ពេជ្រ ចរណៃ បង្ហាញស្នាមសាក់យ័ន្ត៨ទិស ក្រោយមានជីវិតជាថ្មី

2018-01-18 04:47:35
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាកីឡាការិនីក្បាច់គុន កញ្ញា ពេជ្រ ចរណៃ ដែលមានជំងឺបេះដូងយ៉ាងធ្ងន់ធ្ងរដែលគ្មានសង្ឃឹមថានឹងរស់រានមានជីវិតឡើយវិញផងនោះ ពេលនេះជីវិតរបស់នាងបានវិលរកសភាពដើមវិញហើយ ក្រោយទៅវះកាត់បេះដូងនៅប្រទេសដៃ អស់ប្រាក់ច្រើនម៉ឺនដុល្លារមក។

ការបង្ហាញខ្លួនជាថ្មីរបស់នាងកាលពីល្ងាចម្សិលមិញនេះ បានធ្វើឲ្យមហាជនចាប់អារម្មណ៍មិនស្ទើរឡើយ ត្បិតអីសម្រស់របស់នាង ហាក់ដូចមិនថមថយឡើយ អ្វីដែលពិសេសនោះ ចរណៃ បានបង្ហាញស្នាមសាក់យ័ន្ត៨ទិសលើកញ្ចឹងករបស់ខ្លួន ជាមួយរ៉ូបពណ៌ខ្មៅ វាលបញ្ចេញសាច់ភ្លៅតិចៗ។

កញ្ញា ពេជ្រ ចរណៃ និយាយប្រាប់ថា ស្នាមសាក់យ័ន្ត៨ទិស លើកញ្ចឹងករបស់នាងនេះ គឺខ្លួនបានសាក់ឡើងជាងកន្លះឆ្នាំមកនេះ គ្រាដែលនាងបានចូលរួមថតភាពយន្តមួយ គឺរឿង"អាគមស្បែកដាច" ដោយក្នុងតួអង្គដែលត្រូវសម្ដែងនោះ នាងជាមនុស្សស្រីក្លាហាន មានស្នាមសាក់បែបនេះតែម្ដង។

តារាស្រីរូបនេះ និយាយថា ស្នាមសាក់ខាងលើ តាមជំនឿ គឺធ្វើឲ្យមនុស្សមានរាសី មានអ្នកតាមការពារ និងធ្វើឲ្យមនុស្សជុំវិញខ្លួនអាណិតស្រលាញ់។ នាងថា តាំងពីនាងសាក់មក ទីផ្សារសិល្បៈរបស់នាងហាក់ដូចប្រសើរជាងមុខ មានគេអាណិតច្រើន ជាក់ស្ដែងខ្លួននាងចូលសិល្បៈច្រើនឆ្នាំហើយ ប៉ុន្តែមិនមានមហាជនស្គាល់ទេ ហើយជំងឺបេះដូងរបស់នាង បើអត់មានសប្បុរសជនអាណិត ជួយ រូបនាងក៏មិនមានជីវិតរបស់ដល់បច្ចុប្បន្ននេះឡើយ។

បច្ចុប្បន្នសុខភាព របស់ កញ្ញា ពេជ្រ ចរណៃ ស្ទើរតែជា១០០%ហើយ ប៉ុន្តែនាងត្រូវទៅតាមដាន តាមការណាត់របស់វេជ្ជបណ្ឌិតម្ដងម្កាល ដែលបន្តរហូតដល់១ឆ្នាំទៀត ។ គិតមកដល់ថ្ងៃនេះ ជំងឺរបស់នាងបានបានចំណាយប្រាក់ជាង២ម៉ឺនដុល្លារ ក្នុងការព្យាបាល។ ក្នុងចំណោមសប្បុរសជនជាច្រើននាក់ដែលបានជួយនាងអតីតតារាភាពយន្តជើងចាស់ លោក ខៃ ប្រសិទ្ធ គឺជាសប្បុរសជនដែលបានចំណាយជួយនាងច្រើនជាងគេ។

ដោយមិនគិតថ្លៃ សំបុត្រយន្តហោះ និង ការចាយវាយផ្សេងទៀត លោក ខៃ ប្រសិទ្ធ ធ្វើដំណើរពីប្រទេសអូស្ត្រាលី ហើយចំណាយពេល២ថ្ងៃ មកមើលស្ថានភាព ជំងឺ កញ្ញា ពេជ្រ ចរណៃ ដល់ប្រទេសថៃ និងបានផ្ដល់ប្រាប់ចំនួន១៨ ០០០ ដុល្លារ ដើម្បីចេញថ្លៃវះកាត់បេះដូង របស់នាង។

ពេជ្រ ចរណៃ ថ្លែងថា ខ្លួនបានចាត់ទុក លោក ខៃ ប្រសិទ្ធ គឺជាឪពុកទី២ របស់នាង ហើយមិនអាចភ្លេចគុណឡើយ ក្នុងមួយជីវិតរបស់នាង។ ជាមួយគ្នានោះ នាងក៏សូមថ្លែងអំណរអរគុណដល់សប្បុរសជនផ្សេងទៀត ទាំងក្នុងនិងក្រៅប្រទេស ដែលបានជួយស្រោចស្រង់ជីវិតនាងឡើងវិញ។

ងាកមកការសិល្បៈវិញ ចរណៃ ប្រាប់ថា ខ្លួនចាប់ផ្ដើមទទួលការងារបណ្ដើរហើយ ប៉ុន្តែចំពោះការថតបែបលោតទាត់ធាក់ ដូចមុន គឺកន្លះឆ្នាំទៀតបានអាចធ្វើបានដូចដើម៕

អត្ថបទៈ ស៊ុនហួត