ដល់ពេលដែល Wenger ដាក់ការរំពឹឹងទុកខ្ពស់លើ Ozil ហើយ!

2018-02-02 12:29:33
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការ Arsenal លោក Arsene Wenger បានចង់ឲ្យខ្សែបម្រើប្រយុទ្ធ Mesut Ozil ធ្វើជាកីឡាករបង្គោល ក្នុងការដឹកនាំក្លឹបទៅរកភាពជោគជ័យ។ ការពោលនេះគឺធ្វើឡើងប៉ុន្មានម៉ោងប៉ុណ្ណោះ ក្រោយកីឡាករអាល្លឺម៉ង់ទើបចុះកុងត្រាថ្មីជាមួយក្លឹបដែលមានសុពលភាពដល់ឆ្នាំ ២០២១។

ក្នុងសន្និសីទសារព័ត៌មាន លោក Wenger បាននិយាយថា៖ "គេ (Ozil) បានចុះកុងត្រាថ្មីជាមួយក្លឹប នៅពេលដែលក្លឹបកំពុងមានស្ថានភាពមិនប្រាកដប្រជាថានឹងបានលេង Champions League នៅរដូវកាលក្រោយ។ មនុស្សជាច្រើនបាននិយាយ គេនឹងមិនចុះទេនូវកុងត្រាថ្មីជាមួយយើង។ ទោះជាយ៉ាងណា គេបានសម្រេចបន្តរួមរស់ជាមួយយើង។ ដូច្នេះវាជាព័ត៌មានល្អសម្រាប់យើង"។

អ្នកចាត់ការសញ្ជាតិបារាំងបានគូសបញ្ជាក់ច្បាស់ៗទៀតថា៖ "អ្វីដែលខ្លួនខ្ញុំផ្ទាល់ រំពឹងពីរូបគេ គឺចង់ឲ្យគេហ្នឹងដឹកនាំក្រុមទៅរកភាពជោគជ័យនៅក្នុងការប្រកួត"។

កន្លងមកមានពាក្យចចាមអារ៉ាមជាច្រើន Mesut Ozil អាចនឹងចាកចេញពីក្លឹប Arsenal ក្នុងការដោះដូរខែមុន។ ទោះជាយ៉ាងណា មិនត្រឹមមិនចេញទេ កីឡាករអាល្លឺម៉ង់ថែមទាំងចុះកុងត្រាថ្មីជាមួយក្លឹបក្នុងថ្ងៃនេះថែមទៀត ដើម្បីបញ្ជាក់ពីភាពច្បាស់លាស់នូវអនាគតខ្លួននៅជាមួយក្លឹប។

Arsenal បច្ចុប្បន្នកំពុងឈរលេខ ៦ក្នុងតារាង Premier League មាន ៨ពិន្ទុ តិចជាង Chelsea ដែលកំពុងឈរលេខ ៤ និង ២៦ពិន្ទុ ពី Manchester City ដែលកំពុងស្ថិតនៅកំពូលតារាង៕

ប្រភព៖ Goal ប្រែសម្រួល៖ ហ៊ីម រស្មី