E-Sports កម្ពុជាជួបភាគីមកពីសិង្ហបុរីដើម្បីផ្សព្វផ្សាយវិញ្ញាសា LOL
- 2018-02-13 05:06:27
- ចំនួនមតិ 0 | ចំនួនចែករំលែក 0
E-Sports កម្ពុជាជួបភាគីមកពីសិង្ហបុរីដើម្បីផ្សព្វផ្សាយវិញ្ញាសា LOL
ចន្លោះមិនឃើញ
សហព័ន្ធកីឡាអេឡិចត្រូនិកកម្ពុជា (EFC) បានជួបពិភាក្សាការងារជាមួយភាគីមកពីប្រទេសសិង្ហបុរីដើម្បីកិច្ចសហប្រតិបត្តិការ និងផ្សព្វផ្សាយវិញ្ញាសា E-Sports ផ្សេងៗនៅកម្ពុជា។ ជំនួបនេះបានធ្វើឡើងកាលពីល្ងាចថ្ងៃចន្ទ ទី១២ ខែកុម្ភៈ ឆ្នាំ២០១៨នៅទីស្នាក់ការនៃគណៈកម្មាធិការជាតិអូឡាំពិកកម្ពុជាដែលមានលោក ជី សិលា ប្រធានសហព័ន្ធ E-Sports កម្ពុជា និងតំណាងមកពីសិង្ហបុរី។
ក្រោយចប់កិច្ចប្រជុំ លោក ជី សិលា បានប្រាប់អ្នកសារព័ត៌មានខ្លះៗថា នេះជាជំនួបលើកទី១ហើយសម្រាប់សហព័ន្ធកីឡា E-Sports កម្ពុជាដែលទទួលភ្ញៀវមកពីក្រៅប្រទេសដើម្បីកិច្ចសហប្រតិបត្តិការ។ វាជាជំនួបដ៏សំខាន់សម្រាប់សហព័ន្ធដើម្បីត្រៀមខ្លួន និងផ្សព្វផ្សាយប្រភេទកីឡាអេឡិចត្រូនិកនៅប្រទេសកម្ពុជា។
លោកប្រធានសហព័ន្ធបានឲ្យដឹងថា ភាគីមកពីសិង្ហបុរីគឺក្រុមហ៊ុន Giot Games Services LTD ដែលសម្លឹងឃើញកីឡាអេឡិចត្រូនិកនៅកម្ពុជាកំពុងមានការរីកចម្រើន និងបានចុះមកផ្ទាល់ដើម្បីពិនិត្យមើលស្ថានភាពកីឡាសម័យទំនើបនេះនៅកម្ពុជា។ កីឡា E-Sports មានវិញ្ញាសាច្រើនប្រភេទ ក្នុងនោះវិញ្ញាសា League of Legends (LOL) ជាវិញ្ញាសាពេញនិយមជាសកល។ LOL នេះត្រូវបានសហព័ន្ធ E-Sports ពិភពលោកដាក់ឲ្យប្រកួតជាលក្ខណៈអន្តរជាតិ និងមានកីឡាករលេងច្រើនណាស់ជុំវិញពិភពលោកតែម្តង។
លោកបន្តថា នៅប្រទេសកម្ពុជាក៏មានកីឡាករលេងវិញ្ញាសា LOL ច្រើនដែរ ប៉ុន្តែមិនទាន់មានរៀបចំការប្រកួតផ្លូវការណាមួយកន្លងមក។ ដូច្នេះបានដៃគូមកពីសិង្ហបុរីសហការជាមួយសហព័ន្ធដើម្បីផ្សព្វផ្សាយវិញ្ញាសា LOL ឲ្យល្អប្រសើរ និងមានផលចំណេញច្រើនសម្រាប់កម្ពុជាក្នុងការអភិវឌ្ឍកីឡាករចេញទៅប្រកួតនៅក្រៅប្រទេស។ ដឹងស្រាប់ហើយ ព្រឹត្តិការណ៍កីឡាដ៏ធំ Asian Games ឆ្នាំ២០២២ នៅប្រទេសចិនបានប្រកាសហើយគឺ នឹងមានកីឡា E-Sports ដើម្បីប្រកួតប្រជែងដណ្តើមយកមេដាយស្មើមុខ-មាត់ដូចប្រភេទកីឡាផ្សេងៗដែរ។
ទោះបីជាយ៉ាងណា លោក ជី សិលា បានបញ្ជាក់ថា លទ្ធផលនៃជំនួបជាមួយភាគីមកពីសិង្ហបុរីយ៉ាងណានោះ សហព័ន្ធនឹងជម្រាបប្រាប់អ្នកសារព័ត៌មាននៅពេលក្រោយទៀត ពីព្រោះកិច្ចការនេះត្រូវជួបប្រជុំគ្នាច្រើនលើកទៀតដើម្បីសិក្សាឲ្យបានច្បាស់លាស់៕