អនាគត Vidal ជាមួយនឹង Bayern Munich ចាប់ផ្ដើមស្រពិចស្រពិលហើយពេលនេះ!
- 2018-01-22 12:42:11
- ចំនួនមតិ 0 | ចំនួនចែករំលែក 0
អនាគត Vidal ជាមួយនឹង Bayern Munich ចាប់ផ្ដើមស្រពិចស្រពិលហើយពេលនេះ!
ចន្លោះមិនឃើញ
ខ្សែបម្រើ Arturo Vidal ក្នុងថ្ងៃនេះ ហាក់បង្ហាញភាពមិនច្បាស់លាស់ពីអនាគតខ្លួននៅក្លឹប Bayern Munich។
Vidal បានប្រាប់អ្នកកាសែតថា៖ "ខ្ញុំនឹងនៅលេងនៅឲ្យក្លឹបនេះ (Bayern) រហូតដល់ខែមិថុនា ហើយឥឡូវខ្ញុំកំពុងសប្បាយចិត្តធម្មតា"។ ខ្សែបម្រើរូបនេះ បានបន្តទៀតថា៖ "ខ្ញុំសង្ឃឹមថាខ្ញុំអាចឈ្នះ Champions League រដូវកាលនេះជាមួយ Bayern។ ដល់ពេលហ្នឹង ចាំគិតទៀតទាក់ទងរឿងអនាគតរបស់ខ្ញុំ"។
ការថ្លែងដែលមានសភាពច្បាស់លាស់របស់ Vidal នេះ ធ្វើឡើងប៉ុន្មានថ្ងៃប៉ុណ្ណោះ ក្រោយក្លឹប Bayern បានប្រកាសទិញខ្សែបម្រើ Leon Goretzka ពីក្លឹប Schalke 04 ដែលគ្រោងចូលរួមជាផ្លូវការជាមួយក្លឹបនៅពេលខែក្ដៅខាងមុខ។ ការផ្ទេរនេះ ត្រូវបាន Metro យល់ឃើញថា អាចធ្វើឲ្យ Vidal បាត់បង់តួនាទីសំខាន់ក្នុងក្លឹប។
កន្លងមក មានពាក្យចចាមអារ៉ាមជាច្រើន ដែលបានអះអាងថា ក្លឹប Chelsea បានប្រឹងប្រែងយ៉ាងសស្រាក់សស្រាំក្នុងការតាមទិញVidal ពី Bayern។ អ្នកចាត់ការក្លឹបតោខៀវ លោក Antonio Conte បានសរសើរមិនដាច់ពីមាត់អំពីកីឡាករស៊ីលី ហើយព្រមទាំងហៅគេថា ជាកីឡាករមួយក្នុងចំណោមកីឡាករល្អបំផុតលើលោកទៀតផងកាលពីពេលថ្មីៗកន្លងទៅនេះ។ សូម្បី Vidal ខ្លួនឯងផ្ទាល់ កាលពីដើមខែនេះ ក៏បានទទួលស្គាល់ថា ខ្លួនពិតជាបានដឹងពីការចាប់អារម្មណ៍របស់ Chelsea មកលើខ្លួនថែមទៀតផង។
ទោះជាយ៉ាងណា ក្លឹប Bayern បានបដិសេធពាក្យចចាមអារ៉ាមនេះ ហើយនិយាយច្បាស់ៗថានឹងមិនលក់ទេ Vidal ក្នុងទីផ្សារដោះដូរខែនេះ។
ដោយសារ Bayern ទើបតែប្រកាសទិញខ្សែបម្រើថ្មី ខណៈ Vidal ហាក់បង្ហាញគោលចំហមិនច្បាស់ពីអនាគតខ្លួន ធ្វើឲ្យកម្រើកនូវពាក្យល្ហេចល្ហៀងជាថ្មី ដែលថាកីឡាករស៊ីលី អាចនឹងទៅចូលរួមជាមួយ Chelsea នៅអំឡុងពេលខែក្ដៅខាងមុខ៕