រឿងទាំងនេះ បញ្ជាក់ឲ្យអ្នកគួរតែអបអរ ពេលឃើញមិត្ត ឬនរណាម្នាក់ជោគជ័យ ជាជាងច្រណែន
- 2018-02-22 14:07:28
- ចំនួនមតិ 0 | ចំនួនចែករំលែក 0
រឿងទាំងនេះ បញ្ជាក់ឲ្យអ្នកគួរតែអបអរ ពេលឃើញមិត្ត ឬនរណាម្នាក់ជោគជ័យ ជាជាងច្រណែន
ចន្លោះមិនឃើញ
ជោគជ័យរបស់បុគ្គលមួយរូប ដូចជា ការឡើងតំណែង និងការឡើងប្រាក់បៀវត្សជាដើម អាចជារឿងមិនសប្បាយចិត្តរបស់បុគ្គលមួយចំនួនទៀត ភាគច្រើនដោយសារតែរោគមួយដែលលោកអ្នកភាគច្រើនហៅថា ការច្រណែន។ ទោះជាយ៉ាងណា បើតាមអ្នកជំនាញសុខាភិបាលសាធារណៈ លោកស្រី Najma Khorrami យល់ថាផ្នត់គំនិតដែលច្រណែនបែបនេះមិនគួរត្រូវបានបណ្ដោយឲ្យកើតមានឡើយ។ បន្ថែមពីលើនេះ អ្នកស្រីក៏បានផ្ដល់ហេតុផលចំនួន ៤ ទាក់ទិននឹង ហេតុអីបានជាបុគ្គលគ្រប់រូប គួរតែអបអរពេលឃើញអ្នកដទៃជោគជ័យ។
ហេតុផលទាំង ៤នោះ មានអត្ថន័យដូចខាងក្រោម៖
១.ហេតុផលសុខភាព៖ នៅពេលលោកអ្នកអបអរនឹងជោគជ័យរបស់អ្នកដទៃ គឺអារម្មណ៍ទាំងហ្នឹងជួយឲ្យលោកអ្នកមានទស្សនៈវិជ្ជមាន សុទិដ្ឋិនិយម និង រីករាយ ហើយនៅពេលដែលមានអារម្មណ៍ស្រស់ថ្លាបែបនេះ ធ្វើឲ្យសុខភាពលោកអ្នកក៏ល្អតាមហ្នឹង។ បើតាមការសិក្សាថ្មីមួយរបស់សាកលវិទ្យាល័យល្បីឈ្មោះរបស់សហរដ្ឋអាមេរិក Harvard បានបញ្ជាក់ឲ្យដឹងថា ចំពោះស្ត្រី នៅពេលមានអារម្មណ៍សុទិដ្ឋិនិយម អារម្មណ៍នេះអាចជួយកាត់បន្ថយអត្រាស្លាប់ដោយជំងឺធ្ងន់ធ្ងរមួយចំនួនដូចជាជំងឺបេះដូងជាដើម។
២.ការបង្កើតឱកាស៖ នៅពេលលោកអ្នក លឺអ្នកជិតស្និទ្ធរបស់ខ្លួនបានជោគជ័យ សូមកុំអាក់អន់ស្រពន់ចិត្ត ឬច្រណែន។ សូមអ្នកគិតថា ការជោគជ័យនេះផ្ដល់ឱកាសទៅឲ្យលោកអ្នកវិញ។ ឧទាហរណ៍ នៅពេលអ្នកជិតស្និទ្ធលោកអ្នកបានការងារក្នុងក្រុមហ៊ុនល្អធ្វើ ជាជាងយកពេលទៅច្រណែន លោកអ្នកអាចគិតថា ជោគជ័យរបស់ពួកគេ អាចបើកវិថីជោគជ័យសម្រាប់លោកអ្នក ដូចជា អ្នកអាចស្គាល់ពីក្រុមហ៊ុនហ្នឹងច្បាស់ជាងមុន ឬអាចកសាងបណ្ដាញការងារជាមួយពួកគេ។
៣.ការរឹតចំណងនៃការទំនាក់ទំនង៖ ការអបអរជោគជ័យអ្នកដទៃ អាចជួយឲ្យលោកអ្នកមានទំនាក់ទំនងល្អជាមួយពួកគេ។ ការអបអរពេលអ្នកដទៃជោគជ័យនេះ ក៏អាចជាវិធីមួយក្នុងការកសាងទំនុកចិត្ត និងភាពជឿជាក់គ្នាទៅវិញទៅមក ដែលទាំងនេះអាចធ្វើឲ្យចំណងទាក់ទងគ្នាស្ថិតស្ថេរបានយូរ។ ការចងមិត្តច្បាស់ណាស់ ល្អជាជាងការចងសត្រូវ។
៤.ការបណ្ដុះឆន្ទៈ៖ បើតាមគំនិតអ្នកស្រី Khorrami ការទទួលស្គាល់ ឬអបអរការជោគជ័យរបស់អ្នកដទៃអាចជួយបណ្ដុះឆន្ទៈរបស់លោកអ្នកឲ្យខិតខំតទៅមុខទៀត។ ផ្ទុយទៅវិញ នៅពេលច្រណែនអ្នកដទៃ អ្នកស្រីគិតថា វាធ្វើឲ្យលោកអ្នកថយឆន្ទៈក្នុងការពុះពារបំពេញភារកិច្ចរបស់លោកអ្នកទៅវិញ ដោយសារលោកអ្នកបានប្រើពេលវេលាមួយចំណែកដ៏មានតម្លៃ គិតលើផ្លូវអវិជ្ជមានរួចស្រេចទៅហើយ៕