ខ្លោចចិត្តអាណិត វង្ស ថាណាន់ សូម្បីតែថ្ងៃខែឆ្នាំកំណើតខ្លួនឯងក៏អត់ដឹងដែរ
- 2018-01-13 09:20:38
- ចំនួនមតិ 0 | ចំនួនចែករំលែក 0
ខ្លោចចិត្តអាណិត វង្ស ថាណាន់ សូម្បីតែថ្ងៃខែឆ្នាំកំណើតខ្លួនឯងក៏អត់ដឹងដែរ
ចន្លោះមិនឃើញ
ភាគច្រើនបុគ្គលគ្រប់រូបតែងតែដឹង និងចងចាំជានិច្ចនៅថ្ងៃខែឆ្នាំកំណើតដែលខ្លួនកើតមក ប៉ុន្តែសម្រាប់ វង្ស ថាណាន់ វិញសូម្បីតែថ្ងៃខែឆ្នាំកំណើតខ្លួនឯងក៏មិនដឹងដែរ។
ហេតុផលដែល ថាណាន់ មិនបានដឹងថ្ងៃខែឆ្នាំកំណើតពិតប្រាកដខ្លួនឯងដោយសារតែ លោកកើតមកនៅជាមួយជីដូនជីតា ជាអ្នកមើលថែ មិនមានឪពុកម្ដាយចាំផ្ដល់ភាពកក់ក្ដៅ និងទំនុកបម្រុងដូចក្មេងមួយចំនួននោះទេ។ ប៉ុន្តែរឹតតែគួរឲ្យសង្វេគទៀតនោះរស់នៅជាមួយតាយាយបានអាយុ ៣ ឆ្នាំប៉ុណ្ណោះដោយសារជីវភាពខ្វះខាតលោកទាំងពីក៏បានបញ្ជូន ថាណាន់ ពីខេត្តកំពង់ចាម មកឲ្យសិក្សារៀនសូត្រនៅមណ្ឌលកុមារកំព្រាមួយក្នុងខេត្តកំពង់ស្ពឺ។
ធ្វើដំណើរមកដល់មណ្ឌលកំព្រានៅ ខេត្តកំពង់ស្ពឺ ភ្លាមដើម្បីបំពេញប្រវត្តិរូបសុំរស់នៅ ពេលនោះប្រធានអ្នកគ្រប់គ្រងមណ្ឌលបានសួរទៅលោកថា៖" តើប្អូនកើតថ្ងៃខែឆ្នាំណា? " ភ្លាមនោះ ថាណាន់ ក៏បានឆ្លើយតប៖"ខ្ញុំអត់ដឹងទេ"។
ជាមួយពាក្យសម្ដីអួលដើមក វង្ស ថាណាន់ បានរៀបរាប់ថា៖" ពេលខ្ញុំឆ្លើយថាអត់ដឹងអ៊ីចឹងអ្នកគ្រប់គ្រងមណ្ឌលគាត់បានសួរទៅបងស្រីខ្ញុំដែលបានជូនខ្ញុំមក តែបងស្រីខ្ញុំគាត់ក៏អត់ដឹងដែរ ទើបគាត់សម្រេចដាក់ខែឆ្នាំដែលអត់ពិតប្រាកដឲ្យខ្ញុំតែម្ដងទៅនៅថ្ងៃទី ៣ ខែ មីនា ឆ្នាំ ១៩៨៩ ។ ហើយអាយុខ្ញុំសព្វថ្ងៃគឺរាប់តាមមណ្ឌលជាអ្នកដាក់ឲ្យហ្នឹងឯង។ សួរទៅយាយខ្ញុំគាត់ក៏អត់ដឹងដែរពេលកើតហ្នឹងអត់បានចុះសំបុត្រកំណើតផងបង"។
នៅមណ្ឌលបានអាយុ ១៧ ឆ្នាំ វង្ស ថាណាន់ ក៏បានចាកចេញពីមណ្ឌល ក្រោយពីទទួលដំណឹងពីបងស្រីថាបានរកឃើញម្ដាយបង្កើត។ មករស់នៅជាមួយម្ដាយបែកគ្នារាប់ឆ្នាំបានតែ១ឆ្នាំកន្លះប៉ុណ្ណោះ ក៏បានស្លាប់បាត់បង់ជីវិតទៅចោលខ្លួនទៀត។
បន្ទាប់ពីម្ដាយស្លាប់ចោលទៅ ថាណាន់ ក៏មករកការងារធ្វើនៅភោជនីយដ្ឋានមួយក្នុងទីក្រុងភ្នំពេញ ជាបុគ្គលិករត់តុ។ ដោយសារតែមានសំឡេងពីរោះរត់តុបានតែប៉ុន្មានខែប៉ុណ្ណោះលោក ត្រូវបានម្ចាស់ហាងឈប់ឲ្យរត់តុមកធ្វើជាអ្នកចម្រៀងវិញ។ ក្លាយជាអ្នកចម្រៀងប្រចាំភោជនីយដ្ឋានបានប្រហែល ២ ឆ្នាំចាប់ផ្ដើមមានគំនិតនិពន្ធបទចម្រៀងដោយខ្លួនឯងគឺបទ "ខ្លាចបាត់អូន" “សុំចិត្ត" និងបទ "សុំទោសដែលឲ្យអូនចាំ" ទទួលបានការគាំទ្រយ៉ាងខ្លាំងពីមហាជន។
ចេញបទចម្រៀងខ្លួនឯងបានតែ ៣ បទប៉ុណ្ណោះ ថាណាន់ ក៏បានដាក់ពាក្យប្រលងចម្រៀងក្នុងកម្មវិធី Cambodian Idol រដូវកាលទី៣កាលពីយប់មិញក្នុងវគ្គ Judge Audition ទទួលបានពិន្ទុពីគណៈកម្មការទៅវគ្គបន្តទៀត៕