ល្បីថា ប៊ឺរី សម្តែងរឿងធំទីពីររបស់អ្នកនិពន្ធ ស្រទន់មន្តស្នេហ៍

2018-02-11 03:40:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រភពបានបើកទម្លាយព័ត៌មានដែលមិនទាន់ត្រូវដល់ពេលចេញ គឺថា តួឯកប្រុស ដេតភូមិន្ទ ដ៏ស្រស់សង្ហាទើបនឹងបានចុះកុងត្រាស្ងាត់ៗ សម្តែងជាតួអង្គអ្នកប្រុសទីពីរក្នុងស្នាដៃប្រលោមលោកស្នេហ៍ដ៏ល្បី «ថ្ងៃមុនស្អប់ថ្ងៃនេះស្រលាញ់» ដែលកំពុងរៀបចំជាខ្សែរឿងភាគចំណាយទុនធំប្រចាំ PNN។

តារាសម្តែង ប៊ីរី

ទោះបីតួឯកម្នាក់នេះមិនទាន់ហ៊ានបញ្ជាក់ពីព័ត៌មានខាងដើម តែប្រភពមកពីខាងផលិតកម្មអះអាងថា គេបានកុងត្រាតួអង្គធំៗទំាង១១រូបរួចរាល់ហើយ ហើយថាក្នុងចំណោមនោះមាន៥នាក់ជាតួ Grade A ដែលមានតម្លៃខ្លួនខ្ពស់។

ប្រធានកម្មវិធីរបស់ PNN កញ្ញា ទូច បុប្ផា មិនបានបញ្ចេញប្រតិកម្មបែបណាចំពោះប្រភពដែលប្រាប់ Sabay ទេ គ្រាន់តែប្រាប់ខ្លីថា គ្រប់យ៉ាងមិនទាន់ដល់ពេលត្រូវបញ្ចេញព័ត៌មាន។

កញ្ញា ទូច បុប្ផា ប្រធានកម្មវិធីរបស់ PNN

ប្រលោមលោក «ថ្ងៃមុនស្អប់ ថ្ងៃនេះស្រលាញ់» ជាស្នាដៃមួយផ្សេងរបស់អ្នកនិពន្ធ ម៉ីសន សុធារី ដែលបានទទួលការគំាទ្រជាខ្លាំង ហើយក៏ជាប្រលោមលោកដែលគេដឹងថា ពិបាកជ្រើសរើសតួសម្តែងជាង «ស្រទន់មន្តស្នេហ៍» ទៅទៀត។

Sabay បានសាកសួរអ្នកនិពន្ធដើម្បីបញ្ជាក់លើវត្តមាន លោក ប៊ឺរី ដែលនឹងដើរតួជា ហួត ខេមរិទ្ធ អ្នកស៊ើបមុខស្រស់ក្នុងផ្ទះឧកញ៉ា ប៉ែន ពេជ្រ ដើម្បីស្វែងរកគម្រោងការពាណិជ្ជកម្មអច្ឆរិយៈ ចម្លើយទទួលមកវិញគឺថា អ្នកនិពន្ធមិនបានបដិសេធដំណឹងនេះឡើយ។

«បើខាងផលិតកម្មបង្ហើបក៏មិនឃើញមានអីខុសឆ្គងដែរ! ប៊ឺរី ជាតួប្រុសដែលមានសមត្ថភាពខ្ពស់ ដូចយើងឃើញស្រាប់ក្នុងរឿងស្រទន់ បើថាគាត់មកសម្តែងជាអ្នកប្រុសទីពីរ ប្រាកដជាធ្វើឲ្យ fan ស្រីៗសប្បាយចិត្តច្រើន! ចង់ដឹងពីសេចក្តីលម្អិត និងការសម្រេចចិត្តរបស់គាត់ គួរតែសួរគាត់ខ្លួនឯង!»។

អ្នកនិពន្ធ ម៉ីសន សុធារី

នៅពេលសួរថា តើនឹងមានតួអង្គក្នុងរឿងស្រទន់មន្តស្នេហ៍សម្តែងទៀតដែរអត់ ក្រៅពីលោក ប៊ឺរី? អ្នកនិពន្ធប្រាប់វិញថា៖ «យើងមិនមានការកំណត់ថា ទាល់តែជាអ្នកណា ឬមកពីណាទេ ប៉ុន្តែអ្នកសម្តែងក្នុងរឿងស្រទន់ មានសមត្ថភាពខ្ពស់ៗណាស់ មិនថាតួអង្គណាមួយក៏ដោយ បើពួកគាត់សាកល្បងសម្តែង ហើយត្រូវបានជ្រើសរើសសម្រាប់រឿងថ្មីនេះទៀត ក៏មិនមានអ្វីចម្លែកដែរ!»។

សំណួរឈ្លេចអំពីតួឯកស្រី ដែលត្រូវសម្តែងជាមេធាវីមហាចិត្តរឹង ពៅ បញ្ញា និងប្អូនភ្លោះ ប៉ែន ពេជ្រសក្កណា នៅតែមិនបានចម្លើយ អ្វីដែល Sabay អាចដឹងបានពេលនេះ គឺប្រភពច្បាស់ការបញ្ជាក់ពីវត្តមានលោក លឹម ជាឡាយ សម្តែងជាអ្នកប្រុសទីមួយ ហួត យុត្ថនា ហើយ ប៊ឺរី ជាតួអង្គអ្នកប្រុសទីពីរ ហួត ខេមរិទ្ធ ។

វីដេអូភាគដែលចាយទុនប្រមាណជា៣០ម៉ឺនដុល្លារអាមេរិកនេះត្រូវបានគេគ្រោងចាក់បញ្ចាំងនាខែសីហា ឆ្នាំនេះ៕

អត្ថបទ៖ ដេត ធន្នី