ប៊ុន លីម៉ា សាងភាពល្បីល្បាញ ក្រោមពាក្យជេរស្ដី

2018-01-17 03:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាប្រិយភាពរបស់តារាសម្ដែង ប៊ុន លីម៉ា បានស្ទុះឡើងយ៉ាងសន្ធឹកក្រោយវិលមកអាជីពសម្ដែងជាថ្មីក្នុងវីដេអូចម្រៀងរបស់ផលិតកម្មថោន។

MV ២បទគឺ "មនុស្សស្រីធម្មតាម្នាក់ឲ្យខ្ញុំខូចចិត្ត" និង "មនុស្សស្រីធម្មតាម្នាក់មិនសមឲ្យបងខូចចិត្ត" ដឹកនាំដោយ Rith Omega និងសម្ដែង ដោយ សាឌី និង លីម៉ា បានអន្ទង់អារម្មណ៍អ្នកគាំទ្រឲ្យទស្សនាយ៉ាងច្រើនគួរឲ្យកត់សម្គាល់ ហើយប្រជាប្រិយភាពរបស់តារាសម្ដែងទាំង២ក៏ហក់ឡើងទៅតាមនោះដែរ។

ក្នុងនោះតួចិត្តអប្រិយក្នុងសាច់រឿង បែរក្លាយជាជនរងគ្រោះនៅក្រៅការសម្ដែង ដោយលោកត្រូវបានមហាជនជេរប្រទេចយ៉ាងចាស់ដៃក្រោយមើលវីដេអូនេះ។ ទទួលរងការស្ដីបន្ទោសជាច្រើនលើបណ្ដាញសង្គមក្ដី លីម៉ា បញ្ជាក់ថា លោកមិនមានអារម្មណ៍អាក់អន់ចិត្តអ្វីនោះទេ ព្រោះនេះគ្រាន់តែជាការសម្ដែង។

"អត់អីផង ព្រោះនេះជាសិល្បៈ មានគេចូលចិត្ត ហើយមានគេស្អប់ជារឿងធម្មតាទេ យើងមិនអាចតម្រូវចិត្តទស្សនិកជនទាំងអស់បានទេ ហើយក៏អរគុណខ្លាំងណាស់ដែរ ដែលបានគាំទ្រការសម្ដែងរបស់ខ្ញុំមួយនេះ ទស្សនិកជនខ្លះស្អប់ក្នុងសាច់រឿង តែគាត់ចូលចិត្តមើលការសម្ដែងវិញ"។ លោករៀបរាប់។

លីម៉ា ដែលជាអតីតបេក្ខភាព Freshie ឆ្នាំ២០០៨ រំលឹកថា រយៈពេលប៉ុន្មានឆ្នាំនេះ លោកមិនបានឃ្លាតឆ្ងាយពីសិល្បៈទេ គ្រាន់តែមិនសម្ដែងប៉ុណ្ណោះ តែលោកនៅតែបន្តការងារផ្សេងទៀត ក្នុងវិស័យដដែលនេះដដែលក្នុងនាមជាអ្នកថតរូប។

ក្រោយសម្ដែង MV ២ខាងលើ ទីផ្សារសម្ដែងរបស់ លីម៉ា កើនឡើងគួរឲ្យភ្ញាក់ផ្អើលដោយមានផលិតករទាក់ទងមកជាហូរហែ។ ទោះមានទីផ្សារសម្ដែងច្រើនក្ដី លោកបញ្ជាក់ថាខ្លួននឹងមិនបោះបង់អាជីពជាអ្នកថតរូបទេ ការងារទាំងនេះត្រូវតែដើរទន្ទឹមគ្នា ពិសេសការសម្ដែង លោកនឹងខិតខំបន្តទៀតបើទស្សនិកជននៅតែគាំទ្រ៕

អត្ថបទ៖ សុខណា

រូបភាព៖ ផ្ដល់ឲ្យ