មកស្គាល់ពិធីបុណ្យប្លែកៗទាំង១៥ជុំវិញពិភពលោក

2018-02-04 08:46:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្វីបើយើងរស់នៅក្នុងសម័យសាកលភាវូបនីយកម្មក៏ដោយក៏ប្រពៃណីជាច្រើនរបស់មនុស្សនៅជុំវិញពិភពលោកគឺគួរឱ្យភ្ញាក់ផ្អើលហើយវាហាក់ដូចជាមិនធម្មតានិងចម្លែក។ មានហេតុផលល្អៗជាច្រើនដែលយើងគួរតែដកពិសោធន៍យ៉ាងហោចណាស់ម្តងឲ្យបានស្គាល់បុណ្យទាំងនោះ។

ខាងក្រោមនេះគឺជាពិធីបុណ្យប្លែកៗ១៥នៅជុំវិញពិភពលោក៖

១៥ ពិធីបុណ្យ Thaipusam Hindu Piercing

ជាពិធីបុណ្យឈឺសាចរបស់សាសនាហិណ្ឌូ។ អ្នកកាន់សាសនាហិណ្ឌូនៅប្រទេសម៉ាឡេស៊ី និង សឹង្ហបុរីច្រើនប្រារព្ធវានៅក្នុងខែរងារ (ចន្លោះពីខែធ្នូ ដល់ កុម្ភៈ)។ អ្នកហិណ្ឌូបានទម្លុះស្បែកខ្នងរបស់ពួកគេដោយដែកមុតស្រួចនិងចងភ្ជាប់ដោយរបស់ដែលគេហៅ "kavadis" ហើយទុករយៈពេល១០ម៉ោង។ ជំនឿនេះត្រូវបានធ្វើឡើងដើម្បីលាងបាបចេញពីខ្លួន។

១៤ El Colacho ពិធីបុណ្យលោតរំលងទារក នៅប្រទេសអេស្ប៉ាញ

ពីធីបុណ្យ El Colacho នេះត្រូវបានគេធ្វើឡើងជាង៤០០ឆ្នាំមកហើយ។ មានមនុស្សស្លៀកពាក់ក្រហមលឿងតុបតែងជាបិសាច រត់ពេញភូមិ។ បន្ទាប់មកសំលេងស្គរបន្លឺឡើង ហើយបិសាចទាំងនោះលោតរំលងទារក១ខួប។ គេជឿថាពិធីបុណ្យនេះនឹងការពារទារកពីសំណាងអាក្រក់ ហើយនិងលាងបាបផងដែរ។

១៣ ពិធីបុណ្យភក់ Boryeong ប្រទេសកូរ៉េខាងត្បូង

រៀងរាល់ខែកក្កដាអ្នកអាចចូលរួមក្នុងពិធីបុណ្យភក់ Boryeong របស់កូរ៉េខាងត្បូងនៅលើឆ្នេរនៃសមុទ្រលឿង។ ក្រៅពីងូតភក់ក៏មានពិធីផ្សេងៗ ដូចជារត់ម៉ារ៉ាតុង និង ការរាំកម្សាន្តជាដើម ដែល សកម្មភាពទាំងនេះបានទាក់ទាញមនុស្សពីជុំវិញពិភពលោកទៅកាន់ទីក្រុងប៊ូយ៉ុងប្រទេសកូរ៉េខាងត្បូង។

១២ ពីធីជប់លៀងប៊ូហ្វេឲ្យស្វា នៅប្រទេសថៃ

រៀងរាល់ខែវិច្ឆិកាអ្នកស្រុកលុមបូរីបានធ្វើ ពីធីជប់លៀងប៊ូហ្វេឲ្យស្វា ដែលគេជឿថានឹងនាំមកនូវសំណាងល្អជូនពួកគេ។ ម្ហូបអាហារថៃ និង ផ្លែឈើជាង៤តោនបានដាក់តម្រៀបនៅជិតប្រាសាទខ្មែរ (តែប្រភពព័ត៌មាន brightside.me មិនបានបញ្ជាក់ថាឈ្មោះប្រាសាទអ្វីទេ) ឲ្យពួកពានរឆីឆ្ងាញ់មាត់តាមចិត្តចង់។ ទីនោះត្រូវបានគេឲ្យឈ្មោះថា "ទីក្រុងពានរ ឬ The City of Monkeys” ហើយបានទាក់ទាញភ្ញៀវទេសចរជាច្រើនទៅទស្សនា។

