របរត្បាញក្រមានៅស្រុកស្រែឡើងកូដខ្លាំង និងចំណូលមិនក្រោម១ពាន់ដុល្លារ
- 2018-01-17 02:17:59
- ចំនួនមតិ 0 | ចំនួនចែករំលែក 0
របរត្បាញក្រមានៅស្រុកស្រែឡើងកូដខ្លាំង និងចំណូលមិនក្រោម១ពាន់ដុល្លារ
ចន្លោះមិនឃើញ
សិប្បកម្មត្បាញក្រមាមួយកន្លែងស្ថិតក្នុងខេត្តសៀមរាបកំពុងមានឈ្មោះបោះសម្លេងក្នុងយុទ្ធការ បំបែកឯតទគ្គកម្ម ក្រមាវែងជាងគេលើពិភពលោក ដែលនឹងចាប់ផ្ដើមត្បាញនៅថ្ងៃទី ១៤ កុម្ភៈឆ្នាំ ២០១៨ខាងមុខ បន្ទាប់ពីសិប្បកម្មនេះបានត្បាញក្រមាប្រវែង ១ ២០០ម៉ែត្រ និងប្រើរយៈពេល ៣ខែ។
លោកស្រី វ៉ង់ សុឡេង ម្ចាស់សិប្បកម្មត្បាញក្រមានៅភូមិពួកចាស់ ស្រុកពួក ខេត្តសៀមរាប បានប្រាប់ Sabay ថា លោកស្រីបានចាប់របរនេះតាំងពីធំដឹងក្ដី រហូតបច្ចុប្បន្នក្លាយជាសិប្បកម្មត្បាញក្រមាល្បីឈ្មោះជាងគេក្នុងតំបន់។ មិនតែប៉ុណ្ណោះ មុខរបរមួយនេះបានជួយឲ្យគ្រួសារនិងបុគ្គលិករួមអាជីពគេចផុតពីការចំណាកស្រុក។
តាមការលើកឡើងរបស់លោកស្រី សុឡេង ក្នុងមួយខែៗ ក្រមាត្បាញបានប្រមាណពី ៧០ ទៅ១០០ ក្រមា ខណៈតម្លៃក្រមាមួយចាប់ពី ៥ដុល្លារ ដល់ ២០ដុល្លារក៏មាន បើគិតជាចំណូលសរុបមិនក្រោម១ពាន់ដុល្លារនោះទេ។ លោកស្រីឲ្យដឹងថា «ក្រមាដែលត្បាញរួចគឺគ្មានសល់ទេ លក់អស់ៗតែម្ដងៗ ខ្លះណាសឹងតែធ្វើមិនទាន់អ្នកបញ្ជាទិញផង»។ ម្ចាស់សិប្បកម្មវ័យ ៤២ ប្រាប់ដោយញញឹមថា បើទោះជាក្រមាដាក់លក់ថ្លៃជាងគេបន្តិច ប៉ុន្តែគុណភាពវិញ អតិថិជនមិនដែលទាស់ចិត្តទេ។
សិប្បកម្មលោកស្រីមានត្បាញ ក្រមា ស្រោមខ្នើយ ពូក ភួយ ជាដើម។ ជាមួយគ្នានេះលោកស្រីក៏បើកឱកាសឲ្យស្រ្តីខ្មែរក្នុងភូមិមានចំណូលគ្រប់គ្រាន់ មានសុខភាពល្អ ដោយមិនចាំបាច់ទៅទីក្រុងធ្វើការរោងចក្រឡើយ និងផ្ដល់កម្រៃក្នុង១ខែចាប់ពី១០០ដុល្លារឡើយ។
សម្រាប់យុទ្ធការក្រមាត្បាញក្រមាវែងជាងគេនោះ លោកស្រីសុឡេង និងក្រុមការងាររំពឹងថា នឹងអាចត្បាញវែងជាង ១ ២០០ម៉ែត្រ និងប្រើរយៈពេលតិចជាង ៣ខែ។ បន្ថែមពីនេះ លោកស្រី សូមស្នើកូនខ្មែរចូលរួមលើកតម្កើងប្រពៃណី និងចូលរួមត្បាញក្រមាខ្មែរឲ្យពិភពលោកបានស្គាល់ទាំងអស់គ្នា។
គួរជម្រាបថា យុទ្ធការក្រមា៖ បំបែកឯតទគ្គកម្ម ក្រមាវែងជាងគេលើពិភពលោក រៀបចំដោយក្រុមចលនា Go Go Cambodia នឹងធ្វើនៅព្រះមេរុ រាជធានីភ្នំពេញ នៅថ្ងៃដូចបញ្ជាក់ខាងលើ៕