រឿង សោភ័ណ្ឌ ស្រក់ទឹកភ្នែកពេលរំលឹកសម្ដីម្ដាយជូនពរទាំងឈឺមុនវគ្គផ្ដាច់ព្រ័ត្រ

2018-01-15 02:43:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងប្រដាល់គុនខ្មែរជួរមុខរបស់កម្ពុជា រឿង សោភ័ណ្ឌ ស្រក់ទឹកភ្នែកភ្លាមៗ នៅពេលដែលនឹងឃើញការក្រើនរំលឹកដាស់តឿនរបស់ម្ដាយដែលកំពុងមានជំងឺ និងមិនបានមកលើកទឹកចិត្តវគ្គផ្ដាច់ព្រ័ត្រកាលពីយប់ថ្ងៃសៅរ៍កន្លងទៅនេះទេ។

រឿង សោភ័ណ្ឌ ពេលឈ្នះខ្សែក្រវាត់

រឿង សោភ័ណ្ឌ បានឲ្យដឹងថា ដោយសារតែមានការគាំទ្រ ស្រឡាញ់ពេញចិត្ត និងលើកទឹកចិត្តពីសំណាក់អ្នកនិយមប្រដាល់ ទើបរុញច្រានកេរ្តិ៍ឈ្មោះរបស់ខ្លួនឲ្យល្បី និងប្រកួតបានល្អដូចសព្វថ្ងៃនេះ។ គ្រាន់តែរំលឹកដល់ការលើកទឹកចិត្ត ការក្រើនរំលឹកឲ្យខំប្រឹងប្រែងប្រកួត និងមានការប្រុងប្រយ័ត្នខ្ពស់ផងនោះ ម្ចាស់ខ្សែក្រវាត់របស់ CNC ពីរគ្រឿងរូបនេះ ស្រាប់តែរំជួលចិត្តស្រក់ទឹកភ្នែកភ្លាម ដោយសារនឹកឃើញសម្ដីម្ដាយតែងតែនិយាយដូចនេះ ដែលពេលនេះអ្នកម្ដាយរបស់ខ្លួនឈឺរហូតមិនអាចមកលើកទឹកចិត្តដល់សង្វៀនប្រកួតឡើយ។

រឿង សោភ័ណ្ឌ ពេលឈ្នះខ្សែក្រវាត់

អ្នកលេងកណ្ដាប់ដៃរូបនេះបន្តថា បន្ទាប់ពីប្រកួតបានខ្សែក្រវាត់នេះហើយ នឹងយកប្រាក់រង្វាន់ទាំងនេះនាំម្ដាយទៅព្យាបាលនៅប្រទេសថៃ ថែមទាំងនៅមើលថែម្ដាយមួយរយៈពេលទៀតផង ព្រោះកន្លងមកជាប់ហ្វឹកហាត់នៅឆ្ងាយមិនសូវបាននៅជួយមើលនោះឡើយ។

រឿង សោភ័ណ្ឌ ពេលឈ្នះខ្សែក្រវាត់

កីឡាករ រឿង សោភ័ណ្ឌ ពិតជាធ្វើបានល្អមែនទែននៅជំនួបវគ្គផ្ដាច់ព្រ័ត្រខ្សែក្រវាត់គោជល់ទម្ងន់ ៦៩គីឡូក្រាមរបស់សង្វៀន CNC កាលពីថ្ងៃសៅរ៍កន្លងទៅនេះ បើទោះជាភ្លាត់ស្នៀតបែកយ៉ាងធំតាំងពីទឹកទី១ក្ដី ប៉ុន្តែនៅតែអាចតស៊ូបានហើយផ្ដួល អូប៉ ស.ថ.វីស៊ីត ឲ្យសន្លប់នៅទឹកទី៤ថែមទៀតផង។ កីឡាកររូបនេះក្លាយជាម្ចាស់ខ្សែក្រវាត់របស់សង្វៀនគោជល់របស់ CNC រដូវការទី៨ដែលទើបបញ្ចប់ពីថ្ងៃសៅរ៍នេះ៕

អត្ថបទ៖ នួន ស៊ីណា