១១ ពិធី La Tomatina របស់អេស្ប៉ាញ

ពិធី La Tomatina ឬ អាចហៅបានថា សមរភូមិប៉េងប៉ោះ ព្រោះពិធីបុណ្យនេះត្រូវបានទីក្រុងតូចមួយរបស់អេស្ប៉ាញឈ្មោះ Bunol ប្រារព្ធធ្វើជារៀងរាល់ឆ្នាំ។ ប៉េងប៉ោះរាប់ឡានកាម៉ាសត្រូវបានបម្រុងទុកដើម្បីប្រយុទ្ធគ្នា។ ចរិតលក្ខណៈពិធីបុណ្យនេះស្រដៀងគ្នាទៅនឹងបុណ្យភក់នៅកូរ៉េដែរ។

១០ Saidai-ji Eyo Hadaka របស់ជប៉ុន

ពិធីបុណ្យនេះត្រូវបានចាត់ទុកថាធំលំដាប់ទី៣ដែរនៅជប៉ុន ប៉ុន្តែអ្នកចូលលេងក្នុងពីធីបុណ្យ Saidai-ji Eyo Hadaka សុទ្ធសឹងជាបុរសប៉ុណ្ណោះ។ គេប្រារព្ធនៅខែកុម្ភៈ ធ្វើឡើងក្នុងវិហារ។ អ្នកចូលរូមប្រកៀកគ្នា ហើយស្លៀកប៉ឹងបាំងតែរបស់សំខាន់បន្តិចប៉ុណ្ណោះ ហើយពួកគេប្រជែងដណ្តើមរបស់ដែលអ្នករៀបចំកម្មវិធីតម្រូវឲ្យដណ្តើមយក។ អ្នកយករបស់នោះបានគឺជាមានសំណាង។

៩ ទិវាបង្កកសក់នៅប្រទេសកាណាដា

គេធ្វើនៅរៀងរាល់ខែកុម្ភៈ។ វិធីចូលរួមប្រកួតគឺសាមញ្ញ ដោយគ្រាន់តែអ្នកស្ម័គ្រចិត្ត ដោយគ្រាន់តែអ្នកសុខចិត្តទៅខាងក្រៅផ្ទះដែលមានសីតុណ្ហភាព -៣០ អង្សារសេ បន្ទាប់មកជ្រមុជសក់របស់អ្នកទៅក្នុងទឹក ហើយហាលនឹងខ្យល់ចាំមើលថាតើសក់អ្នកណាកកបានល្អជាងអ្នកនោះនឹងឈ្នះ។

៨ រាត្រីឆាយថាវ របស់ប្រទេសម៉ិកស៊ិក

នៅថ្ងៃទី ២៣ ខែធ្នូទីក្រុងម៉ិកស៊ិក បង្កើតបរិយាកាសបុណ្យណូអែលដែលមិនធម្មតាមួយ គឺអ្នកស្រុកបានយកមើមឆាយថាវទៅសូនជារូបផ្សេងៗទាក់ទងទៅនឹងរឿងព្រេង ឬ ក៏ការច្នៃប្រឌិតប្លែកៗ ហើយយករូបនោះដាក់តាំងមុខផ្ទះដើម្បីឲ្យទាក់ភ្នែកអ្នកផង។

៧ ថ្ងៃនៃភាពស្ងប់ស្ងាត់នៅកោះបាលី

បុណ្យឆ្នាំថ្មីនៅកោះបាលីគឺខុសគ្នាទាំងស្រុងពីអ្វីដែលយើងធ្លាប់ធ្វើ។ មិនដូចប្រទេសភាគច្រើនដែលថ្ងៃឈប់សម្រាកនេះមនុស្សម្នាតាមគ្រួសារនីមួយៗបង្កើតពិធីជប់លៀងល្បែងប្រជាប្រិយប៉ុន្តែបុណ្យឆ្នាំថ្មីនៅកោះបាលីប្រជាជនបានយកឱកាសនេះដើម្បីស្វាគមន៍ការចាប់ផ្តើមឆ្នាំថ្មីប្រកបដោយសន្តិភាព និង ភាពស្ងប់ស្ងាត់បំផុត។ គ្មានទេភ្លើងព្រោងព្រាត ការធ្វើដំណើរ សកម្មភាពនានា និង ការកំសាន្ត ទីក្រុងទាំងមូលស្ថិតនៅក្នុងភាពស្ងប់ស្ងាត់ជ្រងំ។

៦ ទិវាកីឡាប្រណាំងហែលក្រោមទឹកក្នុងប្រលាយ

ជាប្រភេទកីឡាចម្លែកមួយនៅប្រទេសវែល ដែលអ្នកចូលរួមប្រកួតគឺប្រណាំងគ្នាហែលទឹកក្នុងប្រលាយដែលទឹកមើលទៅងងឹតគួរឲ្យព្រឺ ហើយអ្នកប្រកួតប្រជែងមិនមែនប្រណាំងគ្នាលើទឹកទេ។ ពួកគេត្រូវតម្រូវឲ្យប្រើបំពង់ដកដង្ហើមហែលប្រណាំងគ្នាប៉ប្រះក្រោមទឹក។

៥ ទិវាតុក្តតា Pikachu របស់ជប៉ុន

Pikachu មិនត្រឹមតែជាតុក្តតាល្បីនៅជប៉ុនទេ បច្ចុប្បន្នវាមានទិវាដង្ហែ Pikachu ជាសាធារណៈទៀតផង។ អ្នកសំដែងជាង ១ ០០០ នាក់នៅក្នុងសំលៀកបំពាក់ Pikachu ដើរជាជួរនៅតាមដងផ្លូវនៃទីក្រុងយូកូហាម៉ាប្រទេសជប៉ុន។

៤ ទិវាដុតមនុស្សព្រិល នៅអាមេរិក

រៀងរាល់ថ្ងៃទី ២០ ខែមិនា ប្រជាពលរដ្ឋនៃតំបន់ត្រជាក់របស់បឹង Superior នៅសហរដ្ឋអាមេរិកបានដុតមនុស្សព្រិល ដើម្បីសាទររដូវផ្ការីក។

៣ សមរភូមិផ្លែក្រូច នៅប្រទេសអ៊ីតាលី

ស្រដៀងទៅនឹងសមរភូមិប៉េងប៉ោះដែរ សមរភូមិផ្លែក្រូច នៅប្រទេសអ៊ីតាលី ប៉ុន្តែសមរភូមិផ្លែក្រូចអ្នកចូលរួមត្រូវពាក់មួកការពារ ហើយ២ក្រុមធ្វើការប្រកួតគ្នា និង មានគណៈកម្មាការជាអ្នកសម្រេច។

២ ពិធីបុណ្យ Vikingនៅប្រទេសអ៊ីស្លង់

ជារៀងរាល់ឆ្នាំHafnarfjörðurដែលជាទីក្រុងតូចមួយនៅអ៊ីស្លង់បានក្លាយជាកន្លែងប្រវត្តិសាស្ត្រដ៏ធំមួយនៃពិធីបុណ្យ Viking ប្រចាំឆ្នាំ ដែលជាការស្លៀកពាក់សំលៀកបុរាណរបស់អ្នកដើរធ្វើដំណើរតាមសំពៅ ហើយក៏មានផងដែរនូវឈុតឆាកសម្តែងការប្រយុទ្ធគ្នាសម្រាប់អ្នកទស្សនា។

១ ការដុតរូបសំណាកមនុស្ស

នៅតំបន់វាលខ្សាច់ Black Rock របស់សហរដ្ឋអាមេរិក ប្រសិនបើអ្នកចំណាយពេល៨ថ្ងៃនៅទីនោះ អ្នកនឹងសង្កេតឃើញថាមនុស្សពីមួយក្រុមទៅមួយក្រុមនៅលើវាលខ្សាច់នោះមានរបៀបរស់នៅដាច់ស្រលះពីគ្នា។ ពិធីបុណ្យដុតរូបសំណាកមនុស្សគឺនៅពេលដែលមនុស្សមួយក្រុម បំភ្លេចពីរបៀបរស់នៅធម្មតារបស់ពួកគេហើយបង្កើតសង្គមថ្មីមួយដែលពួកគេយល់ថាសមស្របសម្រាប់ពួកគេ៕

ប្រភព៖ Brightside ប្រែសម្រួល៖ សុខ លាងហ៊ត