បើកបង្ហាញយុវជនវ័យក្មេង៤នាក់ ព្រួតគ្នារចនារូបគំនូរថ្មីលើកំប៉ុងកូកា
- 2018-02-22 02:54:19
- ចំនួនមតិ 0 | ចំនួនចែករំលែក 0
បើកបង្ហាញយុវជនវ័យក្មេង៤នាក់ ព្រួតគ្នារចនារូបគំនូរថ្មីលើកំប៉ុងកូកា
ចន្លោះមិនឃើញ
យុវជនវ័យក្មេង៤រូប បានសម្រេចនាំគ្នារចនារូបគំនូរថ្មីលើកំប៉ុងកូកាកូឡា ដោយបង្ហាញពីនិមិត្តសញ្ញា និងអត្ថន័យ ៣ ផ្សេងៗគ្នា សម្រាប់ជូនជាកាដូដ៏មានតម្លៃក្នុងឱកាសបុណ្យចូលឆ្នាំថ្មីប្រពៃណីជាតិខែ្មរ។
ការរចនាយ៉ាងសម្រិតសម្រាំង ផ្ចិតផ្ចង់ និងយកចិត្តទុកដាក់ជាទីបំផុតពីសិល្បករខ្មែរ ៤រូបនោះរួមមាន៖ បេះដូង គោមផ្កាយ និងផ្កាម្លិះ។
លោក សន ករុណា អាយុ ២៣ឆ្នាំ អ្នករចនារូបគោមផ្កាយ “តំណាងឲ្យជូនពរជ័យសិរីមង្គល” ។ លោកទើបតែបញ្ចប់ការសិក្សាផ្នែក Interior Design នៅសកលវិទ្យាល័យភូមិន្ទវិចិត្រសិល្បៈ។ ករុណា មានជំនាញខាងគំនូរប្រពៃណីខ្មែរ និងគំនូរ doodle។ ស្នាដៃសិល្បៈរបស់លោក ភាគច្រើនបានដាក់តាំងនៅតាមជញ្ជាំង ហាងកាហ្វេ ហាងទំនិញ ការិយាល័យ និងភោជនីយដ្ឋាននានា។
ផ្អែកទៅលើគោមរូបផ្កាយដែលមានប្រជាប្រិយភាព និងត្រូវបានគេប្រើយ៉ាងទូលំទូលាយក្នុងអំឡុងពេលនៃការប្រារព្ធពិធីបុណ្យចូល ឆ្នាំខ្មែរ។ ទាំងការរិះរកគំនិត ការរចនា និងការអភិវឌ្ឍនៃស្នាដៃសិល្បៈនេះ ខ្ញុំបានចំណាយពេលជិត២ សប្តាហ៍ដើម្បីបញ្ចប់កិច្ចការងារនេះ។
"ខ្ញុំបានរចនាវាឡើង ក្នុងគោលបំណងដើម្បីបង្ហាញឱ្យឃើញនូវក្បាច់ភ្ញីទេសរបស់ខ្មែរ(ភាគច្រើនឃើញមាននៅតាមជញ្ជាំងប្រាសាទ) និងបញ្ចូលវាជាមួយ កូកា-កូឡា ដើម្បីទទួលអំណរ បុណ្យចូលឆ្នាំថ្មី។ ស្នាដៃសិល្បៈនេះគឺជាការច្នៃប្រឌិតរបស់ខ្មែខ្មែរសុទ្ធសាធ"។ កុរណា ថ្លែងក្នុងសន្និសីទកាលពីថ្ងៃ ២០ កុម្ភៈ។
លោក ចាន់ សំអន អាយុ ៣១ឆ្នាំ រចនារូបបេះដូង "តំណាងឲ្យសេចក្តីស្រឡាញ់” ដោយចំណាយពេលជាង១ខែ ទើបលេចចេញជារូបរាងនេះឡើង។ លោកបានបញ្ចប់ការសិក្សាពីសកលវិទ្យាល័យភូមិន្ទវិចិត្រសិល្បៈ ជំនាញខាងគំនូរ។ គំនូរលោក ភាគច្រើនត្រូវបានប្រើនៅក្នុងវិស័យផ្សាយពាណិជ្ជកម្ម និងទំនាក់ទំនង ដូចជា ប្រក្រតិទិន ខិត្តប័ណ្ណ ផ្ទាំងរូបភាព និងផ្ទាំងប៉ាណូ ជាដើម។ បើតាមការឲ្យដឹងពីយុវជនវ័យ ៣១ឆ្នាំរូបនេះប្រាប់ថា៖ "ជាមួយនឹងគំនិតនេះ ខ្ញុំបានសម្រេចចិត្តបង្កើតតវាជារាងបេះដូងចេញពីដៃអប្សរា។ អប្សរា គឺជាលក្ខណៈដ៏ល្អឯក និងមានតែមួយគត់នៅប្រទេសកម្ពុជា ហើយដើម្បី ភ្ជាប់ជាមួយនឹងគំនិតនៃ "សេចក្តីស្រឡាញ់"។ ដៃស្តាំតំណាងឲ្យផ្លែឈើ ហើយដៃឆ្វេងតំណាងឲ្យស្លឹក។ ដោយរួមបញ្ចូលគ្នាជាមួយក្បាច់ភ្ញីទេស ស្នាដៃសិល្បៈនេះតំណាងឲ្យភាពចម្រុងចម្រើនរុងរឿង"។
