De Gea កំពុងធ្វើឲ្យ Man Utd ព្រួយចិត្តឥតល្អែ
- 2018-01-19 13:13:19
- ចំនួនមតិ 0 | ចំនួនចែករំលែក 0
De Gea កំពុងធ្វើឲ្យ Man Utd ព្រួយចិត្តឥតល្អែ
ចន្លោះមិនឃើញ
អ្នកចាំទី David De Gea ក្នុងថ្ងៃនេះ បានបដិសេធក្នុងការនិយាយទាក់ទងនឹងការចរចាកុងត្រាថ្មីជាមួយ Manchester United ខណៈកុងត្រាបច្ចុប្បន្ននឹងផុតសុពលភាពនៅ ១ ឆ្នាំកន្លះខាងមុខ។
កីឡាករចាំទី De Gea បានថ្លែងប្រាប់ Sky Sports ថា៖ "ខ្ញុំមិនគិតថា ឥឡូវជាពេលវេលាសមស្របក្នុងការនិយាយពីរឿងអនាគតឡើយ។ សម្រាប់ខ្ញុំ ឥឡូវនេះមិនមែនជាពេលសម្រាប់និយាយរឿងការចរចាកុងត្រាថ្មីនោះឡើយ"។
អ្នកចាំទីអេស្ប៉ាញរូបនេះបន្ត៖ "យើងនៅ មានប្រកួតជាច្រើនដែលយើងត្រូវផ្ដោតអារម្មណ៍ទៅលើ ជាពិសេសគឺពេលប៉ះជាមួយ Burnley នៅចុងសប្ដាហ៍នេះ។ ឥឡូវនេះ គឺជាពេលដែលយើងត្រូវអោនមុខចុះ ខំហ្វឹកហាត់ និងប្រឹងប្រែងលេងដើម្បីរកពិន្ទុក្នុងលីគឲ្យបានកាន់តែច្រើន"។
បើទោះជាបដិសេធក្នុងការនិយាយពីកុងត្រាថ្មី De Gea ក្នុងពេលជាមួយគ្នានេះដែរ ក៏បានបន្តនិយាយសរសើរក្លឹបបិសាចក្រហម ដោយព្រមទាំងហៅក្លឹប ថាក្លឹបពិសេសទៀតផង។
សូមបញ្ជាក់ផងដែរ មានពាក្យចចាមអារ៉ាមតាំងពីយូរមកហើយដែលថា ក្លឹប Real Madrid ចង់បាន De Gea នោះ ក្នុងនោះ មានទាំងពេលមួយ ក្នុងទីផ្សារដោះដូរខែក្ដៅឆ្នាំ ២០១៥ កីឡាករអេស្ប៉ាញហៀបនឹងចូលរួមជាមួយក្លឹបអធិរាជពណ៌ស បាត់ទៅហើយ ប៉ុន្តែដោយសារតែការបញ្ជូនឯកសារផ្ទេរយឺត ទើបធ្វើការផ្ទេរនេះមិនបានសម្រេច។
កុងត្រាបច្ចុប្បន្នរបស់ De Gea ជាមួយ Manchester United នឹងផុតសុពលភាពនៅចុងរដូវកាល ២០១៨/២០១៩ ពោលគឺជាង ១ឆ្នាំ កន្លះទៀត៕