ក្បួនទាំង ៥ដើម្បីជោគជ័យក្នុងវិស័យចម្រៀងពី Ed Sheeran
- 2018-01-16 07:40:00
- ចំនួនមតិ 0 | ចំនួនចែករំលែក 0
ក្បួនទាំង ៥ដើម្បីជោគជ័យក្នុងវិស័យចម្រៀងពី Ed Sheeran
ចន្លោះមិនឃើញ
Ed Sheeran ជាតារាចម្រៀង និងអ្នកនិពន្ធទំនុកច្រៀងសញ្ជាតិអង់គ្លេសមួយរូប ដែលកំពុងទទួលបានភាពល្បីល្បាញជុំវិញពិភពលោក។
ក្នុងឆ្នាំ ២០១៤ លោកបានជាប់ឈ្មោះជាតារាចម្រៀងថ្មីល្អជាងគេ ប្រចាំកម្មវិធីពានរង្វាន់ Grammy លើកទី៥៦។ តារាចម្រៀងរូបនេះក៏ធ្លាប់ទទួលបានពានរង្វាន់អ្នកនិពន្ធប្រចាំឆ្នាំ ក្នុងឆ្នាំ២០១៥ផងដែរ។
ជាមួយនឹងភាពជោគជ័យក្នុងវិស័យសិល្បៈបែបនេះ តារាចម្រៀង Ed Sheeran បានក្លាយជានិមិត្តរូបសម្រាប់មនុស្សទូទៅដែលចង់ទទួលបានភាពជោគជ័យក្នុងវិស័យនេះដូចគ្នា។ ខាងក្រោមនេះជាវិធីសាស្ត្រទាំង៥ដែលលោកបានចែករំលែកក្នុងការឈានទៅរកភាពជោគជ័យ៖
១. មានទំនាក់ទំនងជាមួយមនុស្សទូទៅ
ក្នុងនាមជាអ្នកសិល្បៈម្នាក់ ការកើនឡើងចំនួននៃអ្នកទិញអាល់ប៊ុមចម្រៀង ជារឿងមិនសូវសំខាន់ប៉ុន្មានទេ អ្វីដែលសំខាន់នោះគឺមានទំនាក់ទំនងល្អជាមួយមនុស្សទូទៅ។ ជាក់ស្ដែងដូចជាតារាចម្រៀង Ed Sheeran ផ្ទាល់ លោកមិនដែលខ្វល់ពីចំនួនអាល់ប៊ុមដែលលក់បាននោះទេ ប៉ុន្តែអ្វីដែលលោកតែងតែគិតគឺបទចម្រៀងដែលលោកនិពន្ធចេញពីអារម្មណ៍ផ្ទាល់ ហើយនៅពេលបទនោះទៅដល់អ្នកដទៃគឺវាបានជ្រាបក្នុងអារម្មណ៍ពួកគេដូចជាលោកដែរ។
២. ប្រកាន់ជំហរខ្លួនឯង
មានមនុស្សរាប់លាននាក់នៅក្នុងពិភពលោកនេះ ប៉ុន្តែគ្មាននរណាម្នាក់ដូចខ្លួនយើងឡើយ ហើយក៏គ្មាននរណាម្នាក់អាចនិពន្ធបទចម្រៀង និងច្រៀងបានដូចជារូបយើងនោះដែរ ប្រសិនបើយើងតាំងចិត្តប្រកាន់ជំហរជាខ្លួនយើងនោះ។
៣. អ្នកកាន់តែធ្វើវា លទ្ធផលនឹងកាន់តែល្អប្រសើរ
ទេពកោសល្យជាអ្នកនិពន្ធ និងអ្នកចម្រៀងមិនមែននរណាចេះតែអាចធ្វើបាននោះទេ ដូច្នេះហើយដើម្បីឲ្យគោលបំណងបានជោគជ័យ យើងត្រូវខិតខំធ្វើហើយធ្វើទៀត ទោះជាដំបូងបទនោះស្ដាប់ទៅមិនពីរោះ ឫមិនមានអត្ថន័យអ្វីក៏ដោយ តែនេះជាបទពិសោធន៍ យ៉ាងហោចណាស់ វាជាស្នាដៃរបស់យើងផ្ទាល់ មិនយូរអ្វីៗនឹងបានល្អប្រសើរជាមិនខាន។
៤. ធ្វើខ្លួនឲ្យជាមនុស្សគេចូលចិត្ត
សព្វថ្ងៃនេះ បើសិនជាយើងជាប្រភេទមនុស្សដែលមនុស្សទូទៅស្អប់នោះ ប្រាកដជាគ្មាននរណាម្នាក់ទិញអាល់ប៊ុមចម្រៀងរបស់យើងឡើយ។ ដូច្នេះហើយ ធ្វើខ្លួនឲ្យជាមនុស្សដែលមានអ្នកចូលចិត្តច្រើនគឺពិតជាសំខាន់ណាស់នៅក្នុងវិស័យមួយនេះ។ ធ្វើខ្លួនឲ្យជាមនុស្សល្អនៅក្នុងសង្គមមួយដែលមនុស្សទូទៅចូលចិត្ត ការងាររបស់យើងនឹងកាន់តែប្រសើរ។
៥. ចាប់ផ្ដើមធ្វើអ្វីដែលយើងចង់ធ្វើឲ្យបានលឿនតាមដែលអាចធ្វើបាន
មនុស្សម្នាក់ៗតែងតែមានគោលបំណងរបស់ខ្លួនទៅថ្ងៃអនាគត។ មួយចំនួនចង់ធ្វើជាគ្រូពេទ្យ មួយចំនួនទៀតមានទេពកោសល្យខាងផ្នែកតន្ត្រី។ ដូច្នេះហើយ បើតាមតារាចម្រៀង Ed Sheeran លោកបាននិយាយថា ត្រូវចាប់ផ្ដើមធ្វើវាឲ្យបានលឿន ជាជាងនៅតែស្រមៃចង់បាននោះ។ ការចាប់ផ្ដើមធ្វើអ្វីមួយដែលយើងបានតាំងចិត្តនោះ អាចធ្វើឲ្យយើងឈានទៅរកភាពជោគជ័យបាន។
បើចង់ដឹងច្បាស់ពីវិធីសាស្ត្រផ្សេងទៀតរបស់តារាចម្រៀង Ed Sheeranក្នុងការឈានទៅរកភាពជោគជ័យក្នុងវិស័យចម្រៀងនេះ ទស្សនាវីដេអូខាងក្រោមនេះទាំងអស់គ្នា៖
ចុចអាន៖
ប្រជុំជើងខ្លាំងទាំង ១០ ជុំវិញពិភពលោកច្រៀងបទ Perfect របស់ Ed Sheeran
Ed Sheeran ទទួលបានងារនៅរាជវាំង Buckingham តែធ្វើខុសច្បាប់រឿង១