រកឃើញកត្តាមួយចំនួន ជុំវិញបរាជ័យនៃរឿង "កិច្ចសន្យាស្នេហ៍ Tom & Jerry”

2018-02-27 03:35:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម Rock បានខកខានបន្តភាពជោគជ័យសម្រាប់រឿងស្វាគមន៍ថ្ងៃបុណ្យនៃក្ដីស្រឡាញ់ ក្រោយរឿង "កិច្ចសន្យាស្នេហ៍ Tom & Jerry” បានបរាជ័យ មិននឹកស្មានដល់ ជាមួយហេតុផលមួយចំនួន។

ខុសពីរឿងពីអតីតកាល រឿង "កិច្ចសន្យាស្នេហ៍ Tom & Jerry” បញ្ចាំងបានតែ២សប្ដាហ៍ប៉ុណ្ណោះ ក៏ត្រូវខាងរោងកុនទម្លាក់ចុះ ដោយសារខ្សត់អ្នកទស្សនា ខណៈក្រុមផលិតបានទទួលស្គាល់ថាមានចំណុចអវិជ្ជមានមួយចំនួន បានចងភ្ជាប់រឿងខាងលើ មិនអាចទទួលជោគជ័យដូចរឿងមុនៗបាន។

លោក យឹម សុសត្យា ប្រធានគ្រប់គ្រងការផលិតរបស់ផលិតកម្ម Rock បានឲ្យដឹងថា ចំណុចទាំងនោះមាន ទី១ មានពាក់ព័ន្ធនឹងតួឯកប្រុស ស្រីទាំងពីរ លោក ម៉ា ច័ន្ទបញ្ញា និងកញ្ញា អ៊ីងអ៊ីង ដែលគូសង្សារនឹងគ្នាស្រាប់។ លោកថា មុនសម្រេចជ្រើសរើសគូស្នេហ៍មួយគូនេះជាតួឯក លោកសង្កេតឃើញថា ពួកគេមានប្រជាប្រិយភាពខ្លាំងតាមរយៈ Original Song ក្នុងចង្កោមយុវវ័យ។

ប៉ុន្តែពេលរឿងជិតដាក់បញ្ចាំង តួឯកទាំងពីរស្រាប់តែភ្លាត់មានបញ្ហាផ្ទាល់ខ្លួននឹងគ្នា បង្ហោះចេញលើបណ្ដាញសង្គម។ បញ្ហានេះ លោកថា អាចជាហេតុមួយដែរ ដែលធ្វើឲ្យរឿងរបស់ពួកគេ ធ្លាក់ចុះការទាក់ទាញ។

តួឯកប្រុស ស្រី ម៉ា ច័ន្ទបញ្ញា និងកញ្ញា អ៊ីងអ៊ីង ក្នុងថ្ងៃសម្ពោធដាក់បញ្ចាំងរឿងរបស់ខ្លួន

ទី២.ចេញក្រោយ និងកៀកគ្នាពេកនឹងរឿង "ធ្មប់"។ បញ្ហានេះ លោក លើកឡើងថា ទស្សនិកជនបានឆ្អែតនឹងការទស្សនារឿង "ធ្មប់" របស់ផលិតករ ហ៊ុយ យ៉ាឡេង ដែលទទួលបានការគាំទ្រខ្លាំង។ ដូច្នេះ ពេលដាក់រឿង "កិច្ចសន្យាស្នេហ៍ Tom & Jerry" ទៅ ផ្សំនឹងយុវវ័យដែលមិនសូវមានខ្ទង់សម្រាប់ចំណាយច្រើនផង ធ្វើឲ្យរឿងរបស់ Rock មួយនេះ ខ្សត់ការគាំទ្រ។

ដោយឡែកចំណុចទី៣ គឺមានពាក់ព័ន្ធនឹងថ្ងៃបុណ្យនៃក្ដីស្រឡាញ់៖ ជារៀងរាល់ឆ្នាំ Rock តែងបញ្ចេញភាពយន្ត១រឿងឲ្យត្រូវនឹងឱកាសនេះ ជាក់ស្ដែងពួកគេទទួលជោគជ័យបន្តបន្ទាប់រួចហើយ។ ប៉ុន្តែថ្ងៃបុណ្យនៃក្ដីស្រឡាញ់ឆ្នាំនេះ ខុសពីឆ្នាំមុន។

លោក សុសត្យា លើកឡើងថា "ដូចឃើញស្រាប់ហើយ ១៤ កុម្ភៈ ឆ្នាំនេះ ជាប់គ្នានឹងថ្ងៃចូលឆ្នាំចិន ខុសពីរាល់ឆ្នាំ អីចឹងអ្នកខ្លះគេអាចទុកលុយសែន គេទុកលុយដើរលេងអីចឹងទៅ អីចឹងទាំងនេះ វាអាចហេតុធ្វើឲ្យប៉ះពាល់ដល់ការរកចំណូលរបស់យើងតាមរយៈរឿងនេះ"។

"កិច្ចសន្យាស្នេហ៍ Tom & Jerry” គឺជាស្នាដៃនិពន្ធដោយអ្នកនាង ស៊ា រស្មី ក្រោមដំបូលផលិតកម្ម Rock។ អ្នកនិពន្ធវ័យក្មេងរូបនេះ ធ្លាប់បានសាងស្នាដៃឲ្យផលិតកម្មខាងលើ ជាច្រើនរួចមកហើយចំពោះខ្សែភាពយន្តសម្រាប់ថ្ងៃបុណ្យនៃក្ដីស្រឡាញ់ ក្នុងនោះ រាប់ចាប់ផ្ដើមតាំងពីឆ្នាំ ២០១៥ មកមានរឿង "អូនជាការចងចាំបង" ឬ "You're My Momery”។

ឆ្នាំ២០១៦ មានរឿង "សិស្សប្អូនសំណព្វចិត្ត" ដែលទទួលបានគាំទ្រខ្លាំងបំផុត ដោយពេលនោះ បានឈរនៅលំដាប់លើគេក្នុងតារាងភាពយន្តរកចំណូលបានខ្ពស់របស់រោងភាពយន្ត សម្រាប់ភាពយន្តអមថ្ងៃ ១៤ កុម្ភៈ ពោលគឺ លើរឿងដ៏ល្បីហូលីវូដ "Dead Pool” នាពេលនោះថែមទៀត។ លុះមកដល់ឆ្នាំ ២០១៧ ឆ្នាំមុននេះ Rock នៅតែជោគជ័យជាមួយរឿង "ខូចចិត្តអាជីព" របស់អ្នកនិពន្ធដដែល។

វិលមក "កិច្ចសន្យាស្នេហ៍ Tom & Jerry” ឆ្នាំ ២០១៨ ដែលខកខានបន្តភាពជោគជ័យឲ្យផលិតកម្មខាងលើ លោក យឹម សុសត្យា បដិសេធបញ្ចេញតួលេខចំណូលពិតប្រាកដ។ ប៉ុន្តែលោកថា រយៈពេល២សប្ដាហ៍នៃការដាក់បញ្ចាំងតាមរោងភាពយន្តនៅរាជធានីនោះ គឺចំណូលមិនទាន់ស្មើដើមផង។ ដូច្នេះ លោកនឹងបន្តយករឿងនេះ ទៅចាក់បញ្ចាំងនៅតាមបណ្ដាខេត្តទៀត ជាមួយក្ដីរំពឹងថា ការខាតបង់នឹងត្រូវបានប៉ះប៉ូវ៕

អត្ថបទ៖ ទារិកា