រឿងសាមញ្ញទាំង ១០ គួរជៀសវាង បើមិនចង់មានផលវិបាកថ្ងៃក្រោយ

2018-02-22 03:08:08
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សភាគច្រើន តែងមើលរំលងរឿងសាមញ្ញមួយចំនួនដែលគិតថាវាមិនសំខាន់។ ប៉ុន្តែ ពួកគេមិនបានដឹងទេថា រឿងសាមញ្ញខ្លះអាចនឹងបង្កផលវិបាកធ្ងន់ធ្ងរនៅថ្ងៃក្រោយ។

ខាងក្រោមនេះ គឺជារឿងសាមញ្ញទាំង ១០ គួរជៀសវាង បើមិនចង់មានផលវិបាកថ្ងៃក្រោយ ៖

១. ទម្លាប់កុហកពីរឿងតូចៗ

មនុស្សមួយចំនួន ហេតុតែចង់ឲ្យគេមើលមកថាខ្លួនល្អ សុខចិត្តកុហកអំពីរឿងរ៉ាវតូចៗដើម្បីបិតបាំងភាពអាក្រក់។ ប៉ុន្តែ ការពិតនឹងត្រូវលាតត្រដាងនៅថ្ងៃណាមួយ ដែលធ្វើឲ្យអ្នកដទៃបាត់បង់ទំនុកចិត្ត និងមិនចង់រាប់រក។

២. ទម្លាប់បន្ទោសអ្នកដទៃ

នៅពេលដែលយើងទម្លាក់កំហុសទៅលើនរណាម្នាក់ នោះមានន័យថាយើងមិនទទួលខុសត្រូវចំពោះសកម្មភាពរបស់ខ្លួនឯងនោះទេ។ វាគឺជាការទម្លាក់ទំនួលខុសត្រូវរបស់ខ្លួនឲ្យទៅអ្នកដទៃ។ ការធ្វើដូចនេះ មិនត្រឹមតែធ្វើឲ្យយើងមានគ្រោះថ្នាក់នៅថ្ងៃណាមួយនោះទេ ប៉ុន្តែវានឹងធ្វើឲ្យយើងមានកំហុសកាន់តែច្រើនឡើងៗ។

៣. ទម្លាប់លាក់បាំងអារម្មណ៍ពិត

នៅពេលដែលយើងលាក់អារម្មណ៍ពិត វាមានន័យថាយើងភ័យខ្លាចក្នុងការបង្ហាញវាចេញមកក្រៅ។ ហេតុផលអាចមានខុសៗគ្នា ប៉ុន្តែដើម្បីរស់នៅដោយមានក្ដីសុខ អ្នកត្រូវតែព្យាយាមបោះបង់វាចោល និងបង្ហាញអ្វីដែលមានក្នុងចិត្ត។

៤. ទម្លាប់ប្រឹងប្រែងហួសហេតុពេក រហូតដល់យឺតពេល

នៅពេលដែលយើងព្យាយាមតស៊ូនឹងភាពលំបាកតែម្នាក់ឯងយ៉ាងយូរ ថ្ងៃណាមួយវានឹងផ្ទុះឡើង ហើយធ្វើឲ្យមានផលវិបាកធ្ងន់ធ្ងរដល់ខ្លួនឯង និងអ្នកជុំវិញខ្លួន។ ដូច្នេះ បើអ្នកគិតថាអ្វីដែលអ្នកកំពុងធ្វើលំបាកខ្លាំង ចូរពិចារណាម្ដងទៀត ឬបោះបង់វាចោលតែម្ដង។

៥. ទម្លាប់រអ៊ូរទាំ និងខឹងច្រើន

មនុស្សមួយចំនួន តែងតែមិនពេញចិត្តជាមួយអ្វីជុំវិញខ្លួនពួកគេ។ ការធ្វើទំនាក់ទំនងណាមួយជាមួយមនុស្សប្រភេទនេះ នឹងធ្វើឲ្យយើងចង់ដើរចេញភ្លាមៗ មិនចង់និយាយរកទៀត។ ប្រសិនបើអ្នកមានទម្លាប់នេះ ចូរបោះបង់វាចោលភ្លាម ព្រោះវានឹងធ្វើឲ្យអ្នកបាត់បង់ទំនុកចិត្តលើខ្លួនឯង។

៦. ទម្លាប់ចាយវាយហួសប្រមាណ

ប្រសិនបើយើងចាយវាយច្រើនហួសប្រមាណ មានន័យថាយើងកំពុងនាំខ្លួនឯងទៅរកបញ្ហាធំនៅថ្ងៃមុខ។ វាជាការប្រសើរណាស់ ដែលអ្នកគួរតែថ្លឹងថ្លែងពីចំណូលរបស់អ្នក មុននឹងសម្រេចចិត្តទិញអ្វីមួយ។ លើសពីនេះទៀត អ្នកគួរតែស្វែងរកជម្រើសណាមួយដើម្បីអភិវឌ្ឍសេដ្ឋកិច្ចផ្ទាល់ខ្លួន ជាជាងទៅខ្ចីលុយអ្នកដទៃ។

៧. ទម្លាប់ប្រកែក

នៅពេលដែលអ្នក តែងតែជំទាស់ជាមួយគំនិតអ្នកដទៃ មិនយូរមិនឆាប់ពួកគេនឹងចាកចេញពីអ្នកម្ដងមួយៗ។ យ៉ាងណាមិញ បើទោះបីជាគំនិតរបស់អ្នកត្រូវក៏ដោយ ប៉ុន្តែមិនមែនមានន័យថាពួកគេមិនអាចបញ្ចេញគំនិតរបស់ខ្លួនបាននោះទេ។

៨. ទម្លាប់និយមភាពឥតខ្ចោះពេក

ភាពល្អឥតខ្ចោះ គឺជារឿងល្អ ប៉ុន្តែវាក៏ផ្ដល់ផលវិបាកផងដែរ នៅពេលដែលអ្នកទោរទន់ទៅរកវាខ្លាំងពេក។ ដូច្នេះហើយ អ្នកត្រូវរៀនសម្រេចចិត្តថាអ្វីដែលកំពុងធ្វើ គឺល្អឬមិនល្អ។

៩. ទម្លាប់បណ្ដែតបណ្ដោយពេលវេលា

នៅពេលដែលអ្នក បណ្ដែតបណ្ដោយជីវិតទៅតាមពេលវេលា នោះវានឹងកន្លងផុតទៅក្នុងមួយប៉ប្រិចភ្នែក។ ដូច្នេះហើយ អ្នកគួរធ្វើអ្វីដែលមានប្រយោជន៍ និងប្រើប្រាស់ពេលវេលាឲ្យបានត្រឹមត្រូវ។

១០. ទម្លាប់លះបង់ហួសហេតុ

ប្រសិនបើយើងតែងតែ មិនផ្ដល់តម្លៃដល់តម្រូវការផ្ទាល់ខ្លួន នោះអ្នកដទៃនឹងមិនផ្ដល់តម្លៃដល់យើងផងដែរ។ វានឹងធ្វើឲ្យបាត់បង់តម្លៃផ្ទាល់ខ្លួន និងការគោរពពីអ្នកដទៃ។ ដូចនេះ អ្នកគួរតែចាប់ផ្តើមស្រឡាញ់ខ្លួនឯងឲ្យបានច្រើនជាងអ្នកដទៃ៕