ល្ងាចនេះ បឹងកេត ប៉ះ Lao Toyota ទាំងស្រពិចស្រពិល

2018-01-29 01:30:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជើងឯកលីគកំពូលកម្ពុជា បឹងកេត ត្រូវទទួលស្វាគមន៍ក្រុមឡាវ Lao Toyota ក្នុងព្រឹត្តិការណ៍ជម្រុះពានរង្វាន់លំដាប់ទី២របស់អាស៊ី AFC Cup នៅពហុកីឡដ្ឋានជាតិ ប៉ុន្តែក្រុមកម្ពុជានេះនឹងប្រកួតទាំងស្រពិចស្រពិល។

លោកគ្រូ កែវ កុសល ចាប់ដៃលោកគ្រូ Fukuda

បន្ទាប់ពីបញ្ចប់យុទ្ធនាការណ៍លីគបាល់ទាត់កំពូលកម្ពុជារដូវកាល២០១៧ ក្រុមបឹងកេតបានក្លាយជាជើងឯក ប៉ុន្តែក្រុមទាំងមូលមិនបានត្រៀមខ្លួនអ្វីសោះឡើយសម្រាប់ការប្រកួតពានរង្វាន់ AFC Cup នេះ។ ដើមឡើយបឹងកេតទទួលបានដំណឹងថា នឹងបានកៅអីប្រកួតវគ្គតាមពូល ប៉ុន្តែក្នុងរយៈពេលខ្លីចុងក្រោយនេះ បែរជាត្រូវប្រកួតវគ្គសន្សំពិន្ទុ ដោយសារក្រុម Lao Toyota បានតវ៉ាទៅនឹងសហព័ន្ធបាល់ទាត់ទ្វីបអាស៊ី និងបានឈ្នះក្តីលើការពិន័យរបស់សហព័ន្ធបាល់ទាត់ទ្វីបអាស៊ី ហើយបានឱកាសលេងពានរង្វាន់ AFC Cup វិញ។ ហេតុផលនេះហើយបានធ្វើក្លឹបបឹងកេត ក៏ដូចជា Lao Toyota មានរយៈពេលខ្លីប៉ុណ្ណោះដើម្បីត្រៀមខ្លួនសម្រាប់ការប្រកួតល្ងាចនេះ។

មិនត្រឹមតែប៉ុណ្ណោះ ក្រុមជើងឯកលីគកំពូលកម្ពុជា៣សម័យកាលត្រូវបានលេចឮតៗគ្នាថា មិនទាន់ច្បាស់ការណ៍ពីអនាគតនៅពេលខាងមុខផង។ ការរៀមចំក្លឹបសម្រាប់រដូវកាលថ្មី បឹងកេតមិនទាន់បានត្រៀមខ្លួននៅឡើយទេពោលគឺនៅរក្សាកីឡាករចាស់ៗកាលពីរដូវកាល២០១៧ ខណៈកីឡាករខ្លះក៏បានចេញពីក្រុមទៅកាន់ទ្រនំថ្មីថែមទៀត។ ពាក់ព័ន្ធនឹងចំណុចនេះ លោក បែ មករា អ្នកចាត់ការរបស់ក្លឹបបឹងកេតមិនអាចបញ្ជាក់បានឡើយ ប៉ុន្តែប្រាប់ថា អ្វីៗនឹងល្អប្រសើរនាពេលខាងមុខ។

ក្នុងសន្និសីទសារព័ត៌មានកាលពីម្សិលមិញ បឹងកេតបានតែងតាំងលោក កែវ កុសលដែលមានសញ្ញាប័ត្រ A-License ដើម្បីដឹកនាំការប្រកួតពានរង្វាន់អន្តរជាតិលំដាប់អាស៊ីនេះ។ ជុំវិញការប្រកួតល្ងាចនេះ លោកគ្រូបង្វឹកថ្មីបាននិយាយថា វាមានពេលតែ១០ថ្ងៃប៉ុណ្ណោះ ដូច្នេះការត្រៀមខ្លួនមិនបានដិតដល់ទេ។ លោករក្សាទម្រង់លេងចាស់ដដែល។

លោកបញ្ជាក់ថា ៖«ចំណុចខ្វះខាតរបស់បឹងកេតគឺនៅពេលយើងប្រយុទ្ធគេ ហើយបាត់បាល់ ពេលនោះយើងត្រឡប់មកចុះការពារយឹត។ ដូច្នេះចំណុចនេះហើយដែលខ្ញុំត្រូវបំពេញបន្ថែមគឺត្រូវចុះទាំងអស់ដើម្បីការពារ»។ លោកគ្រូបង្វឹករូបនេះចូលមកដឹកនាំបឹងកេតត្រឹមរយៈពេលខ្លីប៉ុណ្ណោះ។

ក្រុមបឹងកេត

ចំណែកគ្រូបង្វឹក Lao Toyota ក៏មិនខុសពីលោកគ្រូបឹងកេតកេតដែរ។ លោក Jun Fukuda បាននិយាយថា លោកមានរយៈពេលខ្លីសម្រាប់ការត្រៀមខ្លួននេះ ប៉ុន្តែសម្រាប់ការប្រកួតល្ងាចនេះអាចដំណើរការទៅបាន។ ចំណែកប្រធានក្រុម Lao Toyota កីឡាករ Kazuo បាននិយាយថា ក្រុមរបស់គេមកកម្ពុជានេះដើម្បីទទួលបាន៣ពិន្ទុយកផ្ទះវិញ។

ការប្រកួតជើងទី១រវាងម្ចាស់ផ្ទះបឹងកេត និង Lao Toyota នឹងចាប់ផ្តើមវេលាម៉ោង៦:៣០នាទីល្ងាចនេះនៅពហុកីឡដ្ឋានជាតិដោយមានការផ្សាយផ្ទាល់តាមរយៈទូរទស្សន៍ MYTV។ សំបុត្រសម្រាប់ចូលទស្សនាតម្លៃ៨ពាន់រៀល និង៤ពាន់រៀល៕

វ៉ាហេទ និង ចាន់ណា ឈ្នះពានប្រជាប្រិយ ស្របពេល មុន្នីឧត្តម ឈ្នះពានកីឡាករឆ្នើម

គ្រូ ទ័ព មើលឃើញ កីឡាករបរទេសទេសឆ្នាំនេះល្អជាងកូរ៉េខាងជើង

អត្ថបទ៖ ជាន ចាន់រ៉ា