អាសូរ ម្ចាស់ "បុណ្យបេតិកភណ្ឌ" ដល់ថ្នាក់ប្រកាសឡៃឡុងស្គរ រនាត សងបំណុលគេ
- 2018-01-11 03:53:36
- ចំនួនមតិ 0 | ចំនួនចែករំលែក 0
អាសូរ ម្ចាស់ "បុណ្យបេតិកភណ្ឌ" ដល់ថ្នាក់ប្រកាសឡៃឡុងស្គរ រនាត សងបំណុលគេ
ចន្លោះមិនឃើញ
បុណ្យបេតិកភណ្ឌដែលទើបប្រារព្ធធ្វើលើកចុងក្រោយកាលពីពាក់កណ្ដាលខែធ្នូនោះ ពេលនេះ ធ្លាយព័ត៌មានថា ម្ចាស់រៀបចំនៃកម្មវិធីនេះអស់លទ្ធភាព ដល់ថ្នាក់ប្រកាសលក់ឡៃឡុងសម្ភារបម្រើឲ្យសិល្បៈបុរាណខ្មែរមានដូចជា ស្គរ ស្បែក រនាត ជាដើម ដើម្បីសងបំណុលគេ។
តាមព័ត៌មានដែលទទួលបានព្រឹកនេះ ពីឌីជេអាចារ្យធំ អ្នកនិយមស្រឡាញ់សិល្បៈវប្បធម៌ខ្មែរម្នាក់នោះ បានឲ្យដឹងថា ការរៀបចំបុណ្យបុណ្យបេតិកភណ្ឌលើកទី៣ ដែលបានរៀបចំនៅក្នុងបរិវេណវត្តភ្នំកាលពីចុងឆ្នាំ ២០១៧ នោះ រៀបចំដោយលោក ស៊ុប ស័ក្ខរា ហើយបច្ចុប្បន្នអ្នករៀបចំរូបនោះ កំពុងជួបបញ្ហាបំណុលចំពោះមុខ រហូតដល់ថ្នាក់សុខចិត្តសម្ភារប្រើប្រាស់នានាក្នុងសិល្បៈបុរាណខ្មែរ ដើម្បីដោះទ័ល។
តាម ឌីជេ អាចារ្យធំ លោក ស័ក្ខរា ដែលស្រឡាញ់សិល្បៈវប្បធម៌បុរាណខ្មែរម្នាក់នោះ បានចំណាយថវិកាខ្លួនឯងខ្លះ ថវិកាកម្ចីខ្លះ រៀបចំបុណ្យខាងលើអស់ប្រមាណជាង ២ម៉ឺនដុល្លារអាមេរិក។ ប៉ុន្តែជាក់ស្ដែង បុណ្យដែលលោកថា មានអ្នកគាំទ្រត្រឹមតែមាត់នោះ មិនទទួលបានអ្នកឧបត្ថម្ភណាមួយឡើយ ជាហេតុ ក្រោយបញ្ចប់ទៅ ថវិកាទទួលបានមិនស្មើខ្ទង់ចំណាយផង គឺខាតរាប់ពាន់ដុល្លារ។
“ឥឡូវហ្នឹងជាង១អាទិត្យហើយជាមួយខ្ញុំ គាត់ដើរដាក់បញ្ចាំប្លង់ដី ប្លង់ផ្ទះ ប៉ុន្តែទើបតែថ្មីៗនេះ ធនាគារគេឆ្លើយថា មិនហ៊ានអោយខ្ចីទេ ទើបចុងក្រោយមិនដឹងធ្វើម៉េច ក៏សម្រេចប្រកាសលក់ ស្គរ រនាត ស្បែកអីហ្នឹង ដើម្បីបានលុយសងគេ"។ អាចារ្យធំថ្លែង។
ជុំវិញបញ្ហានេះ លោក ស៊ុប ស័ក្ខរា ដែលជាអ្នកផ្ដើមគំនិតរៀបចំបុណ្យបេតិកភណ្ឌ បានឆ្លើយប្រាប់ Sabay ថា គឺជាការពិត ដោយក្នុងនោះលោកបានពឹងពាក់អាចារ្យធំឲ្យជួយលក់សម្ភារមួយចំនួន ហើយពេលនេះមានអ្នកទិញខ្លះហើយ។ "ក្រោយពីបងអាចារ្យជួយផ្សព្វផ្សាយអោយ ឥឡូវមានបងប្អូនខ្មែរយើងនៅកូរ៉េជួយទិញរនាត២ហើយ បានលុយជាង៤០០ដុល្លារ។ នៅមានស្គរ ស្បែក របស់ផ្សេងៗខ្លះទៀត ដើម្បីបានលុយគ្រប់ ព្រោះជំពាក់គេជាង៣០០០ដុល្លារឯណោះ"។
បុណ្យបេតិកភណ្ឌ បានប្រារព្ធធ្វើចំនួន៣ត្រឹមឆ្នាំហើយ គិតត្រឹមឆ្នាំ ២០១៧។ ឆ្នាំទី១ ក៏ជួបបញ្ហាស្រដៀងគ្នា លើកលែងឆ្នាំទី២ដែលមានលក្ខណៈប្រសើរជាង។ ដោយឡែកឆ្នាំទី៣ អ្នករៀបចំប្រាប់ថា លោកជួបបញ្ហាធ្ងន់ធ្ងរតែម្ដង ដោយសារទុនខ្លះបានបង់ខាតពីការរៀបចំឆ្នាំដំបូងហើយ។
លោក ស័ក្ខរា ប្រាប់ថា លោកមិនច្បាស់ទេថា បុណ្យដដែលនេះ អាចរៀបចំបានទៀតឬអត់នាឆ្នាំនេះ ឬឆ្នាំបន្ទាប់។ លោក សង្កត់ធ្ងន់ថា ពេលនេះ គឺត្រូវដោះស្រាយបញ្ហាចំពោះមុខជាមុនសិន៕
បុណ្យបេតិកភណ្ឌខ្មែរបង្ហាញពីសិល្បៈបុរាណច្រើនទម្រង់