់សញ្ញាអាសន្នដល់អ្នកបើកបរ ដោយមានលោតជាសំឡេង និង ភ្លើងសញ្ញាក្នុងតាប្លូ។ ប្រសិនបើអ្នកបើកបរបាត់បង់ការប្រុងប្រយ័ត្ន ប្រព័ន្ធនេះនឹងជាន់ហ្វ្រាំងដោយស្វ័យប្រវត្តិដើម្បីបន្ថយគ្រោះថ្នាក់ រឺបញ្ចៀសការបុក។
២. Adaptive Cruise Control ៖ ក្រៅពីអាចកំណត់ល្បឿនថេរ Adaptive Cruise Control អាចបន្ថែម ឬ បន្ថយល្បឿន ដើម្បីកំណត់គំលាតសុវត្ថិភាពរវាងរថយន្តខាងមុខ និង ភាពខុសគ្នានៃល្បឿនបើកបររថយន្តទាំងពីរ។ វាអាចបន្ថយ ឬ បង្កើនកម្លាំងម៉ាស៊ីន, ប្រអប់លេខ និង បន្ថែមឬបន្ថយកម្លាំងហ្វ្រាំងដើម្បីរក្សាល្បឿនអោយស្របទៅតាមចរាចរណ៍។
៣. Pre-Collision Throttle Management ៖ នៅពេល EyeSight កំណត់បានឧបសគ្គនៅខាងមុខ ពេលអ្នកកំពុងបើកបរ ប្រព័ន្ធនេះនឹងបញ្ចេញសំឡេងខ្លីៗ, បង្ហាញភ្លើងសញ្ញាឡើង និង កាត់ផ្តាច់កម្លាំងម៉ាស៊ីន ដើម្បីបញ្ចៀសការប៉ះទង្គិចនៅខាងមុខ។
៤. Lane Departure Warning ៖ នៅពេលអ្នកបើកបរក្នុងល្បឿន ៥០ គ.ម/ម៉ រឺលឿនជាងនេះ ហើយរថយន្តចេញពីគន្លងដោយពុំមានវាយភ្លើងស៊ីញ៉ូ ប្រព័ន្ធនេះនឹងបញ្ចេញសញ្ញារំលឹកអ្នកមុនពេលអ្នកផ្លាស់ប្ដូរគន្លងរថយន្ត។
៥. Lane Sway Warning ៖ ប្រព័ន្ធនេះអាចផ្ដល់សញ្ញារំលឹក និង ភ្លើងលោតបង្ហាញនៅពេលអ្នកបើកបរងងុយគេង រឺអស់កម្លាំង ដោយប្រព័ន្ធនេះដំណើរពេលបើកបរចាប់ពី ៦០ គ.ម/ម៉ ឡើងទៅ
៦. Lead Vehicle Start Alert ៖ នៅពេលដែលអ្នកឈប់ស្តុប ហើយ EyeSight មើលដឹងថារថយន្តខាងមុខបានបន្តរំកិលទៅមុខ ប្រព័ន្ធនេះនឹងផ្ដល់សញ្ញាដល់អ្នក ដើម្បីឲ្យបន្តដំណើរទៅមុខ ដោយបញ្ចេញជាសំឡេង និង ភ្លើងសញ្ញា។
ដោយឡែកបើក្រឡេកមើលបច្ចេកវិទ្យាស្នូលៗរបស់ Subaru វិញមានចំណុចពិសេសខាងក្រោម ៖
Boxer Engine ៖ បន្ថែមកម្លាំងដល់រថយន្ត Subaru គ្រប់ម៉ូដែល ដែលមានកេរ្តិ៍ឈ្មោះល្បីថាអាចរក្សាលំនឹងរថយន្តបានល្អ ម៉ាស៊ីនដំណើរការរលូន និង បែងចែកកម្លាំងបានល្អ ដោយបច្ចេកវិទ្យានេះមានដំណើរការជាង ៥០ ឆ្នាំមកហើយ។ ម៉ាស៊ីនដែលមានពិស្តុងផ្ដេក កាត់បន្ថយទំនាញ រក្សាលំនឹងពេលបត់រថយន្ត និង បង្កើនលំនឹងរថយន្តគ្រប់ស្ថានភាពផ្លូវ។
Symmetrical All-Wheel Drive ៖ អាចគ្រប់គ្រងដៃចង្កូតបានជាក់លាក់រាល់ពេលបត់ ដោយរក្សាលំនឹងទោះជាស្ថិតក្នុងល្បឿនលឿន ឬ ស្ថានភាពផ្លូវលំបាកៗក្ដី។
Subaru Global Platform ៖ តួរថយន្តជំនាន់ថ្មី ជាការផ្លាស់ប្ដូរថ្មីនៃស្ថាបត្យកម្មរបស់រថយន្ត Subaru បង្កើនសមត្ថភាពដំណើរការ របស់រថយន្តជារួម និង អាចផ្តល់នូវបទពិសោធន៍គ្មានគូប្រៀបជាមួយសុវត្ថិភាពលំដាប់ខ្ពស់។ បន្ថែមពីនេះ តួរថយន្តជំនាន់ថ្មីនេះ អាច បំពាក់ជាមួយរថយន្តសាំង, រថយន្តពាក់កណ្តាលសាំង និង អាគុយ (Hybrid), រថយន្តអេឡិចត្រូនិច និង ប្រភេទរថយន្តប្រើប្រាស់ថាមពលដទៃទៀត។
បច្ចេកវិទ្យាថ្មី EyeSight នឹងត្រូវបំពាក់ជាមួយរថយន្តគ្រប់ម៉ូដែល របស់ ស៊ូបារុ មានដូចជា Subaru Impreza, Legacy, Levorg, Outback និង XV៕