E-Sports គ្រោងបង្ហាញ៨វិញ្ញាសានឹងធ្វើឲ្យកក្រើកកីឡាទ្វីបអាស៊ីឆ្នាំនេះ
- 2018-01-18 04:07:32
- ចំនួនមតិ 0 | ចំនួនចែករំលែក 0
E-Sports គ្រោងបង្ហាញ៨វិញ្ញាសានឹងធ្វើឲ្យកក្រើកកីឡាទ្វីបអាស៊ីឆ្នាំនេះ
ចន្លោះមិនឃើញ
កីឡាអេឡិចត្រូនិក ឬ E-Sports នឹងបង្ហាញខ្លួនដ៏អស្ចារ្យនាឆ្នាំ២០១៨នេះ បន្ទាប់ពីសហព័ន្ធកីឡាអេឡិចត្រូនិកទ្វីបអាស៊ី និងក្រុមប្រឹក្សាអូឡាំពិកអាស៊ីបានសម្រេចដាក់បញ្ចូលក្នុងព្រឹត្តិការណ៍កីឡាទ្វីបអាស៊ីដែលនឹងធ្វើឡើងនាទីក្រុងហ្សាការតា ប្រទេសឥណ្ឌូណេស៊ី។
លោកប្រធានសហព័ន្ធកីឡាអេឡិចត្រូនិកទ្វីបអាស៊ី Kenneth Fok បាននិយាយថា ជឿជាក់ថាឆ្នាំ២០១៨នេះនឹងក្លាយជាឆ្នាំដ៏អស្ចារ្យបំផុតសម្រាប់កីឡា E-Sports ដោយសារបានចូលក្នុងព្រឹត្តិការណ៍កីឡាធំបំផុតគឺ កីឡាទ្វីបអាស៊ី ឬ Asian Games លើកទី១៨។
ក្នុងការស្វាគមន៍ឆ្នាំថ្មីដល់ប្រធានក្រុមប្រឹក្សាអូឡាំពិកអាស៊ីលោក Sheikh Ahmad Al Fahad Al Sabah និងនាយកគ្រប់គ្រងលោក Husain Al Musallam លោក Fok បានអរគុណដល់ក្រុមប្រឹក្សាអូឡាំពិកអាស៊ីដែលបានទទួលយកកីឡា E-Sports សម្រាប់ការបង្ហាញខ្លួនក្នុងព្រឹត្តិការណ៍ទ្វីបអាស៊ីនេះ។
លោក Fok បាននិយាយថា ៖«យើងមាន Games ដ៏រីករាយជាច្រើនសម្រាប់ឆ្នាំ២០១៨នេះ ជាពិសេសកីឡា Asian Games នៅប្រទេសឥណ្ឌូណេស៊ី។ ខ្លួនខ្ញុំផ្ទាល់ជឿជាក់ថា games នឹងទទួលបានជោគជ័យបំផុត»។
«វាពិតជារីករាយសម្រាប់សហព័ន្ធកីឡាអេឡិចត្រូនិកទ្វីបអាស៊ីដែលត្រូវបានអញ្ជើញឲ្យចូលរួមក្នុងព្រឹត្តិការណ៍កីឡានៅទីក្រុងហ្សាការតានេះ ហើយវាពិតជាសំខាន់ណាស់សម្រាប់សហព័ន្ធយើងបោះជំហានឆ្ពោះទៅមុខយ៉ាងរលូនដើម្បីមានលទ្ធភាពបង្ហាញនូវក្រឹត្យក្រម និងវិន័យរបស់យើងឲ្យពិភពលោកបានឃើញក្នុងព្រឹត្តិការណ៍នេះ»។
«ក្នុងនាមជាសហព័ន្ធ E-Sports អាស៊ី ខ្ញុំសូមសម្តែងនូវការអរគុណចំពោះក្រុមប្រឹក្សាអូឡាំពិកអាស៊ីសម្រាប់ការជឿជាក់ និងគាំទ្រដល់សហព័ន្ធយើងខ្ញុំ។ ការទទួលស្គាល់កីឡា e-sports ឲ្យបង្ហាញខ្លួនក្នុងកីឡា Asian Games 2018 បង្ហាញឲ្យឃើញពីភាពរីករាយចម្រើននៅអាស៊ី»។
តាមការគ្រោងទុក សហព័ន្ធកីឡា E-Sports អាស៊ីនឹងបង្ហាញកីឡាអេឡិចត្រូនិកចំនួន៨វិញ្ញាសាក្នុងកីឡា Asian Games លើកទី១៨ ឆ្នាំ២០១៨នេះដើម្បីជំរុញ និងផ្សព្វផ្សាយកីឡាប្រភេទនេះនៅទ្វីបអាស៊ី។
កីឡាទ្វីបអាស៊ី Asian Games លើកទី១៨ ឆ្នាំ២០១៨នឹងរៀបចំការប្រកួតនៅទីក្រុងហ្សាការតា ប្រទេសឥណ្ឌូណេស៊ីពីថ្ងៃទី១៨ ខែសីហា ដល់ថ្ងៃទី២ ខែកញ្ញា ដែលប្រទេសជាសមាជិកក្នុងទ្វីបអាស៊ីទាំងអស់ចូលរួមប្រកួត៕