ស្រលាញ់ដកចិត្តមិនរួច បណ្ឌិតនរវិទ្យាបារាំងចំណាយជិត២ទសវត្សរ៍សិក្សា និងហាត់របាំខ្មែរ (វីដេអូ)

2018-02-14 00:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាជនជាតិបារាំងសុទ្ធសាធគ្មានជាប់សែស្រឡាយខ្មែរសូម្បី តែបន្តិច កញ្ញា Lucie Labbe បានចំណាយពេលជាច្រើនឆ្នាំ ដើម្បីស្រាវជ្រាវពីសិល្បៈបុរាណខ្មែរ ដោយគ្មាននឿយណាយ។

មានច្រមុះស្រួច រាងខ្ពស់ស្ដើង Lucie Labbe បណ្ឌិតផ្នែកនរវិទ្យាបានប្រាប់ថាNកាលពីកុមារនាងមាននិស្ស័យចង់ដើរលេងជុំវិញពិភពលោក ដើម្បីសិក្សាពីប្រវត្តិសាស្រ្ត និងវប្បធម៌នៃប្រទេសទាំងនោះ។

បណ្ឌិតនរវិទ្យា Lucie Labbe

បំណងនាងមិនបានដូចការពិតទេ! តែមានថ្ងៃមួយនាងបានចូលរួមក្នុងកម្មវិធីសិល្បៈមួយនៅក្នុងប្រទេសបារាំង ដែលមានរបាំជាច្រើនប្រទេសមកសម្ដែង ពេលនោះដែលនាងបានឃើញការសម្ដែងសិល្បៈបុរាណខ្មែរ ហើយធ្វើឲ្យនាងកាន់តែស្រលាញ់សិល្បៈខ្មែរកាត់តែទ្វេដង បើទោះបីជាមិនធ្លាប់ មកកម្ពុជា សូម្បីតែអង្គរវត្តក៏នាងមិនស្គាល់ផង។

កញ្ញា Lucie Labbe រៀបរាប់ជាភាសាខ្មែរយ៉ាងច្បាស់ថា «ខ្ញុំមិនយល់ខ្លួនឯងដូចគ្នា ថាហេតុអ្វីសិល្បៈជាច្រើនប្រទេស ដែលខ្ញុំឃើញ ខ្ញុំមិនជាប់ចិត្តស្រលាញ់ខ្លាំងដូចរបាំខ្មែរ ទាំងក្បាច់រាំ និងតន្រ្តី ខ្ញុំពិតជាចូលចិត្ត រកនិយាយមិនត្រូវ។ ក្រោយមកខ្ញុំក៏ចាប់ផ្តើមអានសៀវភៅ និងស្រាវជ្រាវសៀវភៅគ្រប់យ៉ាងដែលទាក់ទងនឹងខ្មែរ ។ រហូតដល់ពេលមួយខ្ញុំដឹងថាមានពលរដ្ឋខ្មែរ ដែលរស់នៅជិតភូមិខ្ញុំរស់នៅនោះគេហាត់របាំ ហើយខ្ញុំតែងតែទៅមើលឲ្យតែទំនេរ ។ ក្រោយមក លោកគ្រូអ្នកគ្រូ ក៏ហៅឲ្យខ្ញុំចូលរៀនរាំ តាំងពីអំឡុងឆ្នាំ២០០១»។

Lucie Labbe កំពុងហាត់រាំ

ការហាត់របាំនេះ ធ្វើឲ្យ Lucie Labbe កាន់តែស្រលាញ់ និងដឹងពីផលលំបាកនៃសិល្បៈខ្មែរកាន់ខ្លាំងឡើង។ ព្រោះសេចក្តីស្រលាញ់ នាងបានមកដល់ប្រទេសកម្ពុជាដំបូងក្នុងឆ្នាំ២០០៦ និងបានចាប់ផ្តើមសិក្សាស្រាវជ្រាវពីសិល្បៈក្នុងឆ្នាំ ២០០៨។ ជិត១៧ឆ្នាំហើយដែលបណ្ឌិតរូបនេះបានរៀនរបាំខ្មែរ នាងធ្លាប់បានសម្ដែងសិល្បៈបុរាណខ្មែរក្នុងឆាកអន្តរជាតិផងដែរ។ឮ

របាំខ្មែរដែល Lucie Labbe អាចរាំបានរួមមាន របាំបួងសួង របាំទេពមនោរម្យ របាំផ្លិត និងរបាំប្រពៃណីជាច្រើនផ្សេងទៀត។ «ខ្ញុំធ្លាប់ឡើយសម្ដែងដែរ។ កាលនៅស្រុកបារាំង ក្នុងរបាំ រៀមកេរ្តិ៍ ខ្ញុំដើរតួយក្ស ក្នុងរបាំបួងសួង ខ្ញុំដើរតួនាយរោង ក្រៅពីនេះខ្ញុំហាត់របាំច្រើនទៀតដែរប៉ុន្តែខ្ញុំ តែមិនទាន់ស្ទាត់ទេ»។ Lucie Labbe បន្ថែម។

នាងប្រាប់ថាការចូលហាត់របាំខ្មែរមានការលំបាកខ្លាំង ព្រោះនាងចូលហាត់វ័យនាងកាន់តែច្រើន ដែលត្រូវខំហាត់ឲ្យខ្លាំង ទើបអាចស្អាត និងត្រូវតាមក្បួនខ្នាតខ្មែរ។ ប៉ុន្តែនារីពូកែ Lucie Labbe នៅតែមិនបោះបង់ នាងមានបំណងធំថា នាងចង់ឲ្យពិភពលោកបានស្គាល់ពីរបាំខ្មែរ ដែលជារបាំមួយមានអាយុកាលជាច្រើនឆ្នាំមកហើយ ជាពិសេសក្បាច់ក៏ស្អាតមិនចាញ់របាំរបស់ចិន ឥណ្ឌានិងជប៉ុន ឡើយ។

បណ្ឌិតនរវិទ្យា Lucie Labbe

នារីបារាំងដ៏សុភាពម្នាក់នេះ កើតនៅឆ្នាំ១៩៨៦ ក្នុង រដ្ឋ Bretagne នៃប្រទេសបារាំង នាងជាកូនទី១ ក្នុងគ្រួសារដែលមានបងប្អូន២នាក់ ស្រីម្នាក់ ប្រុសម្នាក់។ អ្នកស្រាវជ្រាវពីរបាំក្នុងប្រទេសកម្ពុជាមាន ឪពុកម្តាយ ជាបុគ្គលិកបម្រើការងារក្នុងមន្ទីរពេទ្យមួយនៃប្រទេសបានរាំង ហើយពួកគាត់ក៏មិនហាមឃាត់នាងក្នុងការហាត់របាំដែរ។

បណ្ឌិតរូននេះបានចំណាយពេលរៀនភាសាខ្មែរ១០ឆ្នាំ និងអាចនិយាយភាសាខ្មែបានយ៉ាងល្អ ចំណែកការស្រាវជ្រាវ និងរៀនរបាំខ្មែរមានរយៈពេលជាង១០ឆ្នាំ ។ ក្នុង២០១៧ នាងបានបញ្ចប់ថ្នាក់បណ្ឌិត ដោយសរសេរនិក្ខេបបទទាក់ទងនឹងរបាំខ្មែរ។ នាងក៏បានចូលរួមស្រាវជ្រាវពីការប្រែប្រួលរបាំខ្មែរ ជាមួយសម្ដេចព្រះរៀម និងសាស្រ្ដចារ្យខ្មែរជាច្រើនរូប។ បច្ចុប្បន្នកញ្ញា Lucie Labbe ជាសាស្រ្តចារ្យមួយរូបបង្រៀនផ្នែកនរវិទ្យា នៅសាកលវិទ្យាល័យភូមិន្ទវិចិត្រសិល្បៈ ។ នាងបញ្ជាក់ថានឹងធ្វើដំណើរវិលទៅមកនៃប្រទេសទាំងពីរព្រោះ នាងស្រលាញ់ប្រទេសបារាំង និងកម្ពុជាខ្លាំងណាស់ ដោយមិនកំណត់ថារស់នៅប្រទេសណាមួយឲ្យច្បាស់បានទេ៕