រកឃើញសត្វចម្លែកដ៏កម្រ ៤ប្រភេទ បង្ហាញខ្លួននៅទឹកដីកម្ពុជា
- 2018-02-21 08:42:56
- ចំនួនមតិ 0 | ចំនួនចែករំលែក 0
រកឃើញសត្វចម្លែកដ៏កម្រ ៤ប្រភេទ បង្ហាញខ្លួននៅទឹកដីកម្ពុជា
ចន្លោះមិនឃើញ
ក្រុមអ្នកអភិរក្សរបស់រដ្ឋបាលជលផល អង្គការWCS និងប្រជាជនសហគមន៍ បានរកឃើញសត្វចម្លែកកម្រឃើញ ៤ប្រភេទ បង្ហាញខ្លួននៅទឹកដីប្រទេសកម្ពុជា មានដូចជា៖
#១. សត្វកម្រ "តុកកែហោះ" រកឃើញនៅឧទ្យានជាតិវីរៈជ័យ
ក្រុមឧទ្យានុរក្សការពារនៅតំបន់ឧទ្យានជាតិវីរៈជ័យ បានរកឃើញសត្វតុកកែម្យ៉ាង ដែលពលរដ្ឋ និងអ្នកស្រាវជ្រាវមួយចំនួនឲ្យឈ្មោះថា "តុកកែហោះ" ឬឈ្មោះបច្ចេកទេស "Ptychozoon Trinotaterra" នៅក្នុងឧទ្យាន។ វាគឺជាប្រភេទសត្វកម្រមួយប្រភេទ ដែលត្រូវបានរកឃើញ និងមានប្រវែងប្រមាណ ៣០សង់ទីម៉ែត្រ និងមានរូបរាងក្រឡេក្រឡា។
#២. សំបុកសត្វល្មូនតំណាងជាតិ រកឃើញនៅស្រែអំបិល
ក្រុមអ្នកអភិរក្សរបស់រដ្ឋបាលជលផល អង្គការWCS និងប្រជាជនសហគមន៍ បានរកឃើញអណ្តើកហ្លួង ចំនួន ១សំបុកមានពងចំនួន ១៦គ្រាប់នៅប្រព័ន្ធព្រែកស្រែអំបិល ស្ថិតនៅក្នុងភូមិព្រះអង្គកែវ ស្រុកស្រែអំបិល ខេត្តកោះកុង។ នេះគឺជាសំបុកអណ្តើកហ្លួងទី១ ដែលរកឃើញនៅកម្ពុជាក្នុងឆ្នាំ២០១៨នេះ ។
#៣. សត្វស្លាបតំណាងកម្ពុជា ៤ក្បាល រកឃើញនៅខេត្តមណ្ឌលគិរី
ក្រុមស្រាវជ្រាវរបស់អង្គការ WCS បានរកឃើញសត្វត្រយ៉ងយក្សចំនួន ២គូ (៤ក្បាល) នៅក្នុងដែនជម្រកសត្វព្រៃកែវសីមា នៃខេត្តមណ្ឌលគិរី។ នេះគឺជាការរកឃើញជាលើកដំបូងក្នុងរយៈពេល ១០ឆ្នាំចុងក្រោយនេះ នៅក្នុងដែនជម្រកសត្វព្រៃកែវសីមា។ ត្រយ៉ងយក្ស ជាសត្វស្លាបតំណាងឲ្យប្រទេសកម្ពុជា ស្ថិតនៅក្នុងបញ្ជី ក្រហមរបស់អង្គការ IUCN ជាប្រភេទរងគ្រោះជិតផុតពូជបំផុតនៅលើសកលលោក។
#៤. សំបុកកន្ធាយក្បាលកង្កែបជិតផុតពូជ រកឃើញនៅទន្លេមេគង្គកម្ពុជា
សំបុកពងកូនសត្វកន្ធាយក្បាលកង្កែបចំនួន ១សំបុក ត្រូវបានក្រុមអ្នកអភិរក្សនៃរដ្ឋបាលជលផល អង្គការសមាគមអភិរក្សសត្វព្រៃ (WCS) និងប្រជាសហគមន៍ រកឃើញជាលើកដំបូងនៅក្នុងរដូវកាលពងកូនឆ្នាំនេះ ស្ថិតនៅឆ្នេរខ្សាច់ដងទន្លេមេគង្គ ចន្លោះខេត្តក្រចេះ និងស្ទឹងត្រែង ដែលជាទីកន្លែងពងកូនតែមួយគត់នៅក្នុងប្រទេសកម្ពុជា។ សត្វកន្ធាយក្បាលកង្កែប (ឬរមិច) ជាប់ក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជនៅលើសាកលលោក។
គួរបញ្ជាក់ថា កម្ពុជាគឺជាប្រទេសដែលសម្បូរទៅដោយសត្វកម្រៗជាច្រើនប្រភេទ។ ទន្ទឹមនឹងនេះ ក្រសួងបរិស្ថាន អំពាវនាវឲ្យប្រជាពលរដ្ឋ និងគ្រប់ភាគីពាក់ព័ន្ធចូលរួមក្នុងការថែរក្សាអភិរក្សធនធានធម្មជាតិឲ្យបានគង់វង្សជានិរន្ត៕