គ្រូវិសាខា ផ្ដាំទៅកូនក្រុម១ឃ្លា ក្រោយពីឈ្នះជាប់ៗគ្នាពេក
- 2018-02-23 01:55:49
- ចំនួនមតិ 0 | ចំនួនចែករំលែក 0
គ្រូវិសាខា ផ្ដាំទៅកូនក្រុម១ឃ្លា ក្រោយពីឈ្នះជាប់ៗគ្នាពេក
ចន្លោះមិនឃើញ
លោក ហុក សុជីវ័ន គ្រូបង្វឹករបស់ក្រុមវិសាខា បានផ្ដាំទៅកូនក្រុមទាំងអស់ថាការឈ្នះក្នុងប្រកួតមិត្តភាពអាចត្រឹមឱ្យរីករាយប៉ុណ្ណោះ មិនអាចភ្លេចខ្លួន មានអំនួតនោះទេ ព្រោះការប្រកួតផ្លូវការមិនទាន់ចាប់ផ្ដើមនៅឡើយ។
មចំណូលថ្មីដែលល្បីថាចាយលុយមិនស្ដាយ វិសាខា កំពុងតែមានទម្រង់លេងល្អមែនទែន ដោយការប្រកួត៨ប្រកួតកន្លងមក ពួកគេមិនទាន់ស្គាល់បរាជ័យនៅឡើយទេ។ ដោយ៨ប្រកួតទាំងអស់នោះរួមមាន ឈ្នះអាស៊ីអឺរ៉ុប ២-០ ឈ្នះអគ្គិសនីកម្ពុជា ៣-០ ឈ្នះក្រុមថៃ Trat FC ២-០ ស្មើក្រុម Chanthaburi FC ២-២ ឈ្នះក្រុមជម្រើសខេត្តកោះកុង ៣-២ ឈ្នះក្រុមអង្គរថៃហ្គ័រ ៣-០ ឈ្នះក្រុមព្រះខ័នរាជស្វាយរៀង ៥-១ និងឈ្នះវេស្ទើន៣-២។
ទន្ទឹមទៅនឹងការឈ្នះ មិនទាន់ស្គាល់បរាជ័យនេះដែរ លោក ហុក សុជីវ័ន គ្រូបង្វឹករបស់ក្រុមវិសាខាបានផ្ដាំទៅកូនក្រុមទាំងអស់ថា៖ “ទាំងនេះគ្រាន់តែជាលទ្ធផលកន្លងមកដែលអាចឱ្យយើងសប្បាយរីករាយ តែយើងមិនអាចរីករាយរហូតដល់ភ្លេចខ្លួន មានអំនួតក្នុងខ្លួននោះទេ ខ្ញុំគ្រាន់តែក្រើនរំលឹកដល់អ្នកទាំងអស់គ្នាថា អ្វីៗវាមិនទាន់ចាប់ផ្តើមនោះទេ សូមអ្នកទាំងអស់គ្នាប្រឹងប្រែងបន្តទៀត ពាក្យថាជាកីឡាករបាល់ទាត់ គឺត្រូវប្រកាន់ភ្ជាប់នូវពាក្យមួយថា មិនចេះគ្រប់គ្រាន់ ត្រូវការបំពេញបន្ថែមរហូតមិនចេះចប់”។
វិសាខា ជាក្លឹបឡើងលេងលីគកំពូលកម្ពុជា ក្រោយពីពួកគេយកបានលេខ១ក្នុងលីគលំដាប់ទី២កាលពីរដូវកាលមុន។ ក្រុមចំណូលថ្មីមួយនេះ បានបង្ហាញសាច់ដុំរបស់ខ្លួន ក្រោយពីចុះកុងត្រាយកកីឡាករកូរ៉េខាងជើង៤នាក់ពីក្រសួងការពារជាតិ និងថែមកូរ៉េខាងជើងម្នាក់ទៀតដើម្បីបង្គ្រប់៥នាក់សម្រាប់កីឡាករបរទេស។ ខណៈដែលលីគកំពូលកម្ពុជាវិញ នឹងចាប់ដំណើរការនៅថ្ងៃទី៣ខែមីនាឆ្នាំ២០១៨ខាងមុខនេះហើយ ដោយមានក្រុមចូលរួម១២ក្រុម៕