រូបផ្កាម្លិះ “តំណាងឲ្យការចែករំលែកសំណាង និងភាពរីករាយ” ដែលជាស្នាដៃរួមគ្នារវាង កញ្ញា ម៉ម លីសា និងលោក PEAP TARR។ ក្នុងថ្ងៃ សន្និសីទបង្ហាញជាផ្លូវការនូវរូបគំនូរនេះ អ្នកទាំងពីរបានឲ្យដឹងថា ផ្កាម្លិះគឺជាផ្នែកមួយដ៏សំខាន់ក្នុងការប្រារព្ធពិធីចូលឆ្នាំខ្មែរ។ វាជារូបតំណាងនាំឱ្យភាពបរិសុទ្ធ សំណាង និងភាពរុងរឿងដល់ក្រុមគ្រួសារ សាច់ញាតិ និង មិត្តភក្តិពេញមួយឆ្នាំ។ វាក៏ត្រូវបានគេប្រើយ៉ាងទូលំទូលាយសម្រាប់ការបួងសួងសុំសេចក្តីសុខចម្រើនក្នុងអំឡុងពេលចូលឆ្នាំថ្មី និងដើម្បីចែករំលែកសុភមង្គលពេញមួយឆ្នាំផងដែរ។ ជាមួយនឹងការរចនារបស់យើង យើងចង់ឲ្យគ្រប់គ្នានឹកឃើញដល់រូបតំណាងនេះជាផ្នែកមួយដ៏សំខាន់នៃការប្រារព្ធពិធីចូលឆ្នាំថ្មីនាឆ្នាំនេះ។
សំនួរ : តើអ្នករចនាវាដោយប្រើអស់រយៈពេលប៉ុន្មានដែរ? ចម្លើយ: ទាំងលីសា ទាំងខ្ញុំ បានផ្លាស់ប្តូរគំនិតគ្នា និងបានរចនាស្នាដៃសិល្បៈចំនួនពីរ ឬបីដែរ។ ដំបូងពួកយើង គិតថានឹងធ្វើវាឲ្យមានលក្ខណៈស្មុគស្មាញបន្តិច ប៉ុន្តែនៅទីបំផុត យើងក៏នឹកឃើញថាយើងត្រូវតែរចនាវាតាមបែបសាមញ្ញៗវិញ ដើម្បីឲ្យវាមើលទៅសមល្អនៅលើកំប៉ុង កូកា-កូឡា ។ វាមានឧបសគ្គតិចតួច ពេលបង្កើតស្នាដៃនេះព្រោះកន្លងមកពួកយើងធ្លាប់តែមានបទពិសោធន៍ច្រើនច្រើនគូររូបធំៗនៅលើជញ្ជាំងដ៏ធំ តែនៅពេលនេះ វាពិតជាធ្វើឱ្យពួកយើងចាប់អារម្មណ៍ និងពេញចិត្តមែនទែនក្នុងការបង្កើតស្នាដៃសិល្បៈនៅលើទីតាំងតូចមួយបែបនេះ។ យើងបានចំណាយពេលមួយសប្ដាហ៍ប៉ុណ្ណោះ ដើម្បីធ្វើកិច្ចការងារនេះឲ្យចប់រួចរាល់។
ក្រុមហ៊ុន កូកា-កូឡា មានការជឿជាក់យ៉ាងខ្លាំងលើសមត្ថភាព និងភាពច្នៃប្រឌិតរបស់យុវជនខ្មែរដូច្នេះហើយទើបក្រុមហ៊ុនបានសហការជាមួយសិល្បករខ្មែរ ៤ រូប ដ៏មានទេពកោសល្យ និងជំនាញដើម្បីរចនាកំប៉ុង កូកា-កូឡា។ ស្នាដៃសិល្បៈនេះបង្ហាញពីនិមិត្តសញ្ញា រចនាបថ (ស្ទីល) និងអត្ថន័យខុសៗគ្នា។ ស្នាដៃនេះក៏មានបំណងក្នុងការរំលេចឡើង និងលើកកម្ពស់វប្បធម៌ដ៏ល្អផូរផង់ និងសម្បូរបែបរបស់ខ្មែរ និងជាការជំរុញឲ្យអតិថិជនបានចែករំលែកពេលវេលានៃភាពសប្បាយរីករាយជាមួយគ្នាក្នុងឱកាសឆ្នាំថ្មី។