ថ្មី...!!! "នឹកឡើងហួសចិត្ត"
- 2018-02-12 03:11:52
- ចំនួនមតិ 0 | ចំនួនចែករំលែក 0
ថ្មី...!!! "នឹកឡើងហួសចិត្ត"
ចន្លោះមិនឃើញ
"រំលឹករឿងហួសចិត្ត" ជាមាតិកាថ្មីរបស់ Sabay សម្រាប់ឆ្នាំ ២០១៨គ្រោងនឹងចេញផ្សាយរៀងរាល់ថ្ងៃ ចន្ទ និងថ្ងៃ សុក្រ ក្នុងមាតិកាព័ត៌មានសង្គមនៅចន្លោះម៉ោង ៦-៩យប់ ចាប់ពីថ្ងៃ១៩ កុម្ភៈ សប្ដាហ៍ក្រោយតទៅ។ ចរិតលក្ខណៈនៃមាតិកាថ្មីនេះ គឺគាស់រំលើងអនុស្សាវរីយ៍ហួសចិត្ត សប្បាយៗ កាលពីកុមារភាព ឬវ័យជំទង់ ដែលជឿថាមនុស្សទាំងអស់គ្នា សុទ្ធតែមានវា ពិសេសគឺអ្នកដែលរស់នៅតាមភូមិ ស្រុក នៃខេត្តនីមួយៗ មកចែកគ្នាដឹង ទុកជាការលំហែ។
ក្នុងរឿងហុងកុងមួយ(មិនចាំចំណងជើង)បុរសពីរនាក់បងប្អូន គឺជាមេបងធំ ជាអ្នកលេងក្នុងសង្គមងងឹត តែមានអតីតភាពជាក្មេងស្រុកស្រែ មិនដែលស្គាល់ភាពហ៊ឺហា។ ដោយសារមានក្ដីស្រមៃធំចង់ក្លាយជាអ្នកមាន ពួកគេក៏ផ្សងព្រេងមកក្រុងរកអនាគតថ្មី។ មិនខ្វល់ថា ផ្លូវដែលគេដើរយ៉ាងណា ប៉ុន្តែលទ្ធផល ពីរនាក់បងប្អូនគេ បានក្លាយជាអ្នកមាន មានលុយរាប់លានដុល្លារ មានមនុស្សក្រោមឱវាទជាច្រើន នារីកំដរឆ្វេងស្ដាំ ជារួមអាចនិយាយបានថា អ្វីក៏គេមានដែរ។
*បន្ទាប់ពីស្កប់ស្កល់នូវរបស់ទ្រព្យសព្វបែបយ៉ាងដែលខ្លួនមានបាន ដោយជាប់ជំពាក់កម្មខ្លះ គុណខ្លះ បាបខ្លះ ថ្ងៃមួយពីរនាក់បងប្អូន បាននិយាយគ្នាលេង ប្រមើលមើលពីអ្វីដែលខ្លួនកំពុងមាន ធៀបនឹងអតីតកាល ដែលអ្វីក៏គ្មាន។*
បង៖ "អាប្អូន កាលពីមុនយើងនៅស្រុកស្រែ អ្វីក៏គ្មាន តែឥឡូវអ្វីក៏យើងមានដែរ មាស ពេជ្រ លុយឡាន ស្រី ស្រា តែបងនៅតែគិតថា នោះមិនមែនក្ដីសុខពិតប្រាកដសោះ"។ ខណៈ ប្អូននៅស្ងៀមមិនទាន់តប ព្រោះទំនងមិនស៊ីជម្រៅនឹងអ្វីដែលបងប្រុសនិយាយ...បុរសជាបងបន្តទៀតថា "ពេលវេលាដែលសប្បាយបំផុត ស្រស់ថ្លាបំផុត ក្ដីសុខបំផុត ដែលនៅមានក្នុងចិត្តបងនោះ គឺពេលមួយដែលយើងមុជទឹកស្រែជាមួយគ្នា លេងសើចជាមួយគ្នា ពេលនោះ គឺសប្បាយខ្លាំងណាស់...!"។
មិនខុសទេ ការសប្បាយពេលនោះ គឺបរិសុទ្ធណាស់ អត់មួយរៀលជាប់ខ្លួនក៏សប្បាយបានដែរ តាមរបៀបងាយៗ សាមញ្ញៗ ជាមួយមនុស្សដ៏ល្អរបស់យើងជាច្រើន។ អ្វីៗនៅពេលនោះ គឺស្អាតស្អំណាស់ ទាំងចិត្ត ធម្មជាតិ កាលៈទេសៈ ជាដើម ទើបជាហេតុនាំឲ្យមនុស្សអាចសប្បាយបានដោយមិនជាប់ជំពាក់។ ខុសពីពេលបច្ចុប្បន្ន កន្លែងសប្បាយមានច្រើន ទំនើបកម្មគ្របដណ្ដប់ពេញថ្នាលជីវិត។ ប៉ុន្តែ គ្រប់គ្នានៅមានជាប់ជំពាក់រឿងជាច្រើន ការងារ បាប បុណ្យ គុណ ទោស បំណុលចិត្ត បំណុលប្រាក់...។ល។
ដូច្នេះ មាតិកាយើងថ្មីនេះ គឺចង់នាំទៅប្រិយមិត្តទៅកាន់អតីតកាលដ៏ផូរផង់របស់យើងវិញ ហោចណាស់ ក៏ជឿថា អាចលង់លក់ក្នុងក្ដីសុខមួយគ្រា ពេលនឹកនាទៅដល់រឿងនៅស្រុកស្រែ ក្បែរម៉ែ ក្បែរពុក អត់លុយ តែមិនដែលមានទុក្ខ គឺស្ងប់សុខខ្លាំងណាស់។ ជារួម គឺចង់ផ្ដល់ប្រិយមិត្តនូវការលំហែនៅនឹងកន្លែងរយៈខ្លី បង្កើតចន្លោះរំលេចការសប្បាយក្នុងចិត្ត កាត់ស្ត្រេសលែងគិត និងដកចិត្តជំពាក់ លើរឿងរ៉ាវនានា។
ចូលរួមជាមួយពួកយើង៖
ជាគោលការណ៍ មាតិកាមួយនេះលើកទឹកចិត្តមិត្តគ្រប់គ្នាឲ្យចូលរួម។ យ៉ាងណា ជាមួយគ្នានេះ ដើម្បីធានាថា ការចែករំលែករបស់ប្រិយមិត្តស្របតាមគំនិតដើមនៃមាតិកា ពិសេសចៀសវាង ឆ្គងនឹងក្រមសីលធម៌ គប្បីគោរពតាមលក្ខខណ្ឌខ្លះៗក្នុង២ចំណុចធំៗខាងក្រោម៖
១. ទទួលបាន Coupon ៖ ចំពោះផលប្រយោជន៍ ក្រៅពីបានផ្ដល់មិត្តភ័ក្ដិបងប្អូន អោយទទួលបានការសើចសប្បាយ លំហែពីរឿងរ៉ាវផ្ទាល់ខ្លួនហើយ ប្រិយមិត្តនឹងទទួលបាន កម្រៃជើងសារពីការហត់នឿយ នូវ Coupon ពី Tour le Jours ឬ Movie Ticket ឬក៍ Soyo Free Wathcing ទៀត (សម្រាប់តែអត្ថបទដែលចេញផ្សាយរួច ឬក៏ត្រូវទទួលការអះអាងថា នឹងចុះផ្សាយនៅពេលណាមួយ)។
១.១.លក្ខខណ្ឌចូលរួម
-ជាបទពិសោធន៍ផ្ទាល់ខ្លួន ឬមិត្តភក្ដិដែលយើងដឹងយ៉ាងច្បាស់ ហើយមិត្តភ័ក្ដិអនុញ្ញាត(ត្រូវទទួលខុសត្រូវខ្លួនឯងចំពោះម្ចាស់រឿង ករណីម្ចាស់សាច់រឿងមិនសុខចិត្តចំណុចណាមួយ)
-មិនមានបញ្ចូលពាក្យអាសគ្រាម ក្រៅពីពាក្យគ្រាមភាសា ឬភាសាតំបន់។
-ត្រូវសរសេរដោយខ្លួនឯង អោយចេញជាអត្ថបទ បង្កប់ន័យ ឬគន្លឹះអោយបងប្អូនហួសចិត្ត និងអស់សំណើច
-បងប្អូនអាចលាក់អត្តសញ្ញាណដោយប្រើឈ្មោះប្រឌិតក៏បាន ឬក៏មិនលាក់ក៏បាន
-ផ្ដល់សិទ្ធិអោយក្រុមការងារយើង អាចកែសម្រួលសាច់រឿងខ្លះ ដើម្បីឲ្យកាន់តែល្អ កាន់តែចាប់អារម្មណ៍
-ក្រុមការងារយើង មានសិទ្ធិមិនចេញផ្សាយនូវអត្ថបទណាដែល ប្រាសចាកពីលក្ខខណ្ឌនានាដែលមានចែង ឬក៏មិនល្អគ្រប់គ្រាន់។
-គួរមានរូបភាពភ្ជាប់(គុណភាពល្អអាចប្រើបាន) ដែលអាចប្រើបរិយាយ ឬអាចប្រើតំណាងឲ្យសាច់រឿងបាន
-រំលឹកយកតែរឿង ដែលបង្កើតនូវបរិយាកាសរីករាយ និងលំហែ មិនប៉ះពាល់ដល់បុគ្គលផ្សេងទៀត។ រឿងទាំងនោះអាចមានជាអាទិ៍៖
+ខ្មោចលង៖ ដើរលេងខ្មោចលង...
+អនុស្សាវរីយ៍ជាមួយមិត្ត ដូចជា៖ មិត្តភ័ក្ដិធ្វើបាបក្នុងន័យលេងសើច...
+ដើរលេងយប់៖ ល្បិចលួចម៉ែ ពុកទៅរាំធុងបាស់
+អនុស្សាវរីយនៅវាលស្រែ៖ ពិសោធន៍គោដេញជល់ រត់ធ្លាក់ស្រែ...
+រឿងអស់សំណើចនឹងស្នេហា៖
+ឬបទពិសោធគួរឲ្យហួសចិត្តផ្សេងៗទៀត