ឆាប់ៗនេះ! កម្ពុជានឹងមានរោងចក្រចម្រាញ់ប្រេងពីដើមច័ន្ទក្រស្នា
- 2018-02-07 06:57:47
- ចំនួនមតិ 0 | ចំនួនចែករំលែក 0
ឆាប់ៗនេះ! កម្ពុជានឹងមានរោងចក្រចម្រាញ់ប្រេងពីដើមច័ន្ទក្រស្នា
ចន្លោះមិនឃើញ
កម្ពុជានឹងមានរោងចក្រចម្រាញ់ប្រេង និងកែច្នៃផលិតផលផ្សេងៗពីដើមច័ន្ទក្រស្នាក្នុងពេលឆាប់ៗខាងមុខនេះ។ ក្រុមហ៊ុនធូប ច័ន្ទក្រស្នាខ្មែរ និងក្រុមហ៊ុនវិនិយោគជាដៃគូ First Capital Global Co, Ltd បាននឹងកំពុងវិនិយោគរួមគ្នាក្នុងទំហំទឹកប្រាក់ជាង ១០០លានដុល្លារអាមេរិក បង្កើតរោងចក្របច្ចេកវិទ្យាទំនើបមួយនេះ ដើម្បីនាំចេញទៅកាន់ទីផ្សារក្នុងតំបន់ និងទីផ្សារអន្តរជាតិ។ រោងចក្រនេះមានទីតាំងស្ថិតនៅក្នុងខេត្តព្រះសីហនុ។
ក្នុងពិធីផ្សព្វផ្សាយ និងពិធីចុះហត្ថលេខាកិច្ចព្រមព្រៀងពាណិជ្ជកម្ម និងគ្រប់គ្រងដើមច័ន្ទក្រស្នា នាព្រឹកថ្ងៃទី៧ ខែកុម្ភះ ឆ្នាំ២០១៨នេះនៅសណ្ឋាគារសូហ្វីតែលភូគីត្រា រាជធានីភ្នំពេញ លោកស្រី កែវ សុគន្ធា នាយិកាក្រុមហ៊ុនធូប ច័ន្ទក្រស្នាខ្មែរបានឲ្យដឹងថា កត្តាដែលជំរុញឲ្យមានការវិនិយោគ និងគម្រោងបង្កើតរោងចក្រនេះឡើង ដោយសារមើលឃើញពីប្រជាកសិករខ្មែរនៅក្នុងខេត្តមួយចំនួនដូចជា ខេត្តព្រះសីហនុ កំពត និងខេត្តកោះកុង បានដាំដើមច័ន្ទក្រស្នា ប៉ុន្តែមិនមានលទ្ធភាពបង្កើតរោងចក្រកែច្នៃដើមឈើប្រភេទកម្រនេះ។ ម៉្លោះហើយទើបក្រុមហ៊ុនបានព្រមព្រៀង សហការជាមួយម្ចាស់ចម្ការនៅកម្ពុជា ដើម្បីធ្វើការពង្រឹងគុណភាព និងសហការបង្កើតគម្រោងនានាពាក់ព័ន្ធនឹងខ្លឹមច័ន្ទក្រស្នានៅកម្ពុជា ដើម្បីចម្រាញ់ចេញជាប្រេងច័ន្ទក្រស្នាកម្ពុជា ដែលជាប្រទភេទប្រេងមានគុណភាពខ្ពស់ ហើយនឹងធ្វើឲ្យកម្ពុជាក្លាយទៅជាប្រទេសដែលមានឈ្មោះបោះសម្លេង ក្នុងការផលិតប្រេងប្រភេទនេះ នៅក្នុងទីផ្សារអន្តរជាតិ។
ម្ចាស់ចម្ការដើមខ្លឹមច័ន្ទក្រស្នា ខេត្តព្រះសីហុ លោកស្រី ងួន ប៊ុនណា បានឱ្យដឹងថា ក្នុងរយៈពេល១០ឆ្នាំមកនេះ មានដើមច័ន្ទក្រស្នាជាច្រើនលានដើមត្រូវបានដាំ ប៉ុន្តែការពង្រឹងគុណភាពនៅមានកម្រិតនៅឡើយ ដោយសារតែធនធានសម្រាប់ប្រើប្រាស់នៅមានកម្រិត។ លោកស្រីបន្តថា អ្នកដាំដើមនេះមួយចំនួនក៏មានការបាក់ទឹកចិត្ត ដោយសារតែការលូតលាស់របស់ឈើប្រភេទនេះត្រូវប្រើពេលយូរ ហើយគុណភាពទទួលបាននៅមានកម្រិតទាប ដែលមិនអាចផ្គត់ផ្គង់តម្រូវការក្នុងទីផ្សារប្រកបដោយនិរន្តភាព។
ថ្លែងក្នុងពិធីនាឱកាសនេះ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានស្វាគមន៍ និងសង្ឃឹមថា តាមរយៈគម្រោងបង្កើនគុណភាពនេះនឹងជួយឲ្យកម្ពុជា ក្លាយជាប្រទេសនាំចេញដើមច័ន្ទក្រស្នាមួយ ក្នុងចំណោមប្រទេសដទៃទៀតនាថ្ងៃអនាគត ហើយនឹងជួយបង្កើនយីហោ សម្រាប់ដើមច័ន្ទក្រស្នា នៅកម្ពុជា៕
មិនបាច់ចំណាកស្រុកនាំឆ្ងាយគ្រួសារ បើចេះចាប់ឱកាសក្នុងវិស័យកសិកម្ម
ប្រកាសគម្រោងសង់ព្រលានព្រឹបទៅទិញដីព្រូស តែចង់ដឹងអត់អ្នកណាត្រូវប៉ាន់ពិត?
អស់ប៉ុន្មានទៅរឿងជួសជុលផ្លូវក្នុង១ឆ្នាំៗ បានឯកឧត្ដម ស៊ុន ចាន់ថុល ស្ដាយលុយយ៉ាងនេះ?