ល្ខោននិយាយស្ទើរតែបាត់ស្រមោល ពេលនេះក្រោយឈរជាថ្មី សង្ឃឹមមានការគាំទ្រ (វីដេអូ)
- 2018-01-11 03:39:01
- ចំនួនមតិ 0 | ចំនួនចែករំលែក 0
ល្ខោននិយាយស្ទើរតែបាត់ស្រមោល ពេលនេះក្រោយឈរជាថ្មី សង្ឃឹមមានការគាំទ្រ (វីដេអូ)
ចន្លោះមិនឃើញ
ទម្រង់សិល្បៈល្ខោននិយាយ នៅពេលនេះសឹងតែបាត់ស្រមោលក្នុងឆាកសម្ដែងទៅហើយ ។ ម៉្យាងទៀតល្ខោននេះប្រជាពលរដ្ឋកម្របានទស្សនា ហើយក៏មិនសូវមានការបង្កើតជាក្រុមក្នុងការសម្ដែងផងដែរ។
ក្រុមភារិទ្ធល្ខោននិយាយជាក្រុមល្ខោន មួយក្នុងចំណោមល្ខោននិយាយផ្សេងទៀត ដែលកំពុងកាត់ព្យុះសង្ឃរា ដើម្បីបន្តជីវិតលើឆាកព្រោះគ្មានការគាំទ្រ។
លោក ណេន ភារិទ្ធ ប្រធានក្រុមភារិទ្ធល្ខោននិយាយ បានរៀបរាប់ទាំងទឹកមុខអស់សង្ឃឹមប្រាប់Sabay ពីស្ថានភាពដុនដាបនៃល្ខោននេះ ថា មួយឆ្នាំស្ទើរគ្មានការហៅទៅសម្ដែងម្ដងផង សិល្បករ មិនអាចផ្ញើក្រពះទៅលើរបរនេះបានទេ។ ទោះជាបច្ចុប្បន្ន ក្រុមសម្ដែងលោកមានការស្គាល់ច្រើន តែនៅតែគ្មានទីផ្សារ ហើយការខិតខំធ្វើរាល់ថ្ងៃព្រោះក្តីស្រលាញ់។ ចាប់ពី ថ្ងៃ ទី៣ មីនា ឆ្នាំ២០១៣ មកក្រុមនេះបានចាប់កំណើតឡើងក្រោម ឈ្មោះថាក្រុមពន្លកវឌ្ឍនៈ ដែល មានសិស្សនិស្សិតមកពីសាកលវិទ្យាល័យ និងជំនាញសិក្សាផ្សេងគ្នា។
លោកជាប្រធានក្រុមមួយរូបបានមុជយ៉ាងជ្រៅ ក្នុងទម្រង់សិល្បៈមួយនេះ លោក បានបង្ហាញតាមរយៈស្នាដៃ ដែលលោកបានចងក្រង ពីប្រវត្តិល្ខោននិយាយថា៖ ល្ខោននិយាយគីជាទម្រង់សិល្បៈទស្សនីយភាពប្រភេទល្ខោនទំនើប ជាប្រភេទសិល្បៈយកពាក្យសម្ដីជាមួលដ្ឋាន រួមនិងកាយវិការជាមួយផងដែរ។
ទាក់ទងប្រវត្តិ និងដើមកំណើតរបស់ល្ខោននិយាយ តាមសិល្បៈករចាស់ៗថា សិល្បៈល្ខោននិយាយនេះមានប្រភពពីបស្ចិមប្រទេស និងបានហូរ ចូលមកស្រុកខ្មែររវាងឆ្នាំ ១៩៤៤ – ១៩៤៥ តាមរយៈ ជនជាតិបារាំងម្នាក់ឈ្មោះ ហ្គីប៉ារ៉េ (Guy Paree) នាចុងសម័យអាណានិគមនិយមបារាំង។ តាមរយៈការលើកយករឿងល្បើករបស់អ្នកនិងពន្ធ ឡា ហ្វុងតែន (Lafontaine) ជាប្រភេទសែណែត សម្ដែងឈុតតូចមួយ។
លោក បន្តថា ការ ល្ខោននិយាយនេះជាឫសគល់នៃខ្សែភាពយន្ត វាជាចំណែកមួយយ៉ាងសំខាន់នៃការថែរក្សាវប្បធម៌ អក្សរសិល្ប៍ ជាពិសេសសារអប់រំសង្គមផ្សេងៗ។ បុរសមាឌមាំម្នាក់នេះ ក៏តូចចិត្ត និងមានបំណងបញ្ឈប់សកម្មភាពក្រុមរបស់ខ្លួន ផងដែរនាពេលកន្លងមកព្រោះគ្មានការគាំទ្រ។ ប៉ុន្តែត្រូវបានសមាជិកក្រុមស្នើកុំឲ្យលោកឈប់ លោកក៏បន្តសកម្មភាពក្រុមបន្តទៀត។
លោក ណេង ភារិទ្ធ ថា « កន្លងមកខ្ញុំចង់ឈប់ច្រើនដងហើយតែសមាជិកក្រុមចេះតែថា បើបងឈប់ទៅការសម្ដែង ស្ងាត់អស់ហើយ! ទើបខ្ញុំចង់ចាប់ផ្តើមពីចំណុចសូន្យសាជាថ្មី ប៉ុន្ដែលើកនេះបើគ្មានការគាំទ្រទៀត ខ្ញុំប្រហែលជាឈប់មែនទែនហើយ»។
សមាជិកក្រុមមា្នក់ដែលកំពុង ក្រាញននៀលកាត់សមុទ្រឧបសគ្គដ៏ធំនេះ លោក ថេង គឹមស បានប្រាប់ Sabay ពីមូលហេតុថា ការមិនបោះបង់ការសម្ដែង ព្រោះលោកស្រលាញ់នូវសិល្បៈមួយនេះ។ លោកនៅតែមានកូនចិត្តមួយ សង្ឃឹមថាល្ខោននិយាយដ៏កម្សត់នេះនឹងទទួលបានការគាំទ្រពីទស្សនិកជននៅថ្ងៃណាមួយ។
«ខ្ញុំមិនបោះបង់វាចោលទេ ព្រោះខ្ញុំសង្ឃឹមថាល្ខោននេះនឹងទទួលបានការគាំទ្រនៅថ្ងៃណាមួយ។ សិល្បៈនេះដើរជាប់ជាមួយសង្គម វាជាកញ្ចក់ឆ្លុះពីរូបភាពសង្គម និងមានសារសំខាន់ចូលរួមចំណែកយ៉ាងស្និទ្ធក្នុងអប់រំផងដែរ»។ លោក ថេង គឹមស បញ្ជាក់។
ទោះជាយ៉ាងណាក្រុមមួយនេះ សង្ឃឹមថា ពលរដ្ឋខ្មែរនឹងចូលរួមគាំទ្រសិល្បៈមួយនេះ ឲ្យបានបញ្ចេញសកម្មភាពបន្តទៀត។ ក្រុមល្ខោននិយាយនេះក៏មានគម្រោងជំរុញល្ខោនមួយនេះឲ្យមានការគាំទ្រ និងមួយផ្នែកជាការអប់រំ និងកម្សាន្តសម្រាប់សង្គម។