គ្រូ Spurs៖ ការហាមកីឡាករធ្វើពុត ហាក់ដូចជាសម្លាប់បាល់ទាត់
- 2018-02-07 07:18:37
- ចំនួនមតិ 0 | ចំនួនចែករំលែក 0
គ្រូ Spurs៖ ការហាមកីឡាករធ្វើពុត ហាក់ដូចជាសម្លាប់បាល់ទាត់
ចន្លោះមិនឃើញ
Mauricio Pochettino ព្រួយបារម្ភថា ការព្យាយាមលុបបំបាត់ការធ្វើពុតដួល ឬបន្លំភ្នែកអាជ្ញាកណ្ដាលរបស់កីឡាករអាចកំពុងសម្លាប់កីឡាបាល់ទាត់។
ការលើកឡើងរបស់អ្នកចាត់ការ Spurs បន្ទាប់ពីមានការរិះគន់លើកីឡាកររបស់លោក៣រូបមាន Kane, Dele Alli និង Lamela ថាបានធ្វើពុតដួលក្នុងប្រកួតដែលពួកគេស្មើ ២-២ ជាមួយ Liverpool។ ការដួលក្នុងប្រអប់របស់ Kane និង Lamela ត្រូវអាជ្ញាកណ្ដាលផ្ដល់បាល់ប៉េណាល់ទី តែសម្រាប់ Alli វិញត្រូវពិន័យកាតលឿង។
សហព័ន្ធបាល់ទាត់អង់គ្លេស បានសាកល្បងប្រើ VAR (អាជ្ញាកណ្ដាលវីដេអូ) ក្នុងប្រកួត FA Cup រដូវកាលនេះ នឹងគ្រោងប្រើនៅ Premier League នៅរដូវកាលក្រោយដើម្បីជួយដល់ការសម្រេចចិត្តរបស់អាជ្ញាកណ្ដាលឲ្យបានត្រឹមត្រូវ។
យ៉ាងណាបច្ចេកវិទ្យាខាងលើត្រូវបុរសសញ្ជាតិអាហ្សង់ទីនសម្ដែងការមិនពេញចិត្ត។ "ខ្ញុំខ្លាចក្រែងអ្វីដែលយើងកំពុងធ្វើគឺសម្លាប់បាល់ទាត់។ បាល់ទាត់គឺជាល្បែងដែលអ្នកត្រូវបញ្ឆោតគូប្រកួត។ បញ្ឆោត ឬធ្វើពុតដោយបច្ចេកទេស"។
"២០ឆ្នាំ ឬ៣០ឆ្នាំក្រោយអ្នកប្រហែលជាសរសើរកីឡាករពូកែធ្វើពុត នៅពេលពួកគេអាចបន្លំអាជ្ញាកណ្ដាលបាន។ ជាការពិតបើអ្នកធ្វើពុត ហើយអាជ្ញាកណ្ដាលចាប់បាន អ្នកត្រូវពិន័យគឺសមហើយប៉ុន្តែបើអាជ្ញាកណ្ដាលមើលមិនទាន់ កុំវែងឆ្ងាយពេក ព្រោះពួកគាត់ក៏ជាមនុស្សដែរ"។ Pochettino និយាយដូច្នេះ៕