ស្រីស្រស់ ពេជ្រ ចរិយា អ្នកចម្រៀងមហោរី វ័យក្មេងជាងគេ

2018-02-12 04:04:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿងមួយដ៏កម្រ ដែលនារីវ័យក្មេងមា្នក់មានសមត្ថភាពច្រៀងចម្រៀងបុរាណយ៉ាងល្អ គឺកញ្ញា ពេជ្រ ចរិយា។ ជាញឹកញាប់យើងតែតែឃើញនាងចម្រៀងក្នុងកម្មវិធីធំៗរបស់ជាតិ និងច្រៀងកំដរកម្មវិធីសម្ដែងសិល្បៈបុរាណជាដើម។

អ្នកចម្រៀងមហោរី ដែលមានសំឡេងស្រួយស្រែសស្ដាប់មិនជិនណាយ កញ្ញា ពេជ្រ ចរិយា ជាអ្នកកំពង់ធំ ក្នុងគ្រួសារអ្នកសិល្បៈ ដែលម្តាយជាអ្នកច្រៀងចម្រៀងភ្លេងការ និងអាយ៉ៃ ឯឪពុកជាតន្ត្រីករឧបករណ៍បុរាណខ្មែរ។

ម្ចាស់ជយលាភី១ក្នុងកម្មវិធី «មរតកវប្បធម៌ខ្មែរ» ឆ្នាំ២០១១ ជាកូនទី៤ ក្នុងចំណោមបងប្អូនប្រុសស្រី៥នាក់។

នារីមាឌតូចនេះបានឲ្យដឹងថា នាងបានចាប់ផ្ដើមផ្ញើជីវិតជាមួយវិថីសិល្បៈបុរាណនេះតាំងពីនាងមានអាយុ៨ឆ្នាំមកម្ល៉េះ ដោយត្រូវបានម្តាយឪពុកបញ្ជូនឲ្យមកសិក្សានៅមជ្ឈមណ្ឌល អប្សរា នៅក្រុងភ្នំពេញ ក្នុងឆ្នាំ២០០៤ ជំនាញរបាំបុរាណជាច្រើនប្រភេទ។ ស្រីស្រស់រូបនេះបន្តពីដើមទងដែលនាងបានចូលក្នុងវិស័យសិល្បៈថា នៅឆ្នាំ២០០៩ នាងត្រលប់ទៅស្រុកកំណើត ប៉ុន្តែក៏ត្រូវបានអ្នកគ្រូ ហ៊ុន សារ៉ាត គ្រូចម្រៀងមហោរី លោកហៅមកបង្ហាត់បង្រៀន រហូតបានចូលរួមប្រឡង ទទួលបានពានរង្វាន់។

«កុំតែអ្នកគ្រូហៅខ្ញុំមកហាត់ចម្រៀងមហោរីនេះ ហើយលោកទឹកចិត្តខ្ញុំឲ្យចូលរួមប្រកួត រហូតទទួលបានពានហ្នឹង។ ខ្ញុំច្រៀងថ្វាយសម្ដេចព្រះនាងព្រះរៀម ក្នុងព្រះរាជកិច្ចទ្រង់ និងក្នុងព្រះរាជពិធីផ្សេងៗ ក្នុងព្រះបរមរាជវាំង»។

ស្រីស្រស់រូបនេះមិនត្រឹមតែមានសំឡេងពីរោះ រយលានមនោសញ្ចេតនា មានជំនាញសិល្បៈ ជាច្រើនប្រភេទ ទោះមានអាយុទើប២១ឆ្នាំ តែនាងមានសមត្ថភាពរាំរបាំ ច្រៀងមហោរី ភ្លេងការ ច្រៀងចាប៉ីជាដើម។

ពេជ្រ ចរិយា និងរៀមច្បង

បច្ចុប្បន្ននាងកំពុងបម្រើការជាមន្រ្តីរាជការ នៅក្នុងនាយកដ្ឋានទស្សនីយភាព របស់ក្រសួងវប្បធម៌ និងវិចិត្រសិល្បៈ និងបន្តការសិក្សាឆ្នាំទី ២ ផ្នែកចម្រៀងបុរាណនៅសាលារចនា។ គោលចំណង នៅថ្ងៃអនាគតនាងចង់មានឱកាសបានបង្រៀនជំនាញដែលខ្លួនមានដល់ក្មេងជំនាន់ក្រោយ៕

អត្ថបទៈ ស្រីអូន

រូបភាពៈ ហ្វេសប៊ុក ពេជ្រ ចរិយា