មួយឃ្លានេះរបស់ Aubameyang អាចឲ្យក្លឹបនៅឡុងដុងមានទឹកមាត់លេប?

2018-01-16 12:22:03
ចំនួនមតិ 0 | ចំនួនចែករំលែក 0

ចន្លោះមិនឃើញ

នាថ្ងៃនេះ ខ្សែប្រយុទ្ធ Pierre-Emerick Aubameyang ក្នុងវីដេអូ Instagram មួយបាននិយាយថាខ្លួនចង់ធ្វើដំណើរទៅទីក្រុងឡុងដុងនៅថ្ងៃណាមួយ។ ការថ្លែងនេះ បានធ្វើឲ្យមានការលេចឡើងនូវពាក្យល្ហិចល្ហៀងជាច្រើន ដោយមួយរយៈចុងក្រោយនេះ មានពាក្យចចាមអារ៉ាមជាច្រើនដែលថា ក្លឹបមានមូលដ្ឋាននៅទីក្រុងឡុងដុង Arsenal កំពុងចង់បានខ្សែប្រយុទ្ធរូបនេះ។

ក្នុងវីដេអូបន្តផ្ទាល់ក្នុង Instagram មួយ បង្ហោះដោយកីឡាករជាតិអង់គ្លេស Jadon Sancho ដែលជាមិត្តរួមក្រុមរបស់ខ្លួន Aubameyang បានពោលថា៖ "តើអ្នកឯង (Sancho) អាចជូនខ្ញុំទៅទីក្រុងឡុងដុងនៅថ្ងៃណាមួយបានទេ។ ខ្ញុំមិនដឹងថាម៉េចបានខ្ញុំចង់ទៅទីនោះទេ។ ខ្ញុំគ្រាន់តែចង់ទៅដើម្បីសប្បាយប៉ុណ្ណោះ ពីព្រោះអ្នកឯងបានប្រាប់ខ្ញុំថា នៅទីនោះសប្បាយណាស់"។

ពាក្យប៉ុន្មានឃ្លានេះ បានបន្លឺឡើង ស្របពេលដែលមួយរយៈចុងក្រោយនេះមានពាក្យល្ហិចល្ហៀងជាច្រើនដែលថា ក្លឹបកាំភ្លើងធំ Arsenal ចង់បានខ្សែប្រយុទ្ធរូបនេះ ដើម្បីមកជំនួសខ្សែប្រយុទ្ធ Alexis Sanchez ដែលត្រូវបានគេរាយការណ៍ថាអាចនឹងចាកចេញទៅ Manchester United នាពេលឆាប់ៗខាងមុខ។

បន្ថែមពីលើនេះផងដែរ ពាក្យសំដីទាំងអស់នេះ ធ្វើឡើង បន្ទាប់ពីខ្សែការពាររត់លឿន Hector Bellerin របស់ Arsenal ទើបតែបានធ្វើការ Follow គណនី Twitter ផ្លូវការរបស់ Aubameyang កាលពីដើមសប្ដាហ៍នេះ។ ការណ៍ទាំងនេះ បានធ្វើឲ្យឆាបឆួលពាក្យចចាមអារ៉ាមនៃការផ្ទេរមួយនេះរឹតតែខ្លាំង៕

#Aubameyang zu #Sancho:„Can you bring me to London one day?“ #BVB #Arsenal pic.twitter.com/DKJesThr6b
— Ballzirkulation (@Ballzirkulation) January 15, 2018

ប្រភព៖ Metro ប្រែសម្រួល៖ ហ៊ីម រស្មី