James ដាក់កប់ៗមាត់ទៅ Zidane ទាក់ទងនឹងរឿងចេញពី Real Madrid

2018-01-17 11:59:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើប្រយុទ្ធ James Rodriguez ក្នុងថ្ងៃនេះបាននិយាយចំៗថា អ្នកចាត់ការក្លឹប Real Madrid លោក Zinedine Zidane មានកីឡាករសំណព្វចិត្តផ្ទាល់ខ្លួន។

James បាននិយាយថា៖ "ខ្ញុំយល់យ៉ាងច្បាស់ថា គ្រប់អ្នកចាត់ការទាំងអស់ សុទ្ធតែមានកីឡាករសំណព្វចិត្តរៀងៗខ្លួន"។

កីឡាករកូឡុំប៊ីរូបនេះបន្ត៖ "ចំពោះខ្ញុំផ្ទាល់ ខ្ញុំមិនច្បាស់ទេថា ខ្ញុំមានទំនាក់ទំនងជិតស្និទ្ធជាមួយ Zidane ប៉ុន្តែគ្រប់អ្នកចាត់ការសុទ្ធតែមានកីឡាករសំណព្វចិត្តរៀងៗខ្លួន ហើយ Zidane ក៏អ៊ីចឹងដែរ។ ខ្ញុំមិនអាចនិយាយថា ការសម្រេចចិត្តរបស់គាត់មានភាពយុត្តិធម៌ ឬអត់ចំពោះខ្ញុំទេ ប៉ុន្តែមិនអីទេ គិតទៀតក៏មិនបានអីមកវិញដែរ"។

James បន្ថែមទៀតថា៖ "ខ្ញុំក្រៀមក្រំយ៉ាងខ្លាំងពេលចាកចេញពី Real Madrid ព្រោះក្លឹបនេះគឺជាក្លឹបក្នុងក្ដីសុបិនរបស់ខ្ញុំ តែក្នុងបាល់ទាត់គឺបែបនេះឯង ថ្ងៃនេះនៅក្លឹបមួយ ថ្ងៃក្រោយអាចនៅក្លឹបមួយទៀត"។

សូមបញ្ជាក់ផងដែរថា កាលពីរដូវកាលមុន James Rodriguez មិនមែនជាជម្រើសដំបូងរបស់លោក Zidane ឡើយ ដោយអ្នកចាត់ការរូបនេះ លេងទម្រង់ខ្សែបម្រើបីនាក់ ហើយកីឡាករជម្រើសដំបូងរបស់លោកក្នុងតំបន់នេះ គឺ Casemiro, Luka Modric, និង Toni Kroos។ ការណ៍នេះធ្វើឲ្យ James អង្គុយលើកៅអីបម្រុងជាច្រើនប្រកួត ដែលអាចជាកត្តាមួយជំរុញឲ្យកីឡាករកូឡុំប៊ីសម្រេចចិត្តចេញពីក្លឹបទៅចូលរួមជាមួយ Bayern Munich កាលពីអំឡុងរដូវកាលដោះដូរខែក្ដៅកន្លងទៅ៕

ប្រភព៖ Marca ប្រែសម្រួល៖ ហ៊ីម រស្មី