Mourinho បញ្ជាក់ច្បាស់ៗជាថ្មី រឿងតួនាទីរបស់ Zlatan នៅ Man Utd
- 2018-01-15 14:30:00
- ចំនួនមតិ 0 | ចំនួនចែករំលែក 0
Mourinho បញ្ជាក់ច្បាស់ៗជាថ្មី រឿងតួនាទីរបស់ Zlatan នៅ Man Utd
ចន្លោះមិនឃើញ
លោក Jose Mourinho ក្នុងថ្ងៃនេះ បាននិយាយថា ខ្សែប្រយុទ្ធចាស់វស្សា Zlatan Ibrahimovic នៅតែមានតួនាទីសំខាន់នៅក្លឹបបិសាចក្រហម Manchester United។ នេះបើទោះខ្សែប្រយុទ្ធរូបនេះ ហាក់មិនទាន់ស្បើយពេញលេញពីរបួសជង្គង់របស់ខ្លួននៅឡើយ ក្នុងរដូវកាលនេះ។
លោក Mourinho បានថ្លែងប្រាប់ Sky Sports ថា៖ "ខ្ញុំយល់ថា Zlatan ក៏ដឹងខ្លួនដែរថា គេកំពុងស្ថិតនៅដំណាក់កាលចុងក្រោយនៃអាជីពរបស់គេ។ បើទោះជាអ៊ីចឹងក្ដី សុបិន និងការប្រឹងប្រែងរបស់គេក្នុងការបញ្ចប់អាជីពនៅ Manchester United មានប្រយោជន៍ណាស់ខ្ញុំក៏ដូចជាក្រុមទាំងមូល"។
អ្នកចាត់ការសញ្ជាតិព័រទុយហ្គាល់រូបនេះបន្ត៖ "បើតាមគំនិតខ្ញុំ គេនៅតែមាននាទីជាមេដឹកនាំមួយរូបក្នុងក្រុម ទាំងក្នុង និងក្រៅទីលានប្រកួត។ គេនៅតែជាកីឡាករដ៏ល្អចំពោះខ្ញុំ"។
សូមបញ្ជាក់ផងដែរថា ខ្សែប្រយុទ្ធ Zlatan Ibrahimovic ហាក់មិនទាន់ជាសះស្បើយពេញលេញពីរបួសជង្គង់របស់ខ្លួន ដែលខ្លួនបានជួបប្រទះកាលពីខែមេសាឆ្នាំទៅ។ បើទោះជាបានលេងបានប៉ុន្មានប្រកួតក្នុងរដូវកាលនេះ និងស៊ុតចូលបាន ១គ្រាប់ ខ្សែប្រយុទ្ធចាស់វស្សារូបនេះបានរងរបួសជាថ្មីកាលពីចុងខែធ្នូ ហើយអាចនឹងអវត្តមានរហូតដល់ខែកុម្ភៈ៕