ព្រឺសម្បុរ! រឿងរ៉ាវ៥យ៉ាងកម្រមានអ្នកដឹងបំផុត ពីអគារអាយុកាលជាង១០០ឆ្នាំលើភ្នំបូកគោ

2018-02-07 07:42:53
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងរ៉ាវអាថ៌កំបាំងជាច្រើន កម្រមានអ្នកដឹងបំផុតពីអគារដ៏ចំណាស់មួយមានអាយុកាលជាង១០០ឆ្នាំ នៅលើកំពូលភ្នំបូកគោ ក្នុងទឹកដីខេត្តកំពត នៃប្រទេសកម្ពុជា។ ដូច្នេះសូមមកដឹងរឿងរ៉ាវ ៥យ៉ាងកម្រមានអ្នកដឹង ពីសណ្ឋាគារ និងកាស៊ីណូមួយនេះ!

១. ទីតាំងសាងសង់ស្ថិតនៅតំបន់ដ៏ពិសេសបំផុត

ស្ថិតនៅកំពូលភ្នំដ៏ខ្ពស់មួយក្នុងប្រទេសកម្ពុជា គឺជារឿងដ៏ពិសេសហើយ។ ប៉ុន្តែពិសេសជាងនេះទៅទៀតនោះ សណ្ឋាគារ និងកាស៊ីណូដ៏ចំណាស់នេះ សាងសង់ស្ថិតនៅចន្លោះតំបន់ព្រៃត្រូពិក និងឆ្នេរសមុទ្របៃតង។

រូបភាព៖ Bokor.Kamboo.Com

**២. ជាកន្លែងដ៏ពិសេសបំផុតសម្រាប់សែរាជវង្សានុវង្ស និងអភិជនលំដាប់កំពូលៗ**

សណ្ឋាគារនេះ បានដាក់សម្ពោធកាលពីថ្ងៃទី១៤ ខែកុម្ភៈ ឆ្នាំ១៩២៥ សម្រាប់បម្រើជូនរាជវង្សានុវង្ស និងអភិជនជាច្រើនទសវត្សរ៍ បន្ទាប់មកសណ្ឋាគារនេះ ត្រូវបានទុកចោលតែម្ដង។ នៅដើមឆ្នាំ១៩៦២ វាត្រូវកសាងឡើងវិញដោយព្រះករុណា ព្រះបាទសម្តេច ព្រះនរោត្តមសីហនុ ដើម្បីបម្រើជូនមន្ត្រីជាន់ខ្ពស់ រាជរដ្ឋាភិបាល និងពាណិជ្ជករ ដែលមានទ្រព្យស្តុកស្តម្ភ ហើយវាក៏ជាកន្លែងវិស្សមកាល ដែលព្រះករុណា ព្រះបាទសម្តេចព្រះ នរោត្តម សីហនុ សព្វព្រះទ័យជាទីបំផុត។

រូបភាព៖ Bokor.Kamboo.Com

៣. ម្ហូបអាហារខុសប្លែកពីសណ្ឋាគារធម្មតា

តាមគេហទំព័រ Bokor.Kamboo.Com ម្ហូបអាហារក្នុងសណ្ឋាគារ Bokor Palace ជាអាហារសម្រាប់សែរាជវង្សានុវង្ស និងអភិជនលំដាប់ខ្ពស់ ហើយត្រូវចម្អិនដោយចុងភៅលំដាប់កំពូលមកពីប្រទេសល្បីៗលើពិភពលោក។

៤. រចនាបថសណ្ឋាគារតាមបែបប្រទេសអ៊ីតាលី

ផ្នែកខាងក្រៅ និងផ្នែកខាងក្នុងនៃសណ្ឋាគារនេះ យកលំនាំតាមរចនាបថរបស់ប្រទេសអ៊ីតាលី។ បើនិយាយពីផ្នែកខាងក្នុងមានចាក់សសរធំៗ និងជណ្ដើរថ្មើរជើងបត់បែនគួរឲ្យចាប់អារម្មណ៍បំផុត។ ក្នុងនោះមាន ៣៦បន្ទប់ និងភោជនីយដ្ឋានប្រណីត២។

៥. វាត្រូវបានបោះបង់ចោលអស់រយៈពេលជាច្រើនទសវត្ស

តាមគេហទំព័រ Bokor.Kamboo.Com ដដែលបានឲ្យដឹងទៀតថា វាត្រូវបានបោះបង់ចោលក្នុងឆ្នាំ ១៩៤០ និងឆ្នាំ១៩៧២ ដោយសារតែភ្លើងសង្គ្រាម។

សូមជម្រាបជូនថា សណ្ឋាគារ និងកាស៊ីណូដ៏ចំណាស់មានប្រវត្តិរាប់ឆ្នាំលើលំពូលភ្នំបូកគោ ពេលនេះបានផ្លាស់ប្ដូរមុខមាត់ថ្មីសន្លាង ជាសណ្ឋាគារដ៏ស្រស់ស្អាត Le Bokor Palace ដោយនូវរក្សារូបរាងសំណង់អគារដើមដដែល។

លោក Frugere F. Philippe អ្នកគ្រប់គ្រងទូទៅ នៃសណ្ឋាគារខាងលើ បានមានប្រសាសន៍ថាក្រុមហ៊ុន បានជួសជុលសំណង់អគារនេះ សារជាថ្មី ដោយរក្សាទុកនូវលក្ខណៈពិសេសរបស់វា និងបង្កើតឡើងវិញ នូវរចនាបទ ផ្ទៃខាងក្នុងបែបអាណានិគម៕