Jose Mourinho ព្រមាន Pogba កប់ៗមាត់
- 2018-02-24 04:33:23
- ចំនួនមតិ 0 | ចំនួនចែករំលែក 0
Jose Mourinho ព្រមាន Pogba កប់ៗមាត់
ចន្លោះមិនឃើញ
Jose Mourinho បានព្រមានកីឡាករធ្លាប់មានតម្លៃខ្លួនថ្លៃបំផុតរបស់ពិភពលោក ៨៩ លានផោន (ប្រហែល ១២៤ លានដុល្លារ) Paul Pogba ត្រូវធ្វើយ៉ាងណាឲ្យលោកទុកចិត្ត។
ខ្សែបម្រើសញ្ជាតិបារាំងបានខ្ទាតចេញពីបញ្ជីកីឡាករក្នុងដួងចិត្តរបស់កំពូលគ្រូបង្វឹកសញ្ជាតិព័រទុយហ្គាល់ ហើយគ្រូបង្វឹកវ័យ៥៥ឆ្នាំបានសរសើរកីឡាករ Scott McTominay វ័យ ២១ឆ្នាំ ដែលលោកបានដាក់ឲ្យចូលលេងជម្រើសដំបូង ក្នុងក្របខ័ណ្ឌ Champions League ដោយលទ្ធផលស្មើ ០-០ នៅទឹកដី Sevilla ខណៈដែល Pogba បានត្រឹមអង្គុយកៅអីបម្រុង។ នេះបើតាម សារព័ត៌មាន The Mirror។
ប្រភពខាងលើបន្តថាការដាក់កីឡាករវ័យក្មេងលេងជំនួសកំពូលកីឡាករ Pogba គឺលោក Mourinho មានចេតនាព្រមានដល់អតីតកីឡាករ Juventus ក៏ដូចជាកីឡាករដទៃទៀតក្នុងក្រុមត្រូវតែទុកចិត្តលោក ហើយក៏ត្រូវធ្វើឲ្យលោកទុកចិត្តដូចគ្នា។
ក្រុមអ្នកគាំទ្រខឹងសម្បានឹងលោក Mourinho មិនបានដាក់ Pogba ចូលលេងពេញម៉ោងទើបលទ្ធផលបានត្រឹមស្មើ Sevilla ប៉ុន្តែគ្រូបង្វឹកបទពិសោធន៍ជោកជាំមួយនេះបានពន្យល់ថា Pogba គឺជាកីឡាករកម្រិតពិភពលោកដែលមិនគោរពវិន័យ មិនបានត្រៀមខ្លួនសូម្បីមកហាត់ អង្គុយនៅកៅអីរង់ចាំរហូតដល់គេហៅឈ្មោះឲ្យចូលទីលាន មិនបានត្រៀមខ្លួនសូម្បីកម្តៅសាច់ដុំ។ កាលប៉ះជាមួយ Huddersfield ធ្វើអីចឹង ដល់មកលេង Champions League ធ្វើអីចឹងទៀត។ ប្រភពខាងលើបន្ត។
“កីឡាករម្នាក់ នៅពេលចាប់ផ្តើមការប្រកួតមានការរៀបចំខុសៗគ្នា ត្រូវនៅអង្គុយលើកៅអី ហើយចូលប្រកួតក្នុងទីលានដោយមិនបានកម្តៅសាច់ដុំ ហើយចូលប្រកួត វាមិនមែនស្រួលទេ...” លោក Mourinho បាននិយាយ៕