សុវណ្ណភូមិ Hotel FC ជាក្រុមមួយគត់ដែលស៊ីគេ ១០-០ ថ្ងៃដំបូងនៅមណ្ឌលកំពង់ចាម
- 2018-02-24 12:14:33
- ចំនួនមតិ 0 | ចំនួនចែករំលែក 0
សុវណ្ណភូមិ Hotel FC ជាក្រុមមួយគត់ដែលស៊ីគេ ១០-០ ថ្ងៃដំបូងនៅមណ្ឌលកំពង់ចាម
ចន្លោះមិនឃើញ
ក្រុមបាល់ទាត់ សុវណ្ណភូមិ Hotel FC ជាក្រុមទី១ហើយ ដែលទាត់បញ្ចូលទីដៃគូរហូតដល់ទៅ១០គ្រាប់ និងគ្មានរបូតសូម្បីមួយគ្រាប់ នាថ្ងៃទី១ នៃការប្រកួតជ្រើសរើសជើងឯកមណ្ឌលកំពង់ចាម ពានរង្វាន់ Tiger Street Football Festival 2018 ។
លោក អ៊ិត ហូសេន ប្រធានក្រុម សុវណ្ណភូមិ Hotel FC ប្រាប់ឲ្យដឹងថា ការប្រកួតល្ងាចមិញនេះក្រុមរបស់ពួកគេពិតជាធ្វើបានល្អមែនទែន មិនថាខ្សែប្រយុទ្ធ ឬខ្សែការពារនោះទេ ពោលគឺសហការគ្នា យល់ចិត្តបានល្អតែម្ដង។ មុនការប្រកួតនេះចាប់ផ្ដើម ប្រធានក្រុមខាងលើមិនរំពឹងថាក្រុមខ្លួន អាចរកបានគ្រាប់បាល់ច្រើនរហូតដល់១០គ្រាប់បែបនេះឡើយ។
ក្រុមដែលសំបូរដោយយុវជនខាងលើនេះបន្តថា ដោយសារបទពិសោធរបស់កីឡាករក្នុងក្រុមនិមួយៗ មិនតិចជាង ៦-៧ឆ្នាំមកហើយ រួមផ្សំងនឹងការត្រៀមខ្លួនបានល្អ មានរយៈពេលយូរគួរសមផងនោះ ទើបទទួលបានលទ្ធផលដូចនេះ។
ការប្រកួតពានរង្វាន់ Tiger Street Football Festival 2018 នៅមណ្ឌលកំពង់ចាមនេះបានបញ្ចប់ថ្ងៃទី១ហើយ ដោយមានចំនួនប្រកួតសរុប៤០ប្រកួត ខណៈថ្ងៃទី២ ស្អែកនេះ នឹងប្រកួតបន្តទៀតរហូតរកបានក្រុមពីលេខ១ ដល់ ៦ ឡើងទៅជុំផ្ដាច់ព្រ័ត្រទូទាំងប្រទេសនៅភ្នំពេញ៕