ផ្សារហ៊ុនជប៉ុនមួយត្រូវពួក Hacker ប្លន់យកលុយអស់ ៥៣០ លានដុល្លារតាមអ៊ីនធឺណេត

2018-01-27 06:35:41
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមរបាយការណ៍ប្រព័ន្ធផ្សព្វផ្សាយជប៉ុនបានឱ្យដឹងថា ផ្សារហ៊ុនជប៉ុនមួយបានខាតបង់ថវិកាចំនួន ៥៨ ពាន់លានយ៉េន (ប្រមាណ៥៣០ លានដុល្លារ) គិតជាប្រភេទរូបិយប័ណ្ណអេឡិចត្រូនិកហៅថា Cryptocurrency ដោយសារការលួចប្លន់តាមអ៊ីនធឺណិត ឬ Hack។

ផ្សារហ៊ុន Coincheck បានឱ្យដឹងនៅលើវិបសាយរបស់ខ្លួនកាលពីថ្ងៃសុក្រទី ២៦ មករាថា ខ្លួនបានផ្អាកការលក់និងការដករូបិយប័ណ្ណ ដែលហៅថា NEM។ ក្រុមហ៊ុនបានបន្ថែមទៀតថា ខ្លួនបានរឹតបន្តឹងលើការជួញដូរក្នុងរូបិយវត្ថុប្រភេទ Cryptocurrency ដទៃទៀតផងដែរ។

នៅក្នុងសន្និសីទកាសែតមួយនៅរាត្រីថ្ងៃសុក្រ ប្រធានផ្សារហ៊ុន Coincheck លោក កយឈីរ៉ូ វ៉ាដា បានឱនក្បាលលំទោនសុំទោស។ លោកបន្តថា ក្រុមហ៊ុនអាចនឹងស្វែងរកជំនួយផ្នែកហិរញ្ញវត្ថុ។ នេះបើយោងតាមទីភ្នាក់ងារសារព័ត៌មានក្យូដូ។ រូបភាពវីដេអូរបស់ទូរទស្សន៍ជប៉ុនបានបង្ហាញ អតិថិជនមួយក្រុមតូចឈរនៅខាងក្រៅការិយាល័យកណ្តាលរបស់ក្រុមហ៊ុននេះនៅក្រុងតូក្យូ កាលពីរាត្រីថ្ងៃសុក្រ។

លោក កយឈីរ៉ូ វ៉ាដា ប្រធានផ្សារហ៊ុន Coincheck

ផ្សារហ៊ុន Coincheck ដែលហៅខ្លួនឯងថាផ្សារប្តូរប្រាក់ប្រភេទ Bitcoin និង Cryptocurrency ឈានមុខគេនៅក្នុងទ្វីបអាស៊ី បាននិយាយថា ខ្លួនបានរកឃើញការចូលលុកលុយដោយគ្មានការអនុញ្ញាតលើប្រព័ន្ធរបស់ខ្លួន នៅម៉ោងប្រហែល ៣ ព្រឹក។ ការខាតបង់ ដែលបានរាយការណ៍នេះ គឺខ្ពស់ជាងការខាតបង់ចំនួន ៤៨ ពាន់លានយ៉េន ដែលផ្សារហ៊ុន Mt. Gox របស់ជប៉ុនធ្លាប់ខាតបង់កាលពីឆ្នាំ ២០១៤៕

ប្រភព ៖ rasmeinews.com