ចង់ដួលទាំងជំហរ! តាមពិតមកពីអ៊ីចឹងសោះ ទើបក្លែងធ្វើពិការវារខ្វៃៗបោកប្រាស់មហាជន

2018-02-13 04:15:16
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី ១២ ខែកុម្ភៈ ឆ្នាំ២០១៨ ម្សិលមិញនេះឧត្ដមសេនីយ៍ឯក រ័ត្ន ស៊្រាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថ រាជធានីភ្នំពេញ បានបញ្ជាដល់កម្លាំងជំនាញ ចុះស្រាវជ្រាវ និងឃាត់ខ្លួនបុរសម្នាក់ដែលក្លែងធ្វើជាពិការដៃជើង និងវារខ្វៃៗនៅតាមទីសាធារណបោកប្រាស់ភ្នែកមហាជន ដើម្បីសុំក្ដីអាណិតអាសូរ។

តាមការទម្លាយពីកម្លាំងសមត្ថកិច្ច មូលហេតុដែលបុរសនោះ ក្លែងធ្វើជាពិការសុំទានគេ ព្រោះតែភាពខ្ជិលច្រអូស ខ្ជិលរកការងារធ្វើ។ បុរសនោះ បានសារភាពថា ការដើរសុំទាននេះ គឺធ្វើតាមឪពុករបស់លោក ហើយលោកផ្ទាល់បានដឹកឪពុក ដើរសុំទាន តាំងពីអាយុ១០ឆ្នាំ។ រាប់ឆ្នាំមកហើយ ដែលបុរសម្នាក់នេះ វារលើបន្ទះក្ដារ ដូចសត្វអណ្ដើក នៅតាមភ្លើងស្តុប តាមរោងចក្រ តាមផ្សារ និងទីប្រជុំជនផ្សេងៗ ក្នុងរាជធានីភ្នំពេញ ដើម្បីសុំទាន តពូជ តត្រកូល។

តាមរយៈការបង្ក្រាបរបស់អាវុធហត្ថរាជធានីភ្នំពេញជាច្រើនដងកន្លងមក បានរកឃើញថា របរសុំទានទាំងនេះ គឺកើតចេញពីភាពខ្ជិលច្រអូសប៉ុណ្ណោះ ហើយវាមិនត្រឹមតែ បង្កភាពអានាធិបតេយ្យ រញ៉េរញ៉ៃ បាត់សណ្ដាប់ធ្នាប់សង្គម ធ្វើឲ្យបរទេសប្រមាថមើលងាយ ដល់កិត្តិយសនិងកេរ្តិ៍ឈ្មោះរបស់ជាតិខ្មែរប៉ុណ្ណោះទេ តែថែមទាំងបង្កប់នូវបទល្មើសនិងការបោកប្រាស់ ជាច្រើនទៀតផងដែរ។ នេះបើតាមទំព័រហ្វេសប៊ុកផ្លូវការរបស់កងរាជអាវុធហត្ថរាជធានីភ្នំពេញ (Phnom Penh Gendarmerie)។

ទស្សនាវីដេអូ៖

ប្រភពដែលឲ្យដឹងទៀតថា ក្រុមអ្នកដើរសុំទានដែលអាវុធហត្ថរាជធានីភ្នំពេញ ធ្លាប់បានបង្ក្រាប ពាក់ព័ន្ធបទល្មើស និងការបោកប្រាស់ មានដូចជា៖

អ្នកសុំទានបន្លំលួចទ្រព្យសម្បត្តិអ្នកដ៏ទៃ (បង្ក្រាប ថ្ងៃទី១៤ ខែមិថុនា ឆ្នាំ២០១៧)
អ្នកសុំទានកេងប្រវ័ញ្ចពលកម្មកុមារ និងរក្សាទុកកុមារ០៧នាក់ ដោយខុសច្បាប់ ប្រើទារុណកម្មបង្ខំឲ្យកុមារ ដើរសុំទាន ដោយមិនឲ្យកុមារទាំងនោះចូលរៀន និងមិនឲ្យអាហារទទួលទានបានគ្រប់គ្រាន់ (បង្ក្រាប ថ្ងៃទី៣០ ខែមិថុនា ឆ្នាំ២០១៧)
ឪពុកម្តាយចឹញ្ចឹមកូន០៥នាក់ ទុកជាទាសករនិងជាឧបករណ៍រកលុយតាមរយៈការដើរសុំទាន (បង្ក្រាប ថ្ងៃទី០៦ ខែកក្កដា ឆ្នាំ២០១៧)
មេក្លោង ប្រមូលលុយ ពីអ្នកសុំទានជារៀងរាល់ថ្ងៃ ដោយក្នុង១ថ្ងៃអ្នកសុំទានម្នាក់ត្រូវបង់លុយចាប់ពី ១ម៉ឺន ទៅ១ម៉ឺន២ពាន់រៀល (បង្ក្រាប ថ្ងៃទី០១ ខែតុលា ឆ្នាំ២០១៧)
អ្នកសុំទានដែលមានកាយសម្បទារនិងកម្លាំងពេញលេញ តែដើរបោកប្រាស់មហាជនថា ជាកម្មករទើបមកពី ប្រទេសថៃ អត់លុយហូបបាយនិងអត់លុយ ជិះឡានឈ្នួលត្រឡប់ទៅស្រុកកំណើតវិញ ( បង្ក្រាប ថ្ងៃទី២២ ខែកក្កដា ឆ្នាំ២០១៧)
អ្នកសុំទានបានលុយទិញថ្នាំញៀនជក់នៅកណ្តាលសួនច្បារទីសាធារណៈ (បង្ក្រាប ថ្ងៃទី០៦ ខែកុម្ភៈ ឆ្នាំ២០១៨)
អ្នកសុំទានដែលមានដៃជើងគ្រប់ទាំងអស់ តែក្លែងជាពិការដើរសុំទាននិងញៀនថ្នាំ ( បង្ក្រាប ថ្ងៃទី០៨ ខែកុម្ភៈ ឆ្នាំ២០១៨)
អ្នកសុំទានមានកាយសម្បទា និងកម្លាំងពេញលេញ សាច់ដុំរឹងមាំដូចកីឡាកាស តែក្លែងជាពិការ វារលើដីដូចអណ្តើក បោកប្រាស់ក្តីមេត្តាមហាជន (បង្ក្រាប ថ្ងៃទី១០ ខែកុម្ភៈ ឆ្នាំ២០១៨) ៕