កូរ៉េខាងជើង និងកូរ៉េខាងត្បូង ព្រមព្រៀងគ្នាធ្វើរឿងមួយចំនួន គួរឲ្យភ្ញាក់ផ្អើល

2018-01-18 02:25:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសកូរ៉េខាងជើង និងកូរ៉េខាងត្បូង បានព្រមព្រៀងដើរក្បួនរួមគ្នាក្រោមទង់ជាតិ "កូរ៉េសាមគ្គី" តែមួយ នៅឯព្រឹត្តិការណ៍អូឡាំពិករដូវរងានាខែក្រោយ នៅប្រទេសកូរ៉េខាងត្បូង។ ជាមួយគ្នានេះដែរ ពួកគេក៏បានព្រមព្រៀងគ្នា ក្នុងការដាក់ក្រុមកីឡាវាយកូនបាល់លើទឹកកកផ្នែកស្ត្រី នៅក្នុងការចរចាដ៏កម្រ នៅឯភូមិ Panmunjom ទៀតផង។

វាគឺជាកិច្ចចរចាជាន់ខ្ពស់ដំបូងបង្អស់ រវាងប្រទេសទាំង២ ក្នុងរយៈពេលជាង ២ឆ្នាំមកនេះ។ មិនតែប៉ុណ្ណោះ វាជាការរំលាយនូវទំនាក់ទំនងអាក្រក់ ដែលបានចាប់ផ្ដើមនៅក្នុងឆ្នាំថ្មី នៅពេលដែលកូរ៉េខាងជើងបានស្នើសុំបញ្ជូនក្រុមរបស់ខ្លួនទៅប្រកួត។

គួរបញ្ជាក់ថា ការប្រកួតនឹងប្រព្រឹត្តទៅនៅចន្លោះថ្ងៃទី ៩ និង ២៥ ខែកុម្ភៈ នៅទីក្រុង Pyeongchang ប្រទេសកូរ៉េខាងត្បូង។

ប្រសិនបើផែនការនេះត្រូវបានសម្រេច គណៈប្រតិភូកូរ៉េខាងជើងរាប់រយនាក់ រួមទាំងអ្នករាំគាំទ្រចំនួន ២៣០ នាក់ , តន្ត្រីករ ១៤០ នាក់ និងកីឡាករតៃក្វាន់ដូ ចំនួន ៣០ នាក់ នឹងអាចឆ្លងកាត់តាមព្រំដែន ចូលទៅកាន់ប្រទេសកូរ៉េខាងត្បូង ដើម្បីចូលរួមប្រកួតកីឡាអូឡាំពិកនារដូវរងា។វានឹងក្លាយជាការបើកផ្លូវឆ្លងកាត់ជាលើកដំបូង នៅក្នុងរយៈពេលជិត ២ឆ្នាំមកនេះ។

លើសពីនេះទៅទៀត កូរ៉េខាងជើង ក៏បានយល់ព្រមបញ្ជូនគណៈប្រតិភូដែលមានសមាជិកចំនួន ១៥០ នាក់ ទៅកាន់ប៉ារ៉ាឡាំពិក (Paralympics) នៅខែមីនាផងដែរ។ កិច្ចព្រមព្រៀងនេះនឹងត្រូវបានអនុម័តដោយគណៈកម្មាធិការអូឡាំពិកអន្តរជាតិ (IOC) នៅទីក្រុង Lausanne ប្រទេសស្វីស នៅថ្ងៃសៅរ៍ ដោយសារតែកូរ៉េខាងជើង បានខកខានការចុះបញ្ជីកាលបរិច្ឆេទ ឬបរាជ័យនៅវគ្គចម្រុះ។

យ៉ាងណាមិញ កូរ៉េខាងត្បូង ក៏នឹងត្រូវស្វែងរកមធ្យោបាយធ្វើជាម្ចាស់ផ្ទះ ដើម្បីរៀបចំគណៈប្រតិភូកូរ៉េខាងជើង ដោយមិនបំពានលើការដាក់ទណ្ឌកម្មរបស់ក្រុមប្រឹក្សាសន្តិសុខ ដែលហាមឃាត់ការផ្ទេរសាច់ប្រាក់ទៅកាន់ទីក្រុងព្យុងយ៉ាង និងចុះបញ្ជីខ្មៅលើមន្ត្រីជាន់ខ្ពស់របស់កូរ៉េខាងជើង៕

ចុចអាន៖

ប្រភព៖ BBC ប្រែសម្រួល៖ សេង ឡុង