អេនឌី ថា លោកចាប់ផ្ដើមហត់ចិត្ត អន់ចិត្ត និងអស់ទាំងកម្លាំងកាយហើយ!

2018-02-02 10:14:52
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមសារវែងអន្លាយលើបណ្ដាញសង្គម អេនឌី ថាពេលនេះ លោកហត់ចិត្តហើយ កម្លាំងកាយក៏អស់ដែរ ព្រោះតែមិនដឹងធ្វើម៉េចតទៅទៀត ដើម្បីតម្រូវចិត្តទស្សនិកជននោះឡើយ។

ការត្អូញត្អែរនេះ បន្ទាប់ពី អេនឌី បានបញ្ចេញស្នាដៃតាមរយៈវីដេអូចម្រៀង២-៣បទមកហើយ ដែលក្នុងនោះលោកបានបញ្ចូលនូវរសជាតិសិចស៊ីរបស់តារាស្រីល្បីៗមាន កែវ ស្រីនាង សុខ សោម៉ាវត្តី និងឌុច លីដា ជាដើម។ ប៉ុន្តែជាលទ្ធផល ការខិតខំរបស់លោកត្រូវសងត្រឡប់មកវិញនូវការជេរ តិះដៀល ជាជាងការរិះគន់កែលម្អ។

ឃើញការរិះគន់ទាំងនោះ លោកថា ហត់ចិត្តណាស់ ព្រោះមិនដឹងថា គួរធ្វើយ៉ាងណាទៀត ដើម្បីឲ្យត្រូវចិត្តប្រិយមិត្ត ត្បិតថា ធ្វើសាច់រឿងធម្មតា មិនមានអ្នកមើល មិនមានអ្នកគាំទ្រ។ ប៉ុន្តែធ្វើបញ្ចូលភាពសិចស៊ី មានអ្នកមើលច្រើន តែរិះគន់ក៏ច្រើន។ ចំណុចនេះ អេនឌី ថា អ្នកមើល និងអ្នករិះគន់ភាពសិចស៊ីនោះ គឺជាមនុស្សតែមួយ។ ដូច្នេះហើយ អ្នកសិល្បៈដូចលោក ចាំតែខុសប៉ុណ្ណោះ!

"ខ្ញុំខំអស់ពីលទ្ធភាពរបស់ខ្ញុំហើយ អ្នកទាំងអស់គ្នាមានយល់អត់?និយាយវាងាយស្រួលជាងធ្វើ MV ខ្ញុំសិចស៊ី មានអ្នកមិនពេញចិត្ត និងជេរ តែចូលចិត្តមើលច្រើន តែពេលខ្ញុំថតធម្មតាអ្នកមិនដែលយកភ្នែកមើល រឺក៏សរសើរទេ និយាយទៅអ្នកសិល្បៈខ្មែរ គឺមានតែពាក្យថាខុសមួយមុខប៉ុណ្ណោះ ចុះបើអ្នកមិនចូលចិត្តMV របៀបសិចស៊ី អ្នកកុំមើល កុំគាំទ្រ វាចប់បាត់ទៅហើយ លើកក្រោយមានអ្នកណាហ៊ានថតទៀត តែនេះចូលចិត្តមើល រួចហើយជេរ ហើយថាខ្លួនឯងហ្នឹងត្រឹមត្រូវ"។

អេនឌី បន្តថា លោកមិនខ្លាចនឹងទទួលយកការរិះគន់ទេ ប៉ុន្តែគួរបងប្អូនរិះគន់ ក្នុងន័យកែលម្អ ជាជាងប្រើពាក្យអសុរោះ ជេរ ឬបន្តុះបង្អាប់ ឲ្យគេឃើញពីភាពមិនថ្លៃថ្នូររបស់ខ្មែរ។ ដូច្នេះហើយ លោកថា ប្រសិនបើបងប្អូនរិះគន់កែលម្អ ដោយប្រើពាក្យសមរម្យ គឺជារឿងល្អទាំងសង្ខាង ហើយលោកក៏រីករាយទទួល នូវចំណុចណាដែលអាចប្រើដើម្បីអភិវឌ្ឍស្នាដៃរបស់លោកដែរ។

នាមួយរយៈចុងក្រោយនេះ អេនឌី បានសម្រុកការងារផលិតបទចម្រៀងបន្តបន្ទាប់ ក្នុងនោះមានទាំងប្រភេទ Original Song និង Cover បទមរតកដើម។ បទនីមួយៗ សុទ្ធរំលេចភាពសិចស៊ី ដែលជាមួយគ្នា អ្នកមើលក៏ច្រើន រិះគន់ក៏ច្រើន។ វីដេអូចម្រៀងទាំងនោះមានដូចជា "នឹកបង៥០%” “មនុស្សសំខាន់សម្រាប់ថ្ងៃថ្មី" និងបទ "វិលវិញអូន"។

លោក អេនឌី ក៏ត្រៀមនឹងបញ្ចេញវីដេអូចម្រៀងបទថ្មីទៀតក្នុងពេលឆាប់ៗ។ បទនោះមានចំណងជើងថា "ទីបំផុតទើបដឹងថាគេកុហក" ដែលបច្ចុប្បន្នកំពុងដំណើរការថត ដោយបានយក កែវ ស្រីនាង និងទឹម រដ្ឋា ជាតួសម្ដែង៕