ឈុត សេរីវ៉ាន់ថង យកអ្នកប្រដាល់ល្បី២រូបជាគំរូដើម្បីឈានទៅសម្រេចគោលដៅ

2018-01-11 03:23:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងគុនខ្មែរវ័យក្មេង ឈុត សេរីវ៉ាន់ថង ពេញចិត្តតារាប្រដាល់ល្បីឈ្មោះ ឃីម ឌីម៉ា និង ផល សុភ័ណ្ឌ ដែលនឹងដើរតួនាទីជាគំរូសម្រាប់រូបគេអនុវត្តមាន។

កីឡាករ ឈុត សេរីវ៉ាន់ថង

ឈុត សេរីវ៉ាន់ថង បានឲ្យដឹងថា អនាគតរូបគេចង់ល្បីឈ្មោះដូចជើងខ្លាំង ឃីម ឌីម៉ា ម្ចាស់មេដាយមាសស៊ីហ្គេម និងកីឡាករមកពីខណ្ឌដង្កោ ផល សុភ័ណ្ឌ។ ពួកគាត់ទាំងពីរនាក់ប្រកួតបានល្អនិងមានស្ថិតិកម្រចាញ់។

កីឡាករ ផល សុភ័ណ្ឌ

កីឡាករ ឃីម ឌីម៉ា

កីឡាករវ័យ១៨ឆ្នាំរូបនេះបន្តថា ទោះជារវល់នឹងការសិក្សាត្រៀមប្រឡង និងមានពេលហ្វឹកហាត់តិចតួចក្ដីក៏នៅតែបន្តខំប្រឹងដដែលហ្វឹកហាត់ដើម្បីឈានទៅសម្រេចគោលដៅរបស់ខ្លួន។ ពេលខ្លះក៏មានការនឿយហត់ចំពោះការហ្វឹកហាត់ដែរ ប៉ុន្តែរូបគេមិនដកថយនោះទេ ឲ្យតែទំនេរគឺហាត់ ពីព្រោះក្នុងចិត្តចង់ល្បីដូចរៀមច្បង និងចង់ឈ្នះមេដាយ ឬខ្សែក្រវាត់ឲ្យដូចពួកគេទាំងពីរនាក់។

កីឡាករ ឈុត សេរីវ៉ាន់ថង ពេលឈ្នះថៃ

ឈុត សេរីវ៉ាន់ថង ដែលជាអ្នកប្រដាល់ក្លឹបរាហ៊ូកីឡាខេត្តបាត់ដំបងជាកំពុងទទួលបានការចាប់អារម្មណ៍ជាខ្លាំងពីអ្នកនិយមវិស័យប្រដាល់។ រូបគេប្រកួតម្ដងៗដោយទំនុកចិត្តមិនចេះខ្លាចដៃគូនោះឡើយ។ សរុបការប្រកួតរបស់គេទាំងអស់ ៤៨ដង ឈ្នះ ៤១ ចាញ់៦ និងស្មើ១ ហើយប៉ះបរទេស៥ដងឈ្នះទាំងអស់៕

អត្ថបទ៖ នួន ស៊ីណា