ត្រឹមជាអ្នកឡើងត្នោត ចំណូលប្រហែលអ្នកធ្វើការនៅទីក្រុង
- 2018-01-24 03:01:09
- ចំនួនមតិ 0 | ចំនួនចែករំលែក 0
ត្រឹមជាអ្នកឡើងត្នោត ចំណូលប្រហែលអ្នកធ្វើការនៅទីក្រុង
ចន្លោះមិនឃើញ
ដើម្បីរំដោះខ្លួនពីភាពក្រីក្រ និងមិនចង់ធ្វើការក្រៅប្រទេស កសិកររស់នៅស្រុកបាភ្នំ ខេត្តព្រៃវែង ប្រឹងប្រែងបង្កើនចំណូលបន្ថែមតាមរយៈការធ្វើស្ករត្នោត។ មុខរបរនេះមានចំណូលជាមធ្យម អាចរកបាន ចន្លោះពី ១លានរៀល ទៅ ២លានរៀលជាប្រចាំក្នុងមួយខែៗ។ ចំពោះចំណូលប៉ុននេះ អាចនិយាយបានថាមិនតិចទេ សម្រាប់អ្នករស់នៅជនបទ។
ស្របគ្នានេះ លោក ណៃ ម៉ន ដែលជាកសិករពេញកម្លាំងម្នាក់ រស់នៅក្នុងភូមិពោធិ៍អណ្ដោត ឃុំជើងភ្នំ ស្រុកបាភ្នំ ខេត្តព្រៃវែងលើកឡើងថា លោកសប្បាយចិត្តជាមួយអាជីពលោកបច្ចុប្បន្ន ព្រោះចំណូលប៉ុណ្ណេះ គឺសមល្មមគ្រប់គ្រាន់អាចចិញ្ចឹមគ្រួសារ៤នាក់រស់នៅយ៉ាងសុខស្រួល ដោយមិនចាំបាច់ឆ្ងាយផ្ទះទៅធ្វើការស្រុកគេឡើយ។
លោក ណៃ ម៉ន បានប្រាប់ Sabay ថា ក្រៅពីធ្វើស្រែចំការ លោកបានឆ្លៀតឡើងដើមត្នោតមួយថ្ងៃៗមិនក្រោមពី ២០ដើមនោះឡើយ ដោយក្នុងមួយដើមលោកអាចរកទឹកត្នោត បានប្រហែល៥ ទៅ ១០ លីត្រ។ ម្យ៉ាងរបរឡើងត្នោត អាចរកទឹកបានទៅតាមរដូវ ក្នុងនោះចាប់ខែធ្នូ ដល់ ខែឧសភា ជារដូវគេធ្វើស្ករត្នោត។
បន្ទាប់មកលោកយកទឹកត្នោតទាំងនោះឲ្យប្រពន្ធទៅកូរជាស្ករត្នោតសម្រាប់លក់។ លោក បន្តថា ស្ករត្នោតមួយគីឡូក្រាម លក់បានតម្លៃ ៥ពាន់រៀល ហើយតម្លៃនេះគឺទាបជាងទីផ្សារ ដោយសារក្នុងភូមិមានអ្នកធ្វើច្រើន។ ជារៀងរាល់ថ្ងៃ លោកមានម៉ូយស្ករត្នោតច្រើនគួរសមមកទិញមិនក្រោម ១០គីឡូឡើយ ហើយអ្នកទិញគេត្រូវការច្រើនជាងនេះ ប៉ុន្តែលោកមិនអាចបំពេញតាមតម្រូវការបាន ព្រោះធ្វើមិនទាន់។
កសិកររូបនេះ ឲ្យដឹងបន្ថែមថា សព្វថ្ងៃក្រៅពីធ្វើស្រែសម្រាប់ទប់ក្រពះប្រចាំឆ្នាំ ចំណូលពីការធ្វើស្ករត្នោតគឺជាចំណែកធំមួួជួយគ្រួសារលោកប្រចាំថ្ងៃប្រមាណ ៤ ទៅ ៥ម៉ឺនរៀល ៖ «ខ្ញុំម្នាក់ឯងចិញ្ចឹមគ្រួសារបួននាក់បានស្រួលដោយសារឡើងត្នោតនេះ ... ហើយកូនៗខ្ញុំសុទ្ធតែបានរៀនសូត្រទាំងអស់»។ យ៉ាងណាក្ដី លោកក៏ត្រូវចំណាយថ្លៃដើមដូចជា ការជួលដើមត្នោត ត្រូវផ្ដល់កម្រៃឲ្យគេវិញជាទឹកត្នោត ៣លីត្រក្នុងមួយដើម។
ប្រភពខាងលើបន្តថា នៅក្នុងស្រុកបាភ្នំបច្ចប្បន្នដើមត្នោតមិនសូវសំបូរដូចមុនទេ ដែលវាបញ្ហាប្រឈមធំបំផុត ប្រសិនបើអត់ពីដើមត្នោតទាំងនេះទៅ លោកនិងគ្រួសារប្រាកដជាជួបការលំបាកខ្លាំងជាមិនខាន ដោយលោកសូមឲ្យអាជ្ញាធរចូលរួមអភិរក្សដើមត្នោតខ្មែរឲ្យបានយូរអង្វែង។ ស្របគ្នានេះ លោកចង់ឲ្យប្រជាពលរដ្ឋជួយគាំទ្រផលិតផលខ្មែរ ពីព្រោះជាការលើកទឹកចិត្តដល់ការផលិតក្នុងស្រុក៕
ចុចអានបន្ថែម